Yahwana 20
20
Yesu Ku Thlata Akwa Mtəmta
(Mat 28:1-8; Mar 16:1-8; Luk 24:1-12)
1Ɗəɗəpə mbing ar vir na ntangkəma akwa sati, antə Maryamu Magdalin mwari adzə kul ni sakatə kuthlu tsu aɗi, ka wuta abbər mdə ku mbwaləmta pela na ata mnya kul ni. 2Antə tsa hwi ka mwari adzə Siman Bitrəs ka mdərthlipə natə Yesu hir ni ni, ka pəla ala ɗa, “Da ku kəɓəla Mthlaku akwa kula, tsuwa yeru aɗi səndə vəi tə da vəi ni ata wa!”
3Antə Bitrəs ka mdərthlipə na dukwari səɓəla ka baɗitə mwari adzə kul ni. 4Japwa ɗa putə hwi, amma mdərthlipə na dukwari ni dlu kəma akəla Bitrəs, ka mzhitə kul ni ntangkəma. 5Antə tsa nggyarghəidzi ka wulhə kuta kul ni, ka wutə yadər lilin ni apwi ni, amma tsa aɗi ləkwa kul ni wa. 6Antə Siman Bitrəs si aghəla ri, ka ləkwa kul ni, ka wutə zhaɓər lilin ni apwi. 7Tsuwa tsa ku wutə zhaɓi tə mdə pungkər aka kərari ni apwi pərpərari akwa vəi laga shini. 8Antə mdərthlipə na dukwari, na mzhitə kul ni ntangkəma ni, ləkwa kul ni tsuwa. Antə tsa wutə tsuwa ka hamta jiri. 9Amma har ba kulini da aɗi nggaɓəla ndər na akwa kakaɗər Hyel na pəla abbər dwali ka Yesu thlata akwa mtəmtə nə wa. 10Antə mjirthlipə nayeri ni jaktə ngka aviyar ɗa.
Yesu Ku Ncantə Kərni Aka Maryamu Magdalin
(Mat 28:9-10; Mar 16:9-11)
11Amma Maryamu ku thləthlata aɓəla adzə kul ni akwa tuwa. Sakatə tsa akwa tuwa ni, antə tsa nggyarghəidzi akwa wul kuta kul ni. 12Antə tsa wutə mjirthlentərhyel laga suɗa ka ləptu mwapmwapu, andzəndzi akwa vəi tə mdə peri mshiyir Yesu ata ni, pal abwa kərari ka palari abwa səlari. 13Antə da yu ni abbər, “Mwala, kamnyar mi tə ga akwa tuwa ri?”
Antə mwala ni pəla ala ɗa, “Kamnyar da ku kətə Mthlakərna ka təra kəgari, tsuwa I aɗi səndə vəi tə da vəi ni ata wa!”
14Tsa akwa kuri gari ngəni, ka shinardzi, təng tsa wutə Yesu athləthlata. Amma tsa aɗi sənda abbər tsa an Yesu nə wa. 15Antə Yesu pəla alari, “Mwala, kamnyar mi tə ga akwa tuwa ri? Wa an tə ga akwa barari ri?”
Mwala ni kəta abbər tsa an mthlakər fakə ni, antə tsa pəla alari, “Zanuwa, ma ga an kətə ni, pəla ali vəi tə gə vəi ni ata, kəi ra kətə ni.”
16Antə Yesu pəla alari, “Maryamu!” Antə tsa shinardzi abwar ni ka pəla alari akwa mnyar mjir Yahudi abbər, “Rabboni!” Karapwari an “Maləm.”
17Antə Yesu pəla alari, “Ga aɗiya tsəkwar ra wa, kamnyar I aɗi ləmtazi adzə Tədda katagu wa. Amma mwari adzə maɗama'na ka gə pəla ala ɗa, I akwa ləmtazi adzə Təddarna ka Təddar giri, adzə Hyelərna ka Hyelər giri.”
18Antə Maryamu Magdalin mwari ka pəla aka mjirthlipərni abbər tsa ku wutə Mthlaku, ka pəla ala ɗa shanga su tə Yesu pəla alari.
Yesu Ku Ncantə Kərni Aka Mjirthlipərni
(Mat 28:16-20; Mar 16:14-18; Luk 24:36-49)
19Tsu vir nda tahaku, vir na ntangkəma akwa sati ni, antə mjirthlipərni tsaptədzi ata kəma duku, ka hartə nyarmbwa kamnyar da akwa thlivər mjir Yahudi na ol'ola ni. Antə Yesu si ka thləthlata akwa nca ɗa ka pəla, “Ka msərakur ndzi adzə giri.” 20Aghəla tə tsa pəla ndər ngəni, antə tsa ku ncanta ala ɗa tsiyari ka thlimbəlari. Antə mjirthlipərni ku hara kucali kamnyar wutə Mthlaku ni.
21Antə Yesu jaktə pəla ala ɗa, “Ka msərakur ndzi adzə giri. Apatə Tədda ku thlentə ra, antə I akwa thlentə giri.” 22Aghəla tə tsa pəla ndər ngəni, antə tsa fyarar ɗa, ka pəla ala ɗa, “Dlu giri Mambəl na Ɓɗakkarkara ni. 23Kəlara mdə tə giri ku tifəmta alari bikərni, bikərni ku tifəmtadzi alari. Kəlara mdə natə giri aɗi tifəmta alari bikərni wa, bikərni aɗi tifəmtadzi wa.” #Mat 16:19; 18:18
Thlomas Aɗi Hamta Jiri Wa
24Amma pal akwa nca mjirthlipərni na kumnya suɗa na ka thləmari Thlomas, tə mda ana kəga ni abbər Ɓuli ni, aɗi adzə ɗa sakatə Yesu si nə wa. 25Antə bwadukwa mjirthlipə ni pəla alari, “Yeru ku wutə Mthlaku.”
Amma Thlomas pəla ala ɗa, “Ma I aɗi wutə manjivarər kusayeri na ata tsiyari ni, ka tsəkwar manjivar ni ka kulengi, ka hau tsi akwa thlimbəlari wa, I aɗi ata hamta jiri wa.”
26Aghəla vir ncisu, antə mjirthlipərni jaktə tsaptədzi ambwa nda, tsuwa Thlomas akwa nca ɗa. Wala tə nyarmbwayeri shang harharari, Yesu ku səmbwa ka thləthlata akwa nca ɗa, ka pəla, “Ka msərakur ndzi adzə giri.” 27Antə tsa pəla aka Thlomas, “Tsəkwar vəi ngəni ka kulenga ga, ka gə wulhə tsi ni. Ha tsiya ga, ka gə hau akwa thlimbəli. Ga aɗiya ndzi mdə na kula hamta jiri wa, amma ka gə hamta jiri.”
28Antə Thlomas shinau alari ka pəla, “Mthlakərna, ka Hyelər na!”
29Amma Yesu pəla alari, “Kamnyar tə gə wutə ra antə gə hamta jiri ni ya? Da ka barka mji na aɗi wutə ra wa amma da ku hamta jiri.”
Su Na Hara Tə Mdə Rəbuta Kakaɗə Ngəni Ni
30Yesu ku hara surndatayeri hang damwa ata nca mjirthlipərni, natə mda aɗi rəbuta akwa kakaɗə ngəni wa. 31Amma mdə rəbutə nayeri ni kamnyar ka giri hamta jiri abbər Yesu an Kristi, Ɓzər Hyel. Antə atar hamta jiri ni giri ata wutə mpika akwa thləmari.
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.