Dw 18
18
Gyisɛse ɛhyelɛ
(Mat 26.47-56; Mak 14.43-50; Luk 22.47-53)
1Gyisɛse wiele nzɛlɛlɛ ɛhye yɛ la, ɔ nee ye ɛdoavolɛma ne hɔpɛle hɔle azule ekyi bie mɔɔ bɛfɛlɛ ye Kedelɔn la anzi. Tola bie wɔ azule ne anzi na Gyisɛse nee ye ɛdoavolɛma ne hɔle nu. 2Ɔyɛ a Gyisɛse nee ye ɛdoavolɛma ne ta yia tola ɛhye anu. Yemɔti Dwudase mɔɔ yele Gyisɛse manle la ze ɛkɛ ne. 3Ɛhye ati Dwudase vale Wulomu sogyama nee Ɛzonlenlɛ Sua ne sinzavolɛma mɔɔ sɛlɛvolɛ mgbanyima ne nee Falasiima zoanle bɛ la rale tola ne anu. Bɛkɔ la bɛdedɛ ahoholombaka nee dadeɛ, tɛkɛ, yɛɛ tayia. 4Gyisɛse ze mɔɔ bazi ɔ nwo zo la ati, ɔrale ɔ nyunlu na ɔbizale bɛ kɛ, “Nwane a bɛkpondɛ ye a?”
5Bɛbuale ye kɛ, “Yɛkpondɛ Gyisɛse mɔɔ vi Nazalɛte la.”
Gyisɛse zele bɛ kɛ, “Medame ɛne.”
Mekɛ ne anu ɛnee Dwudase mɔɔ yele Gyisɛse manle la gyi ɛlɔne ne anu. 6Mɔɔ Gyisɛse hanle kɛ, “Medame ɛne” la, ɛlɔne ne dule hɔle bɛ nzi na bɛdule bɛguale aze. 7Gyisɛse eza bizale bɛ kɛ, “Nwane a bɛkpondɛ ye a?”
Bɛhanle kɛ, “Yɛkpondɛ Gyisɛse mɔɔ vi Nazalɛte la.”
8Gyisɛse zele bɛ kɛ, “Se meha mehile bɛ kɛ medame ɛne. Saa medame yɛɛ bɛkpondɛ me a, ɛnee bɛmaa ɛhye mɔ ɛhɔ.” 9(Ɔhanle ɛhye amaa ye edwɛkɛ ne mɔɔ ɔhanle kɛ, “Egya, meamminli bɛdabɛ mɔɔ ɛvale bɛ ɛmanle me la anu ko bɔbɔ” la ayɛ nɔhalɛ.)
10Saemɔn Pita ɛnee lɛ dadeɛ, na ɔhwenle ɔpɛle Sɛlɛvolɛ Kpanyinli ne akɛlɛ ne anzo fema ne. Akɛlɛ ne bɛfɛlɛ ye Malekɛse. 11#Mat 26.39; Mak 14.36; Luk 22.42 Gyisɛse zele Pita kɛ, “Fa wɔ dadeɛ ne wula ye boa ne anu. Ɛdwenle kɛ menrɛnlo nyane kɔpo ne mɔɔ Egya ɛva ɛmaa me la anu ɔ?”
Gyisɛse gyi Anase anyunlu
12Akee Wulomu sogyama ne nee bɛ kpanyinli ne nee Dwuu sinzavolɛma ne mɔ hyele Gyisɛse, bɛkyekyele ye, 13na bɛlumuale bɛvale ye bɛhɔle Sɛlɛvolɛ Kpanyinli Anase ɛkɛ. Anase le Kayafase, mɔɔ le ɛvolɛ ne anu Sɛlɛvolɛ Kpanyinli la aye ne ɔ ze. 14#Dw 11.49-50 Kayafase ɛhye a dule Dwuuma ne folɛ kɛ ɔle kpalɛ kɛ sonla ko kɛwu kɛmaa menli ne amuala la.
Pita kpo Gyisɛse
(Mat 26.69-70; Mak 14.66-68; Luk 22.55-57)
15Saemɔn Pita nee ɛdoavolɛ ko noko doale Gyisɛse nanamogya. Ɛdoavolɛ zɔhane Sɛlɛvolɛ Kpanyinli ne ze ye kpalɛ kpalɛ, yemɔti ɔwolole ɔdoale Gyisɛse wɔ Sɛlɛvolɛ Kpanyinli ne alie nwo lɔ. 16Pita hale anuhɔlɛ ɛkɛ ne anlenkɛ kpole ne anzi. Yemɔti ɛdoavolɛ ne mɔɔ Sɛlɛvolɛ Kpanyinli ne ze ye kpalɛ la ziale ɔ nzi hɔdendɛle hilele bɛlɛra ne mɔɔ gyi anuhɔlɛ ɛkɛ ne la na ɔvale Pita ɔwolole. 17Bɛlɛra ne mɔɔ gyi anuhɔlɛ ɛkɛ ne la zele Pita kɛ, “Wɔmɔ, se ɛle nrenya ne ɛdoavolɛma ne mɔ anu ko.”
Pita buale kɛ, “Kyɛkyɛ, memboka nwo.”
18Ɛnee maanle nu yɛ ɛyɛlɛ kpalɛ la ati, sonvolɛma nee sinzavolɛma ne ɛhua senle na bɛgyigyi nwo bɛlɛte. Pita ɔdaye noko ɔhɔgyinlanle bɛ nwo ɛkɛ ne kɛ ɔte senle ne bie.
Sɛlɛvolɛ Kpanyinli ne bizebiza Gyisɛse edwɛkɛ
(Mat 26.59-66; Mak 14.55-64; Luk 22.66-71)
19Sɛlɛvolɛ Kpanyinli ne bizebizale Gyisɛse edwɛkɛ mɔɔ fane ye ɛdoavolɛma ne nee ye ngilehilelɛ ne anwo. 20Gyisɛse buale ye kɛ, “Dahuu metendɛ baguase, meyɛ me ngilehilelɛ ne wɔ nyianu azua ne mɔ anu nee Ɛzonlenlɛ Sua ne anu, ɛleka mɔɔ Dwuuma yia nu mekɛ biala la. Metɛkanle edwɛkɛ biala wɔ fealera nu. 21Na duzu ati a akee ɛlɛbizebiza me kpuyia ɛhye mɔ ɛ? Biza menli mɔɔ diele me la. Biza bɛ maa bɛha mɔɔ menganle la bɛhile wɔ; bɛze mɔɔ menganle la amuala.”
22Gyisɛse hanle ɛhye la, sinzavolɛma ne mɔ anu ko bɔle ɔ nzo nu na ɔzele ye kɛ, “Ɛ nye ɛnzɔ sonla; ɛtendɛ wɔahile Sɛlɛvolɛ Kpanyinli ne a, anrɛɛ dwenle nwolɛ!”
23Gyisɛse buale ye kɛ, “Saa meha ɛtane a, ɛnee ka mɔɔ ɛdele la maa awie biala mɔɔ wɔ ɛke la ɛde bie. Na saa mɔɔ meha la le nɔhalɛ a, ɛnee duzu ati a ɛbɔle me a?”
24Anase akee manle bɛvale ye, kɛmɔ bɛkyekyele ye bɛ nee ye rale ala la, bɛhɔmanle Kayafase, mɔɔ ɛvolɛ ne anu ɔle Sɛlɛvolɛ Kpanyinli la.
Pita kpo Gyisɛse bieko
(Mat 26.71-75; Mak 14.69-72; Luk 22.58-62)
25Pita gyi senle ne anwo ɛlɛte la, menli ne mɔ ko bizale ye kɛ, “Na wɔmɔ, tɛ nrenya ne ɛdoavolɛma ne ko a le wɔ ɔ?”
Na Pita zale na ɔhanle kɛ, “Kyɛkyɛ, memboka bɛ.”
26Sɛlɛvolɛ Kpanyinli ne akɛlɛ ko mɔɔ ye awie a le nrenya ne mɔɔ Pita pɛle ɔ nzo la zele kɛ, “Na tɛ wɔmɔ a menwunle wɔ kɛ ɛ nee ye wɔ tola ne anu la ɔ?”
27Pita buale kɛ, “Medame? Kosoɛ, tɛ me ɔ!” Na ɛkɛ ne ala akɔlɛ bɔle.
Gyisɛse gyi Paelɛte anyunlu
(Mat 27.1-2,11-14; Mak 15.1-5; Luk 23.1-5)
28Bɛvale Gyisɛse bɛvile Kayafase sua nu na bɛ nee ye hɔle Wulomu amɛnlado ne suakunlu; ɛnee asɛɛ maanle nu ɛtete. Dwuuma ne angɔ amɛnlado ne suakunlu ɛkɛ ne bie, ɔboalekɛ ɛnee bɛkulo kɛ bɛsie bɛ nwo bɔkɔbɔkɔ, kɛmɔ bɛ ɛzonlenlɛ ne kile la, amaa bɛanyia adenle bɛali Akpabɛnwo Ɛvoyia aleɛ ne bie. 29Paelɛte vindele rabizale bɛ kɛ, “Duzu ɛtane a sonla ɛhye ɛyɛ a?”
30Bɛbuale ye kɛ, “Saa ɔtɛtonle mɛla a anrɛɛ yɛnrɛva ye yɛnrɛrɛlɛ wɔ.”
31Paelɛte zele bɛ kɛ, “Ɛnee bɛdabɛ bɛva ye bɛhɔ bɛhɔli ye edwɛkɛ, kɛmɔ bɛ mɛla ne se la!”
Dwuuma ne buale kɛ, “Bɛmɛ Wulomuma bɛ mɛla ne ɛmmaa yɛ adenle yɛmbua awie fɔlɛ yɛngu ye.” 32#Dw 3.14; 12.32 (Ɛhye zile, amaa Gyisɛse edwɛkɛ ne mɔɔ ɔhanle wɔ ye ewule nwo la ayɛ nɔhalɛ.)
33Paelɛte ziale hɔle ɛleka mɔɔ Gyisɛse wɔ la na ɔbizale ye kɛ, “Wɔmɔ a ɛle Dwuuma belemgbunli ne la ɔ?”
34Gyisɛse buale ye kɛ, “Ɛnee kpuyia ɛhye vi ɛdawɔ wɔ ɛkɛ ne anzɛɛ awie mɔ yɛɛ ɛha ye me nwo ɛhile wɔ a?”
35Paelɛte buale ye kɛ, “Ɛdwenle kɛ mele Dwuunli ɔ? Ɛdawɔ wɔ menli ne nee bɛ sɛlɛvolɛ mgbanyinli yɛɛ ɛva wɔ ɛrɛlɛ me a. Duzu debie a wɔyɛ a?”
36Gyisɛse buale ye kɛ, “Me belemgbunlililɛ ne ɛnle ewiade ɛhye anu; saa me belemgbunlililɛ ne wɔ ewiade ye anu a, anrɛɛ me ɛlɔnema kɛho kɛmaa me na bɛnrɛmaa bɛnrɛva me bɛnrɛmaa Dwuu mgbanyima ne mɔ. Kyɛkyɛ, me belemgbunlililɛ ne ɛnle ɛke.”
37Paelɛte zele ye kɛ, “Se ɛnee ɛle belemgbunli o!”
Gyisɛse buale ye kɛ, “Ɛdawɔ ɛse mele belemgbunli. Na ɛhye ala ati yɛɛ bɛwole me bɛmanle membale ewiade ye anu a, kɛ membanli nɔhalɛ ne anwo daselɛ. Mɔɔ le nɔhalɛ ne ɛdeɛ la tie mɔɔ meka la.”
38Paelɛte bizale kɛ, “Duzu a le nɔhalɛ ne?”
Bɛbua Gyisɛse ewule fɔlɛ
(Mat 27.15-31; Mak 15.6-20; Luk 23.13-25)
Paelɛte eza vindele doale Dwuuma ne wɔ gua ne azo nehane na ɔzele bɛ kɛ, “Mennwu debie mɔɔ yemɔti ɔwɔ kɛ mebu sonla ne ewule fɔlɛ a. 39Na bɛ amaamuo ne kile kɛ, saa bɛbali bɛ Akpabɛnwo Ɛvoyia ne a ɔwɔ kɛ medwula pilizanli ko memaa bɛ. Bɛkɛhulo kɛ menwɔdwula Dwuuma Belemgbunli ne menwɔmaa bɛ ɔ?”
40Bɛdeɛdeanle nu bɛbuale kɛ, “Kyɛkyɛ! Yɛmkpondɛ ye! Yɛkpondɛ Balabase.” (Balabase le maamɔvo.)
Bible in Nzema © Bible Society of Ghana, 1998.