Mattheos 11
11
1Unkan Jesus waonspewicakiye akenonpapi kin taku econwicaśi ayaśtan, hehan hetanhan iyaya, otonwe tawapi kin ohnahna woyake kta qa waonspekiye kta.
2Unkan Johannes kaśka hnakapi kin en Messiya oḣan kin naḣon qehan, iye waonspewicakiye cin nom ekta yewicaśi;
3Qa heciya; Tuwe u kte ciqon he niye he, qa iś tuwe tokeca wanunyakapi kta he.
4Unkan Jesus waayupte c̣a hewicakiya; Hda po, qa taku tona nayaḣonpi qa wandakapi kin hena Johannes okiyaka po:
5Iśtagongapi kin tonwanpi ece, huśtepi kin manipi ece, tona lepros ececapi kin ska wicakagapi ece, ṭapi kin kinipi ece, qa tona onśikapi kin hena wotanin waśte owicakiyakapi ece.
6Qa tuwe miye on naśdute śni kinhan, he yawaśtepi ce, eya.
7Hena wanna kihdapi hehan Jesus Johannes on oyate kin wowicakiyaka; Taku wandakapi kta on ḣewoskan yaipi he; cedi wan tateyanpa kahuhuza:
8Tuka taku e wanyag yaipi he; wicaśta wan wokoyake panpanna koyake cin he; iho tona taku panpanna koyakapi kin hena wicaśtayatapi tipi ohna yakonpi ece.
9Tuka taku e wanyag yaipi he; wicaśta wokcan kin heca he; han, eciciyapi, qa wicaśta wokcan isanpa.
10Wowapi en kagapi qon, Iho, niite itokam wahośiya mitawa yewaśi, he nitokam canku nitawa nicage kta ce, iho hee.
11Awicakehan heciciyapi; Tona winoḣinca eciyatannan wicatonpi kin wanji Johannes baptem wicaqu ece kin sanpa tanka icage śni; tuka tuwe maḣpiya wokiconze kin en iyotan cistinna kin he sanpa tanka.
12Nakun Johannes baptem wicaqu taanpetu kin hetanhan dehanyan maḣpiya wokiconze kin nina akitapi, qa nina akite cin hena iyaḣpayapi ece.
13Johannes hehanyan woope qa wicaśta wokcanpi owasin woyakapi:
14Qa niś wicada wacannipi hecinhan Elias u kte ciqon he dee.
15Tuwe noge winaḣon yukan hecinhan he ito naḣon kta.
16Tuka ito wicoicage kin de taku e imdacin kta he. Hokśipidan tihocoka en iyotankapi kin hena e iyececa, takodakupi wicakipanpi,
17Qa hewicakiyapi; Cotanke unniciyajopi tuka niye wayacipi śni; waśinunhdapi tuka niye yaceyapi śni.
18Johannes wote śni qa wayatke śni hi; unkan, Taku wakan śica yuha ce, eyapi.
19Wicaśta Cinhintku kin wota qa wayatkan hi; unkan heyapi; Iho, wicaśta wan wote sa qa miniśa yatkan ece, wamnayanpi qa waḣtanipi sa takodawicaya ece. Tuka woksape iye cinca kin on owotanna oyakapi ece.
20Hehan otonwe kin tona en iye oḣan tanka econpi qon hena iyopewicaya, iyopeic̣iyapi śni heon.
21Hehehe Korazin, hehehe Bethsada; wicoḣan tanka niyepi en econpi kin, hena Turos qa Sidon en econpi unkanś, wanakaja heyake śica caḣota ko en iyopeiciyapi kta tuka.
22Heon etanhan heciciyapi; Woyaco anpetu kin en, teḣiya yaunpi kta, qa Turos Sidon kici aopten unpi kta.
23Qa kapernaum niye, maḣpiya ekta wankan aniyanpi, tuka wicaḣapi ekta eḣpeniyanpi kta; wicoḣan tanka niye en econpi kin hena Sodom en econpi unkanś, anpetu kin dehanyan ecen un kta tuka.
24Heon etanhan heciciyapi; Woyaco anpetu kin en teḣiya yaun kta, qa Sodom makoce kin ahecece kta.
25Anpetu kin hena en Jesus waayupte c̣a heya; Ate, maḣpiya maka ko Itancan kin, ciyatan, dena taku kin tona ksapapi qa wasdonyapi kin anawicayakiḣbe c̣a hokśiyoqopapi owicayakidaka ece.
26Han, Ate hecetu, hecen iyonicipi nakaeś.
27Ate taku owasin maqu; unkan tuwedan Cinhintkuyapi kin sdonye śni, Ateyapi un kin hecedan sdonkiya; nakun tuwedan Ateyapi kin sdonye śni, tuka Cinhintku kin hecedan; qa tuwe Cinhintku kin sdonyekiye cin he nakun.
28Tona ḣtayanipi qa tkeya wayaqinpi kin owasin en mau po, kinhan ozikiyapi cic̣upi kta.
29Can nap̣inpi mitawa kin he icu po, qa miye eciyatanhan onspeic̣iciya po, cante ekta onśimic̣ida qa waḣbayedan waun; hecen ninagipi en woozikiye duhapi kta.
30Can nap̣inpi mitawa kin he teḣike śni, qa waqin mitawa kin he kap̣ojedan.
© Copyright 2015 American Bible Society. All Rights Reserved.