OGOKORA KW’ABATOMWA 16
16
Timotheo okobwatana na Paulo ase Listra
1Agaika Deribe na Listra. Narengeo omworokigwa oyomo, erieta riaye Timotheo, omwana bw’omokungu Omoyahudi, korende ise n’Omogiriki orenge. 2Omonto oyio nigo arenge gokwanwa buya nabaminto abamenyete Listra na Ikonio. 3Paulo agancha Timotheo agende nere, akamoira, akamosara ase engencho y’Abayahudi abarenge chinsemo chiria, ekiagera bonsi mbamanyete ng’a ise n’Omogiriki orenge. 4Nabo ekero barenge goeta egati y’emechie eria, bakabaa amachiko aria ayachigetwe nabatomwa na abagaaka abarenge Yerusalemu, erinde bayabwate. 5Nabo chikanisa chikabekwa chinguru ase okwegena; omobaro obo okamentekana kera rituko.
Orogendo rwa Paulo goetera Asia Enke
6Bagaeta ase ense ya Furugia na Galatia, ekiagera bakanetigwe n’Omoika Omochenu, ng’a tibarandia ring’ana agwo Asia. 7Ekero bachia goika kororia Misia, bagateema kogenda Bitinia, korende Omoika o Yeso tobaa ribaga. 8Bagaeta Misia, bagatirimbokera Teroa. 9Paulo akaorokerwa nokorora botuko, akarora omonto o Makedonia oteneine okomosorora, okomotebia, “Amboka gocha aa Makedonia otokonye.” 10Ekero arorire okorora koria, erio bwango tokarigia kogenda Makedonia, ekiagera twaroche ekeene ng’a Nyasae otorangeirie tobaranderie enchili.
Paulo okwamboka gochia Makedonia. Ase Filipi
11Tokamanoria emeeri korwa Teroa, tokagenda boronge goika Samotraki. Rituko ria kabere togaika Neapoli, 12na korwa aroro togaika Filipi, omochie ore omonene ase ensemo ya Makedonia, ense yare kogamberwa n’Abarumi. Tokamenya ase omochie oyo amatuko amake. 13Ase rituko ri’Esabato togasoka isiko y’egeita ase orooche mbarabare, ase ensemo twarengereretie ng’a tonyore aase togosabera. Togaikaransa, togakwana nabakungu abasangererekanete aria. 14Narengeo omokungu oyomo ore korokwa Lidia; ere nigo arenge omosasimi Nyasae. Nigo arwete omochie o Tiatira; naende nigo arenge omoonia bw’ebitambaa bimonyinga. Ere agatotegerera. Omonene akaigora enkoro yaye, erinde akaigwa amang’ana Paulo arenge gokwana. 15Goika ochia kobatiswa, ere amo nab’enyomba yaye, agatosorora, ogoteba, “Onye mwandorire ng’a nomwegeni nde ase Omonene, soa nyomba mwane, moikaranse.” Agatobetereria.
16Ekero tware kogenda aase aria tware gosabera, tokaumerana nomoiseke omosomba oyobwatire nekerecha ki’oboringoria. Ere nigo arenge konyorera abanene baye enibo enyinge ase oboringoria bwaye. 17Agatunyana Paulo na intwe, ogoaka eriogi ogoteba, “Abanto aba nabasomba ba Nyasae Ore Igoro Mono, bakoranderia inwe enchera y’ogotooreka.” 18Akana‐gokora ayio amatuko amange. Korende Paulo agakoona, akeonchora, agatebia ekerecha keria, “Nagochikire ase erieta ria Yeso Kristo: Karue ase oyo!” Gekamorua ensa eria eria.
Paulo na Sila bagosibwa na gosiborwa
19Korende ekero abanene baye bachia korora ng’a ogosemeria kw’enibo yabo gwasirire, bakabwata Paulo na Sila, bakabakurura goika echiiro ase obosio bw’abanene b’omochie. 20Bakabaira ase abagambi, bagateba, “Abanto aba basaririe omochie oito, na barabwo n’Abayahudi. 21Naende nigo bakworokereria chingencho chitari boronge ng’a tochianche gose gochienaria, ekiagera intwe n’Abarumi tore.” 22Omoganda okabwatana ase okobogerera, na abagambi bakabatandorera chianga chiabo na gochirusia, bagachika ng’a baakwe ne chinyimbo. 23Kobabaakire amaakwa amange, bakabaruta echela ime, bagachika omorendi bw’echela abarende mono. 24Ere ekero anyorire ogochika oko akabaruta ase akanyomba ka ime, agasoyia amagoro abo ase amakorogoto.
25Korende ekero kia botuko gati Paulo na Sila nigo barenge gosaba Nyasae na komoterera amatera, na abasibwa bande nigo babategererete. 26Erio mobosokano omotengecho omonene okaba aroro, goika amaroso ’echela agatengechigwa; bwango ebisieri bionsi bikaigoka, na ebisibo bia bonsi bigasansoka. 27Omorendi bw’echela akaboka na akarora ebisieri bi’echela biaigokire, akang’usa omoyio o birende, akarigia gweita, ekiagera akagete ng’a abasibwa mbatamire. 28Korende Paulo agaaka eriogi rinene, agateba, “Tibweita, ekiagera intwe twensi nao tore aa.”
29Akarigia chitaya chirentwe, akarindoka gochia ime, okoiguswa ase obwoba, akagwa inse ase amagoro a Paulo na Sila; 30akabarenta isiko, akababoria, “Abanene baane, inki ndakore ntooreke?”
31Bakamoiraneria, “Mwegene Omonene Yeso, na aye notooreke amo nab’enyomba yao.” 32Bagakwana ring’ana ri’Omonene asare na ase abanto bonsi abarenge mwaye. 33Akabaroisia ensa eria ya botuko, akabasibia chingoma chiabo, akabatiswa ekero ekio, ere na abanto bonsi ba mwaye. 34Akabaira mwaye, akabarageria, akagoka mono amo na bonsi b’enyomba yaye, ekiagera konya bamwegenire Nyasae.
35Ekero bwachia gokia, abagambi bagatoma abanyanyimbo, bagoteba, “Tiga abanto abwo bagende!” 36Omorendi oria bw’echela akairera Paulo amang’ana ayio, agateba, “Abagambi batomire amang’ana ng’a mosiborwe; gaki bono, soka isiko, mogende nomorembe!”
37Korende Paulo akabatebia, “Bagatosusura maiso marore bataratogambia kina, na intwe n’Abarumi tore, naende bagatoruta echela ime. Inee! Bono barigetie gotosokia bobisi? Yaya! Tari bo; tiga bache abanyene batosokie.” 38Abanyanyimbo bakairera abagambi amang’ana aya, na bar abwo bakoboa ekero baigwa ng’a Paulo na Sila n’Abarumi bare. 39Bagacha bakabasaba okwaberwa. Erio kobabasokirie isiko bakababoria barue ase omochie oria. 40Na barabwo bagasoka korwa ase echela, bagasoa nyomba mwa Lidia. Aroro bakanyorana nabamwabo, bakabaremia. Erio bakaimoka, bakagenda.
OLD EKEGUSII BIBLE PROTESTANT EDITION
©Bible Society of Kenya, 2020