JOHAN TÜNNAK
TÜNNAK
Johan ah guk ah ng’Thu Ni ung Bawipa Jesuh cu “Chang ah yung tüi law ne ang täih ah na om püi gui ciah, Khanpughi ah ng’Thu ah kyak ci” cik ci.
Ca uk a mät naw am dang nak ung “Shin ah Thu Ni guk ah a mawng cu, Bawipa Jesuh cu, shaitaak ah Hunbawi la Khanpughi ah Htapa ah kyak ci,” ciah, chang gui naw yum u netah, yum ciah chang phung naw ghin nak ami gah vai ah hmawk ah kyak ci. (20:30)
Tünnak awn ah, Bawipa Jesuh cu Khanpughi ah angtäi ghin nak ng’Thu ah kyak ci,” ciah m’dang netah, Bawipa Jesuh cu shaitaak ah Hunbawi la Khanpughi ah Htapa ah a kyak ah mawng, cäicat aih gui vai awn am dang nak cu, va leng ne guk ci. Cun tawi nak ah cäicat gui vai abi cu, chang gui naw ami hmat vai ah m’dang ne gu ba ci. Cun kawn ah Bawipa Jesuh yum ne a hnu ah läk ci gui la, kä yum ne maa nak ci gui ah a mawng cu gu ba ci. Akdäm 13-17 ung ami phaa vai mü, Bawipa Jesuh cu angdüihpüi gui awn ang täng ah ng’bum u netah asih law vai ah mawng am cäi nak gui la, k’thagui a peit nak gui cu gu ba ci. Cun kawn ah Bawipa Jesuh ami phaa ah mawng, ami ngawn ah mawng, sih nak ungka a thawh ba ah mawng la, angdüihpüi gui ah ma ah ang dang ba gui cu, gu ba ci.
(8:1-11) ung Pawmyau ciah hnumi ah mawng cu, kut awn ami guk htük gui la ami k’phlan htük gui ung kä om sei phi, a hei gui ung om ci kyasei, m’küüp nak awn guk ah kyak ci.
Johan naw Bawipa Jesuh Khrit ung, angtäi ghin nak gah ah mawng, am geinsei nak ah mawng, Bawipa Jesuh cu lam, ng’düngnak la ghinnak ah a kyak ah mawng gui cu, ng’dang pi khai ah guk ci.
Johan ah guk ani nak pi cu, chang gui naw ami hmuhmat yäi vai ah, tui, m’htut, akdei, htoshäm, la hto, sapyit la am theih, gui ni awn amtumtäng nak cu dang khai ah a guk nak ah kyak ci.
Amawng Aktawi Gui
Tünnak 1:1-18
Tuihnim Johan la Bawipa Jesuh ah ang düihpüi ma gui 1:19-51
Bawipa Jesuh ah Bi bi ah mawng 2:1—12:50
Jerusalem la a pei yung ah akhnu ah bi abi nak 13:1—19:42
Sihnak ungka a thawh ba nak la ang dang ba nak 20:1-31
Khümnak: Kalile ah ang dang ba nak 21:1-25
Cho Bible Common Language © Bible Society of Myanmar, 2016.