LUKA 19
19
Zakayo
1Yeso agasoa Yeriko, akaba ngoeta are egati‐gati yaye. 2Narenge aroro omonto oyomo ore korokwa Zakayo, omonene bw’abarusia ebango; ere nomonda orenge. 3Akarigia korora Yeso, gose monto ki; ko tanyara ase engencho y’omoganda, ekiagera arenge omweng’e. 4Agatang’ana bwango, akariina igoro ase omoko anyare komorora, ekiagera ngoetera arenge ase enchera eria. 5Ekero Yeso achia goika aase aria, akarigereria igoro, akamotebia, “Zakayo, ika bwango, ekiagera rero ningwenerete goikaransa nyomba mwao.”
6Agaika bwango, akamoroisia nomogoko. 7Ekero abanto bachia korora aya, bakemurungania bonsi, bakobora, “Osoire koba omogeni bw’omonyene ebibe.” 8Zakayo agatenena, agatebia Omonene, “Rora, Omonene, ekeng’ese ki’enibo yane ning’ee abataka; naende onye naureretie omonto egento nimoiranerie ara kane.”
9Yeso akamotebia, “Rero ogotooreka gwaikire enyomba eye, ekiagera oyo boigo nomwana o Ibrahimu. 10Naki Omwana‐o‐mwanyabanto nigo achete korigia egiasirete na kogetooria.”
Omoreng’anio bwe chiropia
11Abanto baria bagachia koigwa aya, Yeso akamenta kobatebia omoreng’anio, ekiagera konya oikire ang’e na Yerusalemu, na barabwo bagakaga ng’a oboruoti bwa Nyasae nigo borarorekane ekero ekio kegima. 12Nabo akabora, “Omonto oyomo omosike akagenda ense y’aare, erinde anyare kwenyorera oboruoti, naende airane. 13Akarangeria abanto ikomi korwa ase abasomba baye, akabaa ebirengo ikomi bie chiropia, akabatebia: Biire mobionchorerie goika ekero nkoirana. 14Abanto b’ense yaye bakamogecha, bagatoma abatomwa komotunyana na komotebia, Titorigeti omonto oyo atogambere.
15“Ekero achia koirana, kanyorire oboruoti, agachika abasomba baria aete chiropia barangerigwe, erinde anyare komanya ebitoki banyorire ase okoonchoreria kwabo. 16Oyo bwe ritang’ani agacha, okobora: Omonene, ekerengo kiao kiarentire ebirengo ikomi binde. 17Akamotebia: Gwakorire buya, aye omosomba omuya! Ekiagera kwabeire omwegenwa ase egento kere egeke, nabo nobe nokobua igoro ase emechie ikomi. 18Na oyo o kabere agacha, akabora: Omonene, ekerengo kiao kiarentire ebirengo bitano. 19Akamotebia nere boigo: Aye nobe igoro ase emechie etano. 20Naende oyonde agacha, akabora: Omonene, eke nakio ekerengo kiao nagachete ase egetambaa; 21nigo nakoirogete, ekiagera aye nigo ore omonto omokong’u. Nigo okobogoria eki otagachete, na kogesa eki otasimegete. 22Akamotebia: Ase enkwana y’omonwa oo ninkogambie, aye omosomba omobe. Nkwamanyete ng’a inche nomonto omokong’u, nkobogoria eki ntagachete, na kogesa eki ntasimegete. 23Naki rende otabegete chibesa chiane ase aba bakorua ebitoki, ninche ngocha anga nachinyora amo nebitoki? 24Agatebia abarengeo: Moure ekerengo kiaye, moe oria oyore nebirengo ikomi. 25(Bakamotebia: Omonene, oyo nare nebirengo ikomi). 26Nabatebirie: Kera oyore negento naegwe, korende ere oyotari negento, nonya nkeria abwate naurwe. 27Korende baria ababisa baane batarigeti mbagambere, barente aiga, mobaite ase obosio bwane.”
Yeso ogochengerwa kagosoa Yerusalemu
(Mat 21:1–11; Mar 11:1–11; Yoh 12:12–19)
28Gakoorire gokwana amang’ana aya, agatang’ana gotiira kogenda Yerusalemu. 29Agachia goika Betifage na Bethania, ase egetunwa ki’Emezeituni, agatoma babere b’aborokigwa baye, 30akabatebia, “Genda goika agachie karia mokoorokera; kamwasoire ime, inamorore emori y’etigere esibire, etana koriinwa na monto; moyesibore moyendetere. 31Naende omonto karababorie: Naki, mokoyesibora? Momotebie iga, Omonene nayeganetie.”
32Nabo baria batometwe bakagenda, bakayenyora buna abatebetie. 33Ekero baare gosibora emori eria y’etigere, abanyene bakababoria, “Nase ki mogosibora emori?” 34Bakabora, “Omonene nayeganetie.” 35Bakayerenta ase Yeso; bakaara chianga chiabo igoro ase emori eria, bakariinia Yeso igoro asero. 36Ere gakogenda, bakaara chianga chiabo inchera. 37Agachia goika egetirimboko ki’egetunwa ki’Emezeituni, omoganda bwonsi bw’aborokigwa baye bagachaka kogoka na komobaka Nyasae ase eriogi rinene ase ebikone bie chinguru bionsi barorire, 38bakobora, “Nasesenirie Omoruoti oyogocha ase erieta ri’Omonene! Omorembe igoro, na obonene bore igoro mono!”
39Abande ase Abafarisai abarenge ase omosangererekano bakamotebia, “Omworokia, togonyera aborokigwa bao!”
40Akairaneria, “Nabatebirie: Aba nabaisa gokira, amagena aya naake eriogi.”
Yeso ogwechandera Yerusalemu
41Ere agachia goika ang’e akarora omochie, akayoiyereria amariga, 42okobora, “Onye nkwamanya rero ayare korenta omorembe! Korende bono abisekire ase amaiso ao! 43Naki amatuko nagochere, ababisa bao barakoagachere orwaki bagoetanane, bagotange ase chinsemo chionsi, 44na bakoiyerie inse, na abana bao ime asore. Tibagotiga ime asore rigena erimo igoro ase erinde, ekiagera otamanyeti engaki y’ogocherwa kwao.”
Yeso ogochena Hekalu
(Mat 21:12–17; Mar 11:15–19)
45Agasoa Hekalu ime, agachaka gosokia baria barenge koonia aroro, 46akabatebia, “Nerikire: Enyomba yane nebe enyomba y’ogosaba, korende inwe mwayekorire koba ribwago ri’abauri.”
47Akaba okworokereria kera rituko ase Hekalu. Abakuani abanene, na aborokia b’amariko, na abanene b’abanto bakarigia komoita; 48na barabwo tibanyora eki bagokora, ekiagera abanto bonsi bamotegererete.
OLD EKEGUSII BIBLE PROTESTANT EDITION
©Bible Society of Kenya, 2020