Mateo 25
25
Asuungu ya maano na aasofu
1“Apano uweene-wa-mwiyulu ulukolana na asuungu ikumi, yano yatoshile yatala yao, yafuma ukukomenganya siwinga. 2Yasano pali yao yali ifiwele-wele, na yasano aya maano. 3Ifiwele-wele fiyo fyaseensile yatala yao naanti kuseenda amafuta. 4Leelo yaaya aya maano yasensile amafuta um-misasi yao poonga na yatala yao. 5Na pano siwiinga washiimba, yooshi yanshiishila, yalala utulo. 6Leelo ushiku apakashi kwaawa ichoongo: ‘Siwinga wisa; fumini mukankomenganye!’ 7Liyo kwene yankatuka asungu yaya yoshi, yachita ningo itala shao. 8Ifiwele-wele fifi fyanena aya maano. fyaati: ‘Tupini amafuta yino mache, kuno itala shiitu ziluzima. 9Leelo yao aya mano yayanena, yaati:
‘Awe, yachepa kuli sweeswe neemwe; yangini kuli yakakasha, mukakale.’ 10Nga pano yao yapitaanga ukuyukala, shiwiinga wisa, nayo yano yalipo yamwingila ponga nawe un-ntiyo, yayala nu nnyaango. 11Apano asuungu aniina yiisa, yaati: ‘Mweene, mweene! Tuyulile!’ 12Leelo wayaneena, waati: ‘Mweneemo ndumuneena: ntamumanyile mweemwe.’ 13Ichino mutachilala, kuno mutamanyile ili naanti waanda.
Unnumbe wa talanta
(Lk 19:11-27)
14“Chili wa nndumbe wa ntu wino alushita aye ku masi, wishile aomfi yaakwe, asêka uku yakola ifyuma vyaakwe. 15Apa wenga italanta shisaano na weenga italanta shiyili, na weenga italanta yoonga, chila ntu uku maka yaakwe; wampita. 16Liyo kweene wino wasêkilwe talanta shiisaano, wampita, waya washichuchusha, wongelesha ishiniina chisaanano. 17Fiyo kweene nu wi shiyili; nawe kweene wongelesha shiyili. 18Leelo wiiwi wino wasêkilwe yoonga, wayiile afukoola apaasi, afisa italanta ya mweene waakwe. 19Pano amaanda yafula, awisa umweene wa aomfi yao, asolosha poonga nayo. 20Awisa wiiwi wino wasêkilwe talanta shisaano, waleta ni talanta shisaano, waati: ‘Mweene, wasêkile kuli neene talanta shisaano, lola, talanta shiinina shisaano shino nafyasha.’ 21uMweene waakwe wanneena, waati: ‘Wachita niingo, umuofi nsiipe nu wa kutailwa. Wali wa kutailwa ku ifiintu fiche; nankuwiika apa fifusu; wingila un-kuchimba kwa mweene wako.’ 22Awisa na wiiwi wino wasêkilwe talanta shiyili, waati: ‘Mweene, wasêkile kuli neene talanta shiyili, lola, talanta shinina shiyili shono nafyaasha.’ 23uMweene waakwe wannena, waati: ‘Wachita niingo, umuofi nsiipe nu wa kutailwa; wali wa kutailwa ku ifiintu fiche, nankuwika apa fifusu; wingila un-kuchimba kwa mweene waako.’ 24Awisa na wiiwi wino wasêkilwe italanta yoonga, wafwaanga, waati: ‘Mweene, namanyile fino weewe ntu wino watala, ukukumbula pano utapesile, ukukonganika pano utasambashishe. 25Ichino nofile, naya naifisa italanta yako apansi; tola ili yako.’
26“Lelo mweene waakwe wannena, waati: ‘We momfi unjifu nga wenkosu; wamanyile fino nkukumbula pano ntapeshile, ndukonganika pano ntasambashishe. 27Chasifile fino wali upe yano yaluchuchusya, na pano nisa nali njisana iya kwane na yino yongeleziwa, 28Ichino mpokini talanta iyo, mpini wino ali nazyo italanta ikumi. 29Kuno weeshi wino ali na chimwi, alupiwa nu kongeleshiiwa tupu; leelo wino atakwiite chimwi, na chino ali nacho kweene alupokwa. 30Nu momfi wiyo atasifile, msumbini ukutali ukuufika uku chaanda; ukuno akalililaange nu kuchecheta amiino.’
uWanda wa uputushi
31“Pano wacha wiisa Mwaana-ntu um-ukulu waakwe, na yamalaika yooshi poonga nawe, apano alwikala apa chisumbicha-ukulu waakwe. 32Na aantu yooshi yalukongana panali, nawe aluyapalula, ndi fino unchemi akulupalula infwele ni mpwata. 33Aluwika ifweele ikasa lyaakwe ilya kwiluunji, ni mpwata ikasa ilya kuli kamani. 34Apano uMwene aluneena yaalye yano yali ukwikasa lyaakwe ilya kwilunji: ‘Nguni, yano mwapepelelwa na Taata, pyanini uweene uno mwawikilwe kali ukufuma ukulengwa kwaasi. 35Kuno nali ni isala, mwampa ichakulya; naali nu unsala, mwanwesha; nali mweni, mwambulila. 36Nali tupu, mwanswika; naali undwale, mwisa mwansungula; nali uku nyololo, mwisa mundola.’ 37Apano aya chumi yalunnena, yaati: ‘Mweene, ili lino twakuwine uli ni nsala, twakupa ichakulya; naanti uli nu nsala, twakupa ichakunwa? 38Na kayili, ili lino twakuwiine we mweeni, twakuulila naanti uli tupu, twakuswika? 39Na kayili ili lino twakuwiine we ndwale naanti uku nyololo, twisa twakulola?’ 40Nu Mweene aluyanena, ati; ‘uMwenemo ndumunena Fino mwachitile umwi pali yao achaane anoono, mwanchitile neene.’ 41Apano aluneena na yalye yano yali ukwikasa lyaakwe ilya kuli kamani, aati: ‘Tinini panondi, yano mwatipwilwa, yangini um-mooto wa maanda ti, uno wawikilwa Chiwa na yamalaika yaakwe. 42Kuno naali ni sala, mutampa ichakulya, naali nu nsala, mutampa ichakunwa. 43Naali mweeni, mutambulila, naali tupu, mutanswika, naali undwale nu ku nyololo, mutise mundole.’ 44Apano nayo kweene yalulaanda, yaati: ‘Mweene, ili lino twakuwiine weewe uli ni sala naanti uli nu nsala, naanti we mweeni, naanti uli tupu, naanti we undwale, naanti uku nyololo, tutise tukulole?’ 45Nawe aluyaneena, ati: ‘Umwenemo ndumuneena: fino mutachitile weenga pali yao anoono, mutanchitile neene.’ 46Na yao yalupita ukuyu wingila um-machuulo ya maanda ti leelo aya chuumi yaluya um-upuma wa maanda ti.”
New Testament in Fipa © United Bible Societies, 1988. Bible Society of Tanzania.