OGOKORA KW’ABATOMWA 19
19
Aborokigwa ba Yohana Omobatisi ase Efeso
1Ekaba ekero Apolo arenge Korinto, Paulo agaeta egati y’ense ya rogoro, agaika Efeso. Aroro akanyorana naborokigwa batai bake. 2Akababoria, “Mwanyorete Omoika Omochenu ekero mwegenete?”
Bakamoiraneria, “Yaya, titwana koigwa nonya ng’ake ng’a Omoika Omochenu noreo.”
3Akababoria, “Mbatiso ki mwabatisetwe?” Bakamoiraneria, “Ase ebatiso ya Yohana.”
4Paulo akabatebia, “Yohana nigo are kobatisa ebatiso y’okoonchoka, ogotebia abanto bamwegene ere oyorache gocha nyuma yaye, oyio nere Yeso.”
5Ekero bachia koigwa aya, bakabatiswa ase erieta ri’Omonene Yeso. 6Na ekero Paulo abekire amaboko aye igoro asebare, Omoika Omochenu okabaikera; bagachaka gokwana ase emenwa na kobana. 7Na bonsi nigo barenge abasacha koreng’ana ikomi na babere.
Paulo ase Efeso
8Agasoa ase esinagogi ime, agakwana noboremu, akorokereria abanto engaki y’emetienyi etato, okobaebereria ase amang’ana ’oboruoti bwa Nyasae. 9Korende ekero abande bakong’etie chinkoro chiabo, na tibegena, na bagakwana bobe igoro y’Enchera y’Omonene ase obosio bw’omosangererekano, akaimoka akabatiga, akarusanania aborokigwa, akaba nkoborokereria are kera rituko ase enyomba y’amorokererio ya Tiriano. 10Amang’ana aya akagenderera ase engaki y’emiaka ebere, goika bonsi abamenyete Asia, Abayahudi na Abagiriki, bakaigwa ring’ana ri’Omonene.
11Nyasae agakora ebikone ebinene mono ase amaboko a Paulo, 12goika chianga na ebitambaa ebiakunete omobere oye bikairwa ase abarwaire, na igo bakagwenigwa amarwaire abo, na ebirecha ebibe bikarua asebare. 13Abande b’Abayahudi, abaseria b’ebirecha, abarenge abaetanani, bagateema gwatora erieta ri’Omonene Yeso igoro y’ababwatire nebirecha ebibe, bagoteba, “Twabitianirie ase Yeso oria okorandigwa na Paulo.” 14Abakorete ayio nabamura batano na babere ba Sikewa, Omoyahudi orenge omokuani omonene. 15Ekerecha keria ekebe gekabairaneria, “Yeso nimomanyete, na Paulo namomanyire, korende inwe mbarabi?”
16Na omonto oria obwatire nekerecha ekebe akabarindokera, akabanyara, akababua, goika bagatama korwa ase enyomba eria getirianda, bare ne chingoma baakirwe. 17Amang’ana aya akamanyekana ase Abayahudi na Abagiriki bonsi abamenyete Efeso; obwoba bokabasoa bonsi, na erieta ri’Omonene Yeso rikabakwa. 18Abange babo, abachagete kwegena, bagacha, bakaorokia chingencho chiabo chimbe baare gokora. 19Abange ase baria abaare gokora chingencho chi’oboragori, bagasangereria ebitabu biabo, bakabisamba ase amasio ’abanto bonsi. Kobakorire omobaro bwe rigori ri’ebitabu ebio, bakanyora ng’a mbiisanete chiropia chie chifeta chilifu emerongo etano. 20Nabo ring’ana ri’Omonene rikaranda, rikabua.
Emeroberio ya Paulo
21Amang’ana aya achia koera, Paulo akarengereria ase omoika oye ime goeta egati ya Makedonia na Akaya gochia Yerusalemu, ogoteba, “Nyuma konabeire agwo ningwenerete korora Rumi noro.” 22Agatoma abanto babere korwa ase baria baare komokonya bagende Makedonia, nabwo Timotheo na Erasto. Ere omonyene agatigara Asia ase engaki enke.
Eburu‐buru ase Efeso
23Ase amatuko ayio eburu‐buru etai nke ekaimoka ase amang’ana ’enchera y’Omonene. 24Ekiagera omonto oyomo ore korokwa Demeterio, omoturi bwe chifeta, oyorenge gokora ebihekalu bie chifeta bi’Aritemi#19:24 Aritemi: erieta ri’Ekegiriki ri’enyasae yarenge gosasimwa agwo Asia Enke, nigo arenge konyorera abaroisia enibo enyinge. 25Akabasangereria abwo amo nabande ab’emeremo eria, akabora, “Inwe abasacha, mwamanyire ng’a obotenenku bwaito nigo bokorwa ase emeremo eye. 26Naende mwarorire na koigwa ng’a Paulo, oyio oebereirie abanto na kobaonchora, tari ase Efeso oka, korende nonya nase Asia yonsi pi, okobatebia ng’a chinyasae chigokorwa namaboko tari chirochio chinyasae. 27Nabo ere aakong’u asetore, tari ng’a nemeremo yaito yoka erachaywe, korende nonya ne hekalu y’Aritemi, enyasae enkungu ere enene, nigo erabarwe ng’a teri gento. Naende enyasae eria, egosasimwa nabanto b’Asia yonsi na ab’ense yonsi nigo eraurwe obonene bwaye.”
28Ekero bachia koigwa aya bagaichorwa nendamwamu, bagaaka eriogi, bagateba, “Aritemi y’Abaefeso nenene!” 29Omochie bwonsi ogaichorwa neburu‐buru, bakabwata Gayo na Aristarko, abanto ba Makedonia, baare gotaara amo na Paulo, bakabakurura na bakaminyoka amo gochia aase chigosori chigokorerwa. 30Na Paulo akarigia gosoa ase egati y’abanto, korende aborokigwa tibamwanchera. 31Abande b’abanene b’Asia, abarenge abasani baye, bagatoma abanto asare, bakamosorora tabaisa kweorokia omonyene aase chigosori chigokorerwa. 32Bono abande nigo barenge korera iga, na abande iga, ekiagera omosangererekano oria konya obeire neburu‐buru. Abange asebare tibamanyete nase ki basangererekanete amo. 33Abande ase omosangererekano bagatebereria Aleksanderi, oyo Abayahudi bakamosukia ase amaiso ’abanto. Aleksanderi akaimokia okoboko kwaye, akarigia gwekengera. 34Korende ekero bamomanya ng’a ere n’Omoyahudi, bagakuura bonsi amo ase egeka ki’ang’e chinsa ibere chingima, bakorera, “Aritemi y’Abaefeso nenene!”
35Omoriki bw’omochie agakiria abanto agateba, “Inwe abasacha b’Efeso, monto ki ore aa otamanyeti ng’a omochie bw’Abaefeso noro omorendi bwe hekalu y’Aritemi eria enene, na obw’omogwekano oria ogwete korwa igoro? 36Gaki, ekiagera amang’ana aya takonyara gokanwa, mogwenerete gokira, timokora ring’ana ria bwango. 37Naki iga mwarenta abanto aba bataibeti ebinto bie hekalu gose korama enyasae yaito enkungu. 38Ase igo, onye Demeterio na ababaachi abare amo nere bare ne ring’ana igoro ase omonto, amatuko ’okogambanwa nare, na abagambi mbareo, tiga basoerane. 39Korende onye more namang’ana ande, nigo araroisigwe nabagambi ba botambe. 40Ekeene obokong’u mbore asetore, aande mbarigetie gotosoera ase engencho y’eburu‐buru eye ya rero. Karabe igo, rirorio titokonyara gwekengera ase engencho y’omosangererekano oyo.” 41Ekero akoorire gokwana aya, akaa omosangererekano ribaga ogende.
OLD EKEGUSII BIBLE PROTESTANT EDITION
©Bible Society of Kenya, 2020