OGOKORA KW’ABATOMWA 21
21
Korwa Mileto goika Turo
1Ekero twatananekire nabarabwo na komanora nemeeri, tokagenda boronge goika Kosi, na ase rituko ria kabere togaika Rodo, na korwa aroro togaika Patara. 2Tokanyora emeeri eyeranyare kwamboka goika Foiniki, tokariina emeeri eria, tokagenda. 3Ekero twachia korora egesinka gekorokwa Kuporo, tokagetiga ensemo y’okobee; tokagenda goika Siiria, togaika Turo; na agwo chigurube chikarusigwa ase emeeri. 4Gatwanyorire aborokigwa, tokabeera aroro amatuko atano na abere. Na barabwo bagatebia Paulo ase okobua kw’Omoika Omochenu tatiira gochia Yerusalemu. 5Ekero amatuko aito achia koera, tokaimoka, tokagenda ase orogendo rwaito; na abwo bonsi, na abakungu babo, na abana, bagatokooba goika isiko y’omochie; togatung’ama ase engegu y’enyancha, togasaba. 6Gatwatebanirie ng’a motigare buya, intwe tokariina emeeri, na barabwo bakairana gochia sobo.
Goika Kaisaria
7Gotwachia gokoora orogendo rwaito korwa Turo, togaika Potolemai, togakwania abaminto, togaikaransa nabarabwo rituko erimo. 8Mambia yaye tokaimoka tokagenda Kaisaria, togasoa enyomba ya Filipo, omorandia bw’enchili. Nere orenge oyomo bwa baria batano na babere;#21:8 Rora Ogok 6:5 tokamenya bwoye. 9Omonto oyo narenge nabaiseke bane abekungi, baare kobana. 10Gatwamenyire aroro amatuko atai make, omobani oyomo, erieta riaye Agabo, agatirimboka korwa Boyahudi. 11Agacha asetore, akabogoria orokini rwa Paulo, agesibera amagoro na amaboko, akabora, “Omoika Omochenu otebire iga: Naboigo Abayahudi ba Yerusalemu barache gosiba omonto omonyene orokini oro, na barabwo nabamobeke ase amaboko ’abanto b’Ebisaku.”
12Togachia koigwa aya, intwe na abanto baria tokamosorora tabaisa gotiira gochia Yerusalemu. 13Erio Paulo akairaneria, “Inki eke mogokora, mokorera na kong’ita omoyo? Nigo inde ang’e, tari ase ogosibwa gwoka, korende nonya nogoitwa ase Yerusalemu ase engencho y’erieta ri’Omonene Yeso.”
14Erio kangire amang’ana aito togakira togateba, “Ogwancha kw’Omonene tiga gokoreke.”
Goika Yerusalemu
15Nyuma ase amatuko ayio tokebeka ang’e togatiira kogenda Yerusalemu. 16Abande b’aborokigwa ba Kaisaria bakagenda amo naintwe, bagatoira mwa Mnasoni, omonto o Kuporo, omworokigwa o kare, tokarara bwoye.
17Ekero twaigete Yerusalemu abaminto bagatoroisia ase omogoko.
Omokia o Paulo bw’okobwatana n’Abakristo b’Abayahudi
18Rituko ria kabere Paulo agasoa mwa Yakobo amo naintwe, na abagaaka bonsi nao barenge. 19Kabakwanirie, akaborokia amang’ana onsi erimo erimo, aya Nyasae akorire ase egati y’abanto b’Ebisaku ase obosomba bwaye. 20Barabwo, ekero bachia koigwa, bagatogia Nyasae, bakamotebia, “Oyominto, kwarorire ng’a Abayahudi chilifu chinyinge begenire; na barabwo bonsi nigo bare nomokia ng’a amachiko abwatwe. 21Na barabwo mbatebetigwe ng’a kworokereirie Abayahudi bonsi abamenyete ase egati y’abanto b’Ebisaku ng’a batige Musa, gokobakania tibarokia abana babo, gose tibabwatia chingencho chiaito. 22Inki rende kegwenerete gekorwe? Ekeene, nabo baraigwe ng’a gwachire aiga. 23Gaki kora ring’ana eri toragotebie. Mbare aiga asetore abanto bane abariete eira gete. 24Ira abanto aba okore buna engencho y’ogwesibia ere amo nabarabwo, obaakanere chibesa, erinde bakigite chitukia chiabo. Igo abanto bonsi banyare komanya ng’a amang’ana aria batebetigwe igoro yao tari ay’ekeene, korende aye omonyene nigo okogenderera buya na kobwata amachiko. 25Korende ase abanto b’Ebisaku abegenete, twatomire rirube buna twanacha, ng’a beatanane korwa ase ebinto birure ebing’wanso ase emegwekano y’ogosasimwa, na korwa ase amanyinga, na korwa ase enyama ende yonsi y’eng’iti eng’entire, na korwa ase obotomani.”
26Erio Paulo akaira abasacha baria, ne rituko ria kabere agakora buna engencho yare y’ogwesibia amo nabarabwo. Erio agasoa Hekalu ime, ase okoraria amang’ana ’ogwesibia na engaki y’okorua esadaka ase engencho ya kera oyomo obo.
Eburu‐buru yabete Yerusalemu, na okobwatwa gwa Paulo
27Ekero amatuko aria atano na abere achia koba ang’e goikeranigwa Abayahudi abarwete Asia bakamorora ase Hekalu ime, bagaseegeta abanto bonsi, bakamobwata, 28bagaaka eriogi, bagateba, “Inwe abasacha ba Israeli, tokonye! Omonto oyo nere oria okworokereria abanto ase kera ensemo mamincha y’egesaku giaito, na amachiko, na aase aiga. Kobua ase aya orentire Abagiriki ase Hekalu ime ogindirie aase aiga aachenu riko.” 29Ekiagera baroche Torofimo Omoefeso amo nere ase omochie, bagakaga ng’a Paulo namosoirie ase Hekalu ime.
30Omochie bwonsi ogatitira, na abanto bakaminyoka gocha amo, bakabwata Paulo, bakamokurura, bakamosokia korwa ase Hekalu. Erio ebisieri bigasiekwa. 31Ekero bateemire komoita, amang’ana agaikera omotang’ani bw’abarwani elifu ng’a omochie omogima o Yerusalemu osarekire. 32Erio bwango akaira abarwani na abatang’ani b’abarwani rigana, akaminyoka gochia asebare. Na barabwo bagachia korora omotang’ani oria omonene na abarwani, bagatiga goaka Paulo. 33Erio omotang’ani oria omonene agaika aroro, akamobwata, agachika asibwe nebinyuri bibere. Akababoria, “Nere ng’o oyo, naende inki akora?” 34Abande ase omosangererekano bagaaka eriogi bagoteba iga, na abande iga. Ekero atanyarete komanya oboronge bw’amang’ana aria ase engencho y’egeturi keria, agachika arentwe ime ase enyomba y’abarwani. 35Nabo agachia goika ase ebiriinero akabogorigwa nabarwani ase engencho y’obotindi bw’omoganda, 36ekiagera omoganda bw’abanto omotunyanete, ogoaka egeturi, ogateba, “Morusieo oyo!”
37Na Paulo, ekero aikigwe ang’e gosoigwa ime ase enyomba y’abarwani, akaboria omotang’ani oria omonene, “Ninyore ribaga ngotebie ring’ana?” Omotang’ani oria akabora, “Inee! Nomanyete Ekegiriki? 38Aye tori Omomisiri oria, ere rero iga oseegeta abanto baria Abaiti chilifu inye, akabatang’ana gochia ase erooro?”
39Paulo akamoiraneria, “Inche n’Omoyahudi, omonto o Tariso, omochie o Kilikia, omobiare bw’omochie otari moke; nagosabire ong’e ribaga nkwane nabanto aba.”
40Erio ekero amoete ribaga, Paulo agatenena ase ebiriinero igoro, akabakiria nokoboko abanto baria. Kabakiririe kegima, agakwana nabarabwo ase omonwa bw’Ekeibirania, agateba,
OLD EKEGUSII BIBLE PROTESTANT EDITION
©Bible Society of Kenya, 2020