Kub 1
1
Ebyafaayo by'okuhangwa kw'ebintu byona
1Okubanza Ruhanga akahanga iguru n'ensi. 2Ensi Ruhanga akaba atakagihaire mulingo kandi etarumu kantu, enyanja ekaba eswekeriirwe omwirima; Mwoyo wa Ruhanga yarabaga ha maizi eruguru.
3 #
2Mak 7:28; 2Kor 4:6. Ruhanga akagamba ati: “Habeho okuhweza”; okuhweza kwabaho. 4Yarora nkooku kuli kurungi; yabaganiza okuhweza n'omwirima. 5Okuhweza yakweta nyamusana kandi omwirima yagweta kiro. Obwire bwaira kandi bwakya kyaba kiro ky'okubanza.
6 #
2Pet 3:5. Ruhanga akagamba ati: “Habeho omwanya gubaganize habiri amaizi.” 7Ruhanga yahanga omwanya kandi yabaganiza amaizi agakaba gali hansi y'omwanya ogu, yagaiha ha maizi agakaba gali eruguru yagwo, kandi nukwo kyabaire. 8Omwanya ogu Ruhanga yagweta iguru. Obwire bwaira kandi bwakya, kyaba kiro kya kabiri.
9Ruhanga akagamba ati: “Amaizi agali hansi y'iguru gasorrokanire omu kiikaro kimu, obwerre buzooke.” Kandi nukwo kyabaire. 10Obwerre Ruhanga yabweta ensi kandi amaizi agaasoorrokaine hamu yageeta nyanja, yarora eki nkooku kiri kirungi. 11Ruhanga yagamba ati: “Ensi emere ebimera ebinyakwana ensigo n'emiti enyakwana ebijuma ebinyakurumu ensigo, buli kintu omu mulingo gwakyo nkooku kiri.” Kandi nukwo kyabaire. 12Ensi yayaruka ebimera ebinyakwina ensigo omu mulingo gwabyo, n'emiti erukwana ebijuma ebinyakurumu ensigo, buli gumu omu mulingo gwagwo nkooku guli. Ruhanga yarora ebi nkooku biri birungi. 13Bwaira kandi bwakya kyaba kiro kya kasatu.
14Ruhanga yagamba ati: “Habeho ebijwa omu mwanya gw'iguru, bibaganize nyamusana n'ekiro; bimanyiseege abantu obusumi, ebiro n'emyaka, 15bijwerege omu mwanya gw'iguru bimulikire ensi.” Kandi nukwo kyabaire. 16Ruhanga yahanga ebijwa ebikooto bibiri, ekirukukiraho obukooto, kijwege nyamusana, kandi ekitoito kijwege ekiro; kandi, yakora n'enyunyuuzi. 17Ebijwa ebi Ruhanga yabita omu mwanya gw'iguru bimulikire ensi; 18bijwege nyamusana n'ekiro, bibaganize ekyererezi n'omwirima. Ruhanga yarora eki nkooku kiri kirungi. 19Bwaira kandi bwakya kyaba kiro kya kana.
20Ruhanga akagamba ati: “Amaizi gazaale empura y'ebihangwa ebyomeezi, kandi ebinyonyi bihurruuke haiguru y'ensi birabanganemu omu mwanya gw'iguru.” 21Aho Ruhanga yahanga ebisoro ebikooto eby'omunyanja n'ebihangwa byona ebyomeezi ebiijwire omu maizi, buli kimu omu mulingo gwakyo, n'ebinyonyi byona ebinyakunyina amapapa buli kimu omu mulingo gwakyo, yarora eki nkooku kiri kirungi. 22Habweki yabiha omugisa naagamba ati: “Muzaale, mukanye, mwijuze amaizi aganyakuli omu nyanja, kandi ebinyonyi bikanye.” 23Bwaira kandi bwakya kyaba kiro kya kataano.
24Ruhanga akagamba ati: “Ensi ezaale ebihangwa ebyomeezi omu mulingo gwabyo: ente, ebintu ebinyakwekurra n'enyamaiswa ez'omunsi omu mulingo gwazo.” Kandi nukwo kyabaire. 25Kandi Ruhanga yahanga enyamaiswa ez'omunsi omu mulingo gwazo, ente omu mulingo gwazo, nabuli kintu kyona ekinyakwekurra haitaka omu mulingo gwakyo.
26 #
Ama 2:23; Sir 17:3,4; 1Kor 11:7. Nubwo Ruhanga yagamba ati: “Tukole omuntu ow'ekisisani kyaitu, owarukutusisana; alemege encu ez'omu nyanja n'ebinyonyi eby'omu mwanya, ente n'enyamaiswa zoona ez'omu kisaka, ensi yoona n'ebyekurra byona ebinyakwekururra haitaka.” 27#Kub 5:1,2.#Mat 19:4; Mar 10:6.Ruhanga nukwo yahangire ati omuntu ow'ekisisani kye; akamuhanga omu kisisani kye ky'onyini; omusaija n'omukazi.
28Ruhanga yabaha omugisa naagamba ati: “Muzaale mukanye, mwijuze ensi mugireme; muleme encu ez'omu nyanja, ebinyonyi eby'omu mwanya, n'ebyomeezi byona ebinyakuli omunsi.” 29Ruhanga yagamba ati: “Dara, mbahaire ebimera byona ebinyakuli omunsi ebinyakwana ensigo, n'emiti yoona enyakwana ebijuma ebinyakunyina enjuma, ebi byona mubiryege. 30Ebisoro byona eby'omunsi; ebinyonyi byona eby'omu mwanya, byona ebinyakwekururra ha itaka, na byona ebyomeezi, mbihaire ebimera byona ebibisi, nibyo biryeege.” Kandi nukwo kyabaire. 31Ruhanga yarora byona ebi yakozire nkooku biri birungi, kandi birungikwo mali. Bwaira kandi bwakya kyaba kiro kya mukaaga.
Bible in Runyoro/Rutooro Interconfessional Translation © Bible Society of Uganda, 2008.