Mattheos 10
10
1Unkan waonspewicakiya akenonpapi kin hena wicakico qehan, taku wakan śica on wowaśake wicaqu, napewicayapi kta, qa nakun wowayazan śicaya unpi ko, owasin asniwicayapi kta.
2Unkan wahośiyapi akenonpapi kin kakenken ewicakiyapi; tokaheya Simon he nakun Inyan eciyapi, qa Andrew iye sunkaku; Jakob Zebede cinhintku qa Johannes iye sunkaku;
3Philip qa Bartholomew; Thomas qa Mattheos wamnaye ciqon; Jakob Alpheus cinhintku qa Lebbeus he nakun Thaddeus eciyapi;
4Simon Kananite kin, qa Judas Iskariot wiyopeye kte cin hee.
5Dena akenonpapi kin Jesus yewicaśi, wahokonwicakiye c̣a heya; Ikcewicaśta tacanku wan ohna yapi śni po, qa Samaria oyate otonwe tawapi kin en yapi sni po:
6Tuka Israel ti kin etanhan taḣinca wanunyanpi taninpi śni kin hena ekta ya po.
7Qa dapi eca yaotanin po, qa; Maḣpiya wokiconze kin wanna kiyedan un ce, eya po.
8Tona wayazankapi kin asniwicaya po, tona lepros ececapi kin ska wicakaga po, ṭapi kin hena kiniwicaya po, qa taku wakan śica napewicaya po; iyunwin codan iyacupi, Iyunwin codan wicaqu po.
9Ipiyake nitawapi ohna mazaskazi, qa mazaska, qa mazaśa unmana yuhapi śni po.
10Qa icimayanipi kin on wojuhadan, qa onḣdoḣda nonpa, qa hanpa, qa cansagye, yuhapi śni po; tuwe ḣtani kin he woyute qupi ece e kta iyececa.
11Qa otonwe tanka otonwe ciqadan ko, wanji tukte en yaipi kinhan, tuwe iyececa hecinhan iwicawanga po, qa he kici yukan po, tohanyan etanhan yahdapi śni kinhan.
12Qa tipi wanji en yaipi kinhan, Wookiye en un nunwe, eya po.
13Qa tipi kin he iyececa hecinhan wookiye nitawapi akan un kta; tuka iyecece śni kinhan wookiye niye en nihdipi kta.
14Qa tukten iyowinniciyapi śni qa nioiepi kin naḣonpi śni kinhan, tipi kin he, qa otonwe kin he, etanhan tankan yahdapi kinhan, watuśekśeca sina onitkapapi kin he natata po.
15Awicakehan heciciyapi; Woyaco anpetu kin en otonwe kin he teḣiya un kta, Sodom qa Gomorra makoce kin isanpa.
16Iho, taḣinca wanunyanpi śunktokeca wicehna iyecen yeciśipi; heon etanhan wamduśka iyecen ksapa po, qa wakiyedan iyecen waḣbapidan po.
17Tuka wicaśta iwanwicayaka po; woyaco omniciye kin en aniyanpi kta, qa omniciye tipi yuhapi kin ohna nicapsinpsintapi kta:
18Qa wicaśta itancanpi wicaśtayatapi ko, en aniyanpi kta, miye on etanhan, hecen iyepi qa Ikcewicaśta ko wicayakiyutaninpi kta.
19Unkan tohan hecen wicanic̣upi kinhan, taku, qa token ehapi kte cin, heon iyokiśinic̣iyapi śni po; wihiyayedan oape kin he en token ehapi kta he nic̣upi kta ce.
20Ie kte cin he niyepi śni, tuka Niyatepi Taniya en niunpi kin he iye ie kta.
21Hunkawanjinkiciyapi kin iś unma ktepi kta e wicaqu kta; qa wicaśta wan iye cinhintku kin nakun; qa wicacinca kin iś hunkakewicayapi itkowicakipapi qa wicakiktepi kta.
22Qa micaje on owasin śicenidapi kta; tuka tuwe owihanke kin hehanyan sutaya un kinhan he ni kta.
23Tuka tohan otonwe kin de en śicaya nicuwapi kinhan, wanji tokeca ekta najica po; awicakehan heciciyapi, Israel otonwe tawapi kin iyaza yaunpi kte śni ecen Wicaśta Cinhintku kin hi kta.
24Waonspekiyapi kin he waonspekiya tawa kakipe śni; qa tuwe wowidake un kin he yuhe cin isanpa tanka śni ece.
25Tuka waonspekiyapi kin waonspekiya tawa kin iyececa, qa wowidake un kin yuhe cin iyececa hecinhan hecetu kta. Tipi tawa kin he Beelzebub eciyapi hecinhan, tiyohnake tawa kin iś nakun hewicakiyapi kte śni he.
26Heon etanhan kowicakipapi śni po; taku akaḣpapi qa yuzamnipi kte śni wanica, qa taku anaḣmanpi qa sdonyapi kte śni wanica.
27Taku otpaza en ociciyakapi kin he anpa en daotaninpi kta; qa taku noge on nayaḣonpi kin he tipi akaḣpe kin etanhan eyanpaha odakapi kta.
28Unkan tona wicatancan ecedan ktepi kta okihipi, qa wicanagi kte okihipi śni kin hena kowicakipapi śni po; tuka tuwe wicanagi wicatancan ko Wakanśica ti kin en ihangye kte cin hee e kokipa po.
29Zitkadan nom mazaśa wanjidan iyopeyapi śni he; qa etanhan wanjidan kaeś Niyatepi codan makata iḣpaye kte śni.
30Tuka paha nitawapi kin hee kaeś owasin yawapi ece.
31Heon etanhan kopehdapi śni po; zitkadan ota isanpa niyawapi ece.
32Heon etanhan tuwe kaśta wicaśta wicitokam miye omayake cinhan, he Ate maḣpiya en un kin itokam omdake kta.
33Tuka tuwe wicaśta wicitokam miye eḣpemaye cinhan, he miye Atewaye maḣpiya en un kin itokam eḣpewaye kta.
34Wookiye maka akan wicawaqu kta on wahi kecinpi śni po; wookiye wicawaqu kta wahi śni tuka mazasgye.
35Wicaśta wan atkuku śicekidake wakiye kta wahi, qa cunwintku iye hunku kin, qa takośku iye kunku kin śicekidake kta heon.
36Qa wicaśta tona tokayapi kin iye ti en unpi kin hena eepi kta.
37Tuwe miye isanpa atkuku qa iś hunku kin waśtekidake cinhan, he mici un kta iyecece śni; qa tuwe miye isanpa cinhintku qa iś cunwintku kin waśtekidake cinhan, he mici un kta iyecece śni:
38Qa tuwe cansusbeca tawa kin ehdaku śni qa miyahna u śni kinhan, he mici un kta iyecece śni.
39Tuwe wiconi tawa kpatan kinhan, he toki eḣpekiye kta; qa tuwe miye on etanhan wiconi tawa kpagan kinhan, he kpatan kte cin ee.
40Tuwe iyowinniciyapi kin he iyowinmakiya; qa tuwe iyowinmakiye cin he tuwe umaśi kin he iyowinkiya ece.
41Tuwe wicaśta wokcan, wicaśta wokcan caje on iyowinkiye cinhan, he wicaśta wokcan iyunwin tawa yuhe kta; qa tuwe wicaśta owotanna, wicaśta owotanna caje on iyowinkiye cinhan, he wicaśta owotanna iyunwin tawa kin icu kta.
42Qa tuwe waonspekiyapi caje on, dena cikcistinpidan wanji wiyatke ohna mini sni ecedan yatkekiye cinhan, awicakehan heciciyapi, he iyunwin tawa toki eḣpekiye kte śni.
© Copyright 2015 American Bible Society. All Rights Reserved.