Yahwana 4
4
Yesu Ka Mwala Samariya
1Mjir Farisi ku sə nggata abbər Mthlaku Yesu akwa wutə mjir thlipə hangta Yahwana, tsuwa tsa akwa hara ala ɗa baptizma. 2Amma Yesu ka kərari aɗi hara baptizma aka mdə wa, mjirthlipərni an akwa harari daci. 3Sakatə Yesu ku nggatə su tə mji pəla ni, antə tsa zhar tsəɗi Yahudiya ka jaktə ngka akwa tsəɗi Galili. 4Akwa saka ngəni ku ndzi dwali ka Yesu təramta akwa Samariya.
5Antə akwa Samariya ni, tsa mwari akwa di laga ka thləmari Sukar kudzəhə ka vəi laga natə Yakub hamta aka ɓzərni Yusuf. 6Jiɓər Yakub aɗi akwa vəi ngəni. Sakatə Yesu ku ghəra akwa mwa ni, antə tsa ndzəndzi ata mnya jiɓə ni. Su ngəni hara akwa sakatə pci abaka hara təpkər.
7Sakatə mwala Samariya laga ku si ata mnya jiɓə ni kamnyar kəi yimi, antə Yesu pəla alari, “Na ali yimi kəi sa bu.” 8Kamnyar mjirthlipərni ku təra ləkwa kuta di ra masə susəma.
9Antə mwala ni shinau alari ka pəla, “Gə mdər Yahudi, tsuwa I mwala Samariya, apa madi tə ga ata yu yimər sa akəli ri?” Kamnyar su aɗi na paktə mjir Yahudi ka mjir Samariya wa. 10Antə Yesu shinau alari ka pəla, “Ma ga an səndə cautə tə Hyel akwa bara na ala ga, ka səndə mdə na akwa pəla ala ga abbər ni yimi kəi sa ni, sakani ga ata kiɗə ni ka tsa na ala gə yimər mpika.”
11Antə mwala ni pəla, “Zanuwa, ga aɗi ka sur kətsari wa, tsuwa jiɓə ni zurang. Ama antə ga ata wutə yimər mpikə nə ri? 12Gə təramta kəkar yeru Yakub ka olkur ya, tsa na hamta ala yeru jiɓə ngəni ni natə tsa ka kərari, kəga maɗa'ni, ka mwaɓiyayeri arni shang ku sa ni?”
13Antə Yesu shinau alari ka pəla, “Kəlara mdə na ata sa yimi ngəni, thləli ata jaktə kətə ni ka damwa. 14Amma kəlara mdə na ata sa yimi tə I ata na alari ni, yimi ni ata ndzi akwa dzari apa kucirkila na ata hwi, ka hamta alari mpikə na akur wa.”
15Antə mwala ni pəla alari, “Zanuwa, ni yimi ngəni, kamnyar ta thləli asə jaktə kətə ra, wala jaktə sə kə yimi azi.”
16Antə Yesu pəla alari, “Mwari kara kəga salngkiri ka giri si.” 17Antə mwala ni pəla alari, “I aɗi ka sal wa.” Antə Yesu pəla alari, “Gə ka jiri tə gə pəla abbər ga aɗi ka sal wa ni. 18Kamnyar ga ku kəl sal ka ntəfu, antə mdə tə giri ka tsa kulini ni aɗi salngkiri wa, antə ngəni ga ku pəla ali jirkur.”
19Antə mwala ni pəla alari, “Zanuwa, I ku nggaɓəla kulini abbər ga an naɓi. 20Kəkayeri ar yeru ana vəngkər səli ata gar ngəni, amma giri na mjir Yahudi pəla abbər, Urushalima an vəi tə ka mji vəngkər səli aka Hyel akwa.”
21Antə Yesu pəla alari, “Mwala, kələngkər aka su tə I akwa pəlari ni, kamnyar saka ata si tə mji aɗi ata sə vəngkər səli aka Tədda ata gar ngəni wala akwa Urushalima wa. 22Giri na mjir Samariya, giri ana vəngkər səli aka su tə giri aɗi səndə wa, amma yeru na mjir Yahudi, yeru asəndə mdə natə yeru ana vəngkər səli alari, kamnyar mbantədzi si atar mjir Yahudi. 23Amma saka ata sə hara, ku kurtə hara ma, sakatə mjir vəngkər səli na jirari ata vəngkər səli aka Tədda atar mambəl ka akwa jirkur. 24Hyel an Mambəla, antə mji na ata vəngkər səli alari, tar ka da vəngkər səli atar Mambəl ka akwa jirkur.”
25Antə mwala ni pəla alari, “I ku sənda abbər Almasihu ata si, mdə tə mda ana kəga ni Kristi. Antə ma sakatə tsa ku si tsa ata sə pəla ala mburu shanga su.” 26Antə Yesu shinau alari ka pəla, “I na akwa gari ka gə ni, I an tsa.”
27Tsu ata saka nda antə mjirthlipərni ngka adzə ni, ka ndatədzi kamnyar wutə ni akwa gari ka mwala ni. Amma mda aɗi akwa nca ɗa na pəla aka mwala ni abbər, “Man tə ga akwa barari ri wa,” wala yu ni abbər, “Kamnyar mi tə ga akwa gari ka mwala ni ri wa.”
28Antə mwala ni zhar tughum kə yimərni, ka ngka avi akwa kuta di, ka pəla aka mji abbər, 29“Sər giri, ka giri wutə mdə laga na ku ngkər ali shanga su tə I hara. Nənga ngəni an Kristi nə ri?” 30Antə da ku ləɓəla akwa kuta di ka mwari adzə Yesu.
31Aghəla nda antə mjirthlipər Yesu kiɗə ni ka pəla, “Maləm, səm susəma.”
32Amma tsa shinau ala ɗa ka pəla, “I ka susəma natə giri aɗi səndə wa.”
33Antə mjirthlipərni baɗitə yu nvwa ɗa abbər, “Mda aɗi na ku sənta alari susəma ya?”
34Antə Yesu pəla ala ɗa, “Susəmərna an kəi hara su tə mdə na thlentə ra pəla, kəi kuri kəthlər tə tsa hamta ali ni. 35Giri aɗi ana pəla abbər, ‘Mbil thliya nfwar kambəla mda nthləi mthli wa ya?’ I akwa pəla ala giri, haptə giri nca giri, ka giri wutə fakayeri. Giri ata wuta abbər mthli na akwa fakə ni ku ng'həi akwa bara nthla. 36Mdər nthləi mthli ni andər wutə watsəɓari, ka tsaptə sur fakəu kamnyar mpikə na akur wa, kamnyar ka mdər thləka ka mdər nthləi mthli hara kucali ata kəma duku. 37Kamnyar karapu ngəni an jiri abbər, ‘Mdə laga thləka hwulfa, antə mdə laga an ata sə nthləyari.’ 38I thlentə giri ka giri nthləi mthli akwa fakəu natə aɗi giri an hara kəthlərari wa. Mji damwa an hara kəthlər ni, antə giri səm riɓar kəthlərər ɗa.”
39Antə mjir Samariya hang ku hamta jiri aka Yesu, kamnyar labar tə mwala ni pəla abbər, “Tsa pəla ali shanga su tə I hara,” ni. 40Sakatə mjir Samariya si adzə ni, antə da kiɗə ni abbər ka tsa ɗarndzi adzə ɗa. Antə Yesu ku ɗarndzi adzə ɗa mnyar vir suɗa.
41Antə mji hang damwa ku hamta jiri alari kamnyar gariyirni ni. 42Da pəla aka mwala ni, “Kulini aɗi kamnyar ndərər ngə daci antə yeru hamta jiri nə wa, kamnyar yeru ka kəra yeru ku nggatə ni, antə yeru ku sənda abbər ngəni Mdər Mbantə duniya jiri.”
Yesu Ku Mbantə Ɓzər Mdər Kəthlər Na Ola
43Aghəla tə Yesu ku hara vir suɗa anda, antə tsa təra ka mwari ahar Galili. 44Kamnyar Yesu ka kərari ku ncaɓəla abbər, “Naɓi aɗi ana ndzi ka daraja akwa diyirni wa.” #Mat 13:57; Mar 6:4; Luk 4:24 45Sakatə Yesu ku mzhitə Galili, antə mjir Galili ni dlu ni ka kucali, kamnyar da ma da ku mwari ahar Urushalima akwa Kucalər Fəlɓəla Kəi ni, ka wutə shanga su tə tsa hara akwa sakar susəma ni. #Yah 2:23 46Antə Yesu jaktə ngka ahar Kana na akwa Galili, akwa vəi tə tsa shinantə yimi tə ndzi yimər anap ni. Tsuwa mdə laga aɗi na ola akwa kəthlər ahar Kafarnahum na ka ɓzərni nggawa. #Yah 2:1-11 47Sakatə tsa nggata abbər Yesu ku thlata ahar Yahudiya ka si ahar Galili, antə tsa mwari adzə ni ka kiɗə ni ka tsa ra mbanta alari ɓzərni na ata mnya mta. 48Antə Yesu pəla alari abbər, “Ar giri tar ma giri wutə seɗayeri ka surndatayeri, kambəla giri hamta jiri ya?”
49Antə mdə ni pəla alari, “Zanuwa, mwa təra ja kəmata ɓzərna ni amta.” 50Antə Yesu pəla alari, “Mwari, ɓzər nga aɗi ata mtə wa.” Antə mdə ni ku hamta jiri aka su tə Yesu pəla alari ni, antə tsa təra. 51Sakatə mdə ni akwa lakur ləha antə buɗayeri arni thli kəmari ka pəla alari abbər, “Ɓzər ngə ni ku mbəi.”
52Antə mdə ni yu ɗa abbər, apa saka madi tə ɓzər ni baɗitə hara hərku ri? Antə da pəla alari, “Naha ata saka ntang na təpci antə dzəkdzəku ni zhar ni.” 53Antə baba'ni ɗangta abbər tsu an sakatə Yesu pəla alari abbər, “Ɓzər nga aɗi ata mtə wa,” ni. Antə tsa ka shanga mjir kutakəyirni ku hamta jiri aka Yesu. 54Ngəni an sur ndatə na suɗkur tə Yesu hara aghəla thlatərni akwa Yahudiya ka ngka akwa Galili.
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.