JON 1
1
N-ndumwa mu Uraiŋ
1N-ndumwa ma ata mu namba taa nu umozhigo, n-ndumwa ma ata mu namɛ na Agwatana, n-ndumwa ma ata mɛ shɛ Agwatana. 2N-ndumwa ma ata kaa mu namba na Agwatana taa nu umozhigo. 3A njɛ iyi elele kpaaŋ tedure nu bwa, i zasa iyi elele nɛ aa njɛ uzawa ubwa o. 4Tedure nu bwa kaa uraiŋ namɛ, ibɛ uraiŋ ata ụ shɛ uhioko-uhwaŋna wa atwa. 5Uhioko-uhwaŋna ata wa ta na amɛ tishi, tishi kaa tụ lasụ sụ ụŋ o.#1:5 tishi kaa tu lasụ sụ uŋ o: Kwo kaa tishi kaa tu 'wericinji shi uŋ o. Tɛjɛshɛrɛga tu ko ti hiɛŋ, tishi kaa ti eshiciji shi uŋ.
6Bụtụ bu ko namba Agwatana tumwanɛ utumwa, na ɛɛ hiɛŋ izeci ibwɛ ga Jon.#Mat 3:1; Mak 1:4; Luk 3:1,2 7Ubwa zhajɛ iwɛ maa la uhioko-uhwaŋna ata tiseyida, iwɛ maa atwa kpaaŋ tɛtana-rishe tedure iwɛ tiseyida tu bwa. 8Shɛ ubwa ni ikɛnyi ibwɛ i shɛ uhioko-uhwaŋna ata o, ama bi zhajɛ iwɛ maa la uhioko-uhwaŋna ata tiseyida kiri.
9Uhioko-uhwaŋna u tɛkana namba na wo hiokono atwa elele na e ci nu unyizo ga uhwaŋna. 10Ubwa namɛ nu unyizo, aa njɛ kaa unyizo tedure nu bwa, ama unyizo kaa mepi shi bu waa. 11Ubwa zhajɛ no ofwo atwa ubwa, ama atwa ata ubwa kaa le shi bu o. 12Ama gana na tu ufwugwo wa atwa na le bu, a na kaa tɛtanɛ bụ rishe namɛ, aba bee peni ụhwada maa a shɛ miaụŋ ma Agwatana. 13Miaụŋ ma Agwatana mu na aa shɛ mi beni shi na masha ma butugwumwa o, okwo nu ukwulana usunda-tu'waba kwo kaa nu ukwulana butubwenyi o, ama Agwatana ubwa meci aŋ.
14N-ndumwa ma ata mɛ jɛshɛrɛjɛ maa shɛ butugwumwa, moo zokwu na ashashɛ tu. Tụ kwụbɛ ụjɛrụma ubwa na tu baa shɛ Yɛu mokondo#1:14 mokondo: Kwo kaa bwooko gba. nɛ banɛ no olugwo Bishi bwa. Tulubo-ti-biye keeni iwɛ-tɛkana shini na amɛ ubwa.
15Ga Jon zhajɛ la bee le bu tiseyida, na aka na baa uganɛ, bɛɛ hiɛŋ, Bụtụ ganana Ngaa jɛmɛ la iwɛ ubwa, Ngɛɛ hiɛŋ, Bụtụ na be ci ba ne ekwunyi mi, ubwa n hwuri, iwɛnɛ tu baa namwawaŋ nazhɛ ee m meci.
16Hwɛɛ tu ti leshiji uwebiye nɛ banɛ no tulubo-ti-biye tu bwa tu na ti shini na tumama 'wanu na ti nya. 17Agwatana duricinje Undwa ubwa no Moses, ama bu duricinje tuba tulubo-ti-biye keeni iwɛ-tɛkana ne Jisus Krast. 18I zasa bụtụ na kwụbwa Agwatana kwukwuŋ, semi Yɛu ibwɛ mokondo#1:18 Yɛu ibwɛ mokondo: Tɛjɛshɛrɛga tu ko ti hiɛŋ, Yɛu ibwɛ mokondo nɛ shɛ Agwatana gom. nɛ namɛ kpɛmi kpɛmi ne Bishi bwa, ubwa ti mbiseni gana na Agwatana shɛ.
N-ndumwa mu na ga Jon Bɛnjɛ-bu-ubaptizim ba Ananga
(Mat 3:1-12; Mak 1:1-8; Luk 3:1-18)
19Ga Jon le tiseyida na aka na te Eju na namɛ nu Jɛrusalɛm tumwanɛ onongbo keeni Alivai utumwa, te e unseni bu, ɛɛ hiɛŋ, Gaaba kwuŋ abɛ shɛɛ?
20Ga Jon teri shi ashamanjɛ o, ama bi leni nu unu ubwa kpataa, bɛɛ hiɛŋ, Shɛ Gamba n shɛ ga Krast ata o.
21Ee unseni bu, ɛɛ hiɛŋ, Asha gaaba kwuŋ abɛ shɛ yɛɛ? Gabụ suu bɛ shɛ ge Elaija?
Bɛɛ jishijɛ aŋ, bɛɛ hiɛŋ, Shɛ Gamba o.
Asha bigesere suu abɛ shɛ?
Bɛɛ hiɛŋ, Awo.#Undwa 18:15,18; Mala 4:5
22Ee heŋteni bu, ɛɛ hiɛn, Asha gaaba kwuŋ abɛ shɛ yɛɛ, imbe kwuŋ abɛ jɛmɛ iwɛ uhiuhiu buu? Iwɛ maa ta pana atwa na utu tumwanɛ utumwa ajɛshɛgwa.
23Ga Jon jishijɛ aŋ tedure nu n-ndumwa ma ata ga Ayizaya bigesere 'nywotwo la, bɛɛ hiɛŋ,
Gamba n shɛ rụhwụ ra bụtụ ata ba ugaga nụ ụshɛka, ri hiɛŋ,
Hangana ma Agwangwama uhwaŋna u tukpororo! #Ayiz 40:3
24Atumwa ata a na Afarisi ga tumwanɛ 25heŋteni Jon, ɛɛ hiɛŋ, Asha iwembe po aba nda atwa ubaptizim, ta abɛ shɛ shɛ kaa ga Krast, kwo kaa ge Elaija, kwo kaa bigeseree?
26Ga Jon jishijɛ aŋ, bɛɛ hiɛŋ, Ma nda atwa ubaptizim ne meni, ama Bụtụ bu ko shikeni ba na ashashɛ hiŋ na ehi te mepi shi. 27Ubwa shɛ bụtụ na be ci ne ekwunyi mi, N lanɛ shɛ maa Mo tufwurungo okwo ihwehwe ya abida ubwa o. 28Ijɛ hwɛɛ njɛ ni Bɛtani hileniye Urefu Jodan, no ofwo ata ga Jon ba nda atwa ubaptizim.
Yɛu-ụgwụdụ ya Agwatana
29Ti iyi heri, ga Jon kwụbɛ Jisus ti bee ci pu bwa, bɛɛ hiɛŋ, Hioko ma, Yɛu-ụgwụdụ ya Agwatana nɛ yo sugo iwɛwɛ ya atwa unyizo! 30Bụtụ ganana Ngaa jɛmɛ la iwɛ ubwa, Ngɛɛ hiɛŋ, be ci ba ne ekwunyi mi, bu n hwuri, iwɛnɛ tu baa namwawaŋ nazhɛ ee m meci. 31M mepi shi bu o, ama N zhajɛ Ama nda atwa ubaptizim ne meni, iwɛ maa atwa Isrɛl mepi bu.
32Ga Jon le tiseyida, bɛɛ hiɛŋ, N kwụbɛ ta Mpiala mu banɛ na azuba gana ikwucime maa patanɛ bụ. 33N nge mepi shi bu o, ama bụtụ ata n tumwanɛ maa ma nda atwa ubaptizim ne nemi, ubwa m mbishi, bɛɛ hiɛŋ, Bụtụ ata abu kwụbɛ ta Mpiala mu zwe maa patanɛ bụ, asha ubwa zhɛ ba nda atwa ubaptizim na Mpiala mi Tijilo. 34N kwụbwa ya ni ikɛnyi mi, Ngoo lowo kaa tiseyida maa ubwa shɛ Yɛu ya Agwatana.
Eseshi-iyi ehiiŋ a Na 'Wa La Jisus
35Ti iyi heri sasana nyajita, ga Jon shikeni ne eseshi-iyi ubwa eyebi. 36Baa ngbaracɛ Jisus ti bɛɛ zhɛ, bɛɛ hiɛŋ, Hioko ma Yɛu-ụgwụdụ ya Agwatana.
37Eseshi-iyi ata ubwa hwụjɛ iwɛ ɛtɛ baa jɛmɛ, ibɛ po aa 'wa Jisus. 38Ti ge Jisus mbiyanɛ ekwunyi, baa kwụbɛ aŋ ta a 'wa bụ, bee heŋteni aŋ, bɛɛ hiɛŋ, Imbe bwa ahia jalakakaa? Ɛɛ jishijɛ bụ, ɛɛ hiɛŋ, Rabɛi, (nɛ ecilo ibɛ i shɛ, Bimbisegeni), ce abɛ jɛjɛɛ?
39Ge Jisus jishijɛ aŋ, bɛɛ hiɛŋ, Zhajɛ ma, hiɛ kwụbɛ. Ee zhe ga, aa kwụbɛ ofwo ata baa jɛjɛ, aa jɛjɛ du nu bwa jita ata. Aka ata shɛ aka bo ogogo eneshi nu uwaŋna ụrụmɛ.
40Ga Andru yɛu-bino Saimon Pita, shɛ bụtụ bu ko na atwa ata eyebi a na hwụjɛ iwɛ ɛtɛ ga Jon jɛmɛ, a na kaa 'wa Jisus. 41Ubwa to yɛu-bino bwa ugbe hiiŋ, bɛɛ hiɛŋ bụ, Tu towo Mɛsaya (nɛ ecilo ibɛ i shɛ Krast) ugbe. 42Bɛɛ zɛrijɛ Saimon pi Jisus.
Ge Jisus ngbaracɛ Saimon, bɛɛ hiɛŋ bụ, Gabụ ɛɛ hiɛŋ, ga Saimon, yɛu Jon. Ɛ zhɛ ɛ bi hiɛŋ ya ge Kifas (nɛ ecilo ibɛ i shɛ Pita).#1:42 Pita: Tɛjɛshɛrɛ ga tu ko ti hiɛŋ Kifas. Egini ibɛ hwɛɛ a shɛ utayɛ.
Ge Jisus Suyanɛ Filip Nazhɛ baa Suyanɛ Nataniɛl
43Ti iyi heri, ge Jisus ba jala maa zha Galili, baa kwụbɛ Filip, bɛɛ hiɛŋ bụ, N 'wa.
44Ge Filip banɛ ni Bɛtɛseida, ụshɛpwụ uko uko na Andru keeni Pita. 45Ge Filip kwụbɛ Nataniɛl, bɛɛ hiɛŋ bụ, Tu kwụbwa bụtụ ata go Moses 'nyeci la iwɛ ubwa nu utakada Undwa, bu gata egesere du 'nyeci iwɛ ubwa, ubwa shɛ ge Jisus, bụtụ bu Nazarɛt yɛu Josɛf.
46Ga Nataniɛl heŋteni Filip, bɛɛ hiɛŋ, iyi ibiye ye elele eri ya banɛ nu Nazarɛt hŋ?
Ge Filip hiɛŋ bụ, Zhajɛ kwụbɛ.
47Ge Jisus kwụbɛ Nataniɛl ti bee ci pu bwa, bɛɛ hiɛŋ, Hioko ma bụtụ bi Isrɛl gom na, bu zasa i'inswɛ na amɛ ubwa o.
48Ga Nataniɛl heŋteni Jisus, bɛɛ hiɛŋ, Ce bwa ebi m mepii?
Ge Jisus jishijɛ bụ, bɛɛ hiɛŋ, M bụ kwụbɛ te bi shikeni nu ucilo uwowo, nazhɛ ge Filip ubu suyanɛ.
49Ga Nataniɛl jishijɛ bụ, bɛɛ hiɛŋ, E-Bimbisegeni, gabụ bɛ shɛ Yɛu ya Agwatana! Gabụ kaa bɛ shɛ du Agwuma Isrɛl!
50Ge Jisus jishijɛ bụ, bɛɛ hiɛŋ, Iwɛnɛ Ngɛɛ bi hiɛŋ, M bụ kwụbɛ te ebi shikeni nu ucilo uwowo hŋ upo abu tɛtanɛ-rishe?#1:50 nu ucilo uwowo hŋ upo abu tɛtanɛ-rishe?: Tɛjɛshɛrɛga tu ko ti hiɛŋ, nu ucilo uwowo upo abu tɛtanɛ-rishe. Inɛ ɛtɛ shɛ shɛ iheŋtene o. Bi tɛ zhɛ ba kwụba inɛɛ nɛ uhwuri inɛ ɛtɛ. 51Nazhɛ ge Jisus hiɛŋ bụ, Iwɛ-tɛkana Omo hi mbiso, hi tɛ zhɛ hia kwụba ta azuba bagwụ, atumwa Agwatana a na namɛ na azuba o mungo, ee zweeneni nu uhiuhiu Yɛu Bụtụ.#Umoz 28:12
Rubassa Bible © Bible Society of Nigeria, 2008