Yahwana 18
18
Mji Ku Ngkəi Yesu
(Mat 26:47-56; Mar 14:43-50; Luk 22:47-53)
1Sakatə Yesu ku kuri adduwa ngəni, antə da ləɓəla kəga mjirthlipərni, ka mwari aɓəla bwanda Mular Kidron. Anda fakə laga aɗi, antə Yesu ka mjirthlipərni ləkwa fakə ni. 2Tsuwa Yahuda na ɓəli ni ni ku səndə vəi ni, kamnyar Yesu ku kəɗar kəɓa anda kəga mjirthlipərni. 3Antə Yahuda fatə sojayeri laga, ka mji laga na ol'ola akwa nca pristayeri, ka mjir Farisi, ka mwari kəga da akwa fakə ni, ka pitəlayeri, ka zafayeri, ka kari ar mpa, akwa tsiya ɗa. 4Tsuwa Yesu ku səndə shanga su na ata wutə ni, antə tsa mwari akəma ɗa, ka pəla, “Wa an tə giri akwa barari ri?”
5Antə da pəla alari, “Yesu na mdər Nazareth.”
Antə Yesu pəla ala ɗa, “I an tsa,”
Tsuwa Yahuda na ɓəli ni, athləthlata adzə ɗa. 6Sakatə Yesu ku pəla ala ɗa abbər, “I an tsa,” ni, antə sojayeri ni ngka ka bwahili ka ndla ata di. 7Antə Yesu jaktə yu ɗa abbər, “Wa an tə giri akwa barari ri?”
Antə da pəla, “Yesu na mdər Nazareth.”
8Antə Yesu shinau ka pəla, “Ai I ku pəla ala giri abbər I an tsa. Antə ma iya antə giri akwa barari ni, ka giri zhar mji nayeri ni ka da təra.” 9Tsa pəla apani ni kamnyar ka tsa nghyaɓəla ndər tə tsa pəla nda abbər, “Tədda, akwa nca mji tə gə hamta ali ni, I aɗi shamta mdə wala duku wa.”
10Antə Siman Bitrəs na ka katsakar akwa tsiyari ni, ntsuɓəla katsakarərni ni ka nthlə mafar Prist na ol ni kəgari, ka nthləmta thləmari na abwa mazəm. Thləma mafa ngəni an Malkus. 11Antə Yesu pəla aka Bitrəs, “Jaktə hau katsakarər ngə ni akwa kəyari. Ga akwa wula apa I aɗi ɗəmhədzər ɗar bwani akwa laku tə Təddarna ɗəmha ali akwa nə wa ya?” #Mat 26:39; Mar 14:36
Yesu Akəma Annas
(Mat 26:57-58; Mar 14:53-54; Luk 22:54-55)
12Antə sojayeri ni, ka olər ɗa, ka mjir Yahudi na ol'ola ku ngkəi Yesu ka mbwamta ni. 13Antə da mwantə ni ntangkəma aka Annas, kamnyar tsa an baba' mwalar Kayafas. Tsuwa Kayafas ni an prist na ola akwa məva nda. 14Kayafas an hamta sauri aka mjir Yahudi na ol'ol ni abbər kuji ka mdə pal an mta ata vəya mji ni. #Yah 11:49-50; Luk 22:42
Bitrəs Ku Kampikər Səndə Yesu Ka Makər
(Mat 26:69-70; Mar 14:66-68; Luk 22:55-57)
15Antə Siman Bitrəs ka mdərthlipə damwa ku nutə Yesu. Ar mdərthlipə na dukwari ni prist na ol ni asəndə ni karkar, antə tsa nutə Yesu tə da ləkwa kutakəyir prist na ol ni. 16Amma ar Bitrəs tsa thləthlata aɓəla nyarfu. Antə mdərthlipə natə prist na ola asəndə ni, jaktə ləɓəla ka gari aka ɓzərngkwa na akwa gadi nyarfu ni, antə tsa səkwa ka Bitrəs. 17Antə ngkwa na akwa gadi nyarfu ni pəla aka Bitrəs abbər, “Amma, ga aɗi pal akwa nca mjirthlipər mdə ngəni wa?” Antə Bitrəs pəla, “Awa, aɗi I wa.”
18Tsuwa vəi mtathlaku, antə buɗayeri ka mjir gadi na ol'ola ni mbahə u'u ka vina, ka thləthlata akwa thlirari. Antə Bitrəs mwari ka thləthlata adzə ɗa akwa thlirari tsuwa.
Prist Na Ola Ku Yu Yesu
(Mat 26:59-66; Mar 14:55-64; Luk 22:66-71)
19Antə prist na ol ni yu Yesu ata kəra mjirthlipərni ka su tə tsa ana thlipa. 20Antə Yesu pəla alari, “Ai I ku pəla aka mji ata bəbal, tsuwa tədəku I akwa thlipa akwa mbwar vəngkər səli kəga akwa kuta bəbalər mbwar vəngkər səli, ata vəi tə shanga mjir Yahudi ana tsaptədzi akwa. Su aɗi tə I pəla akwa ɗuwar wa. 21Ka kamnyar mi tə ga akwa yu ra ri? Yu mji na ku nggatə ra ata kəra su tə I pəla ala ɗa ni. Da səndə su tə I pəla.”
22Sakatə Yesu pəla gari ngəni, antə pal akwa nca mjir gadi na athləthlata anda ni tsa Yesu ka tsiyari, ka pəla, “An laku tə ga ata shinau aka prist na ol akwa ya?”
23Antə Yesu pəla alari, “Ma I ku pəla su laga na ɗimi, təng ga ata pəla suari kəi sənda. Amma ma su tə I pəla ni kalkal, to, kamnyar mi tə gə tsa ra nə ri?”
24Antə Annas thlentə ni aka Kayafas na prist na ol ni, tsu ka tsiyari mbwambwari ni.
Bitrəs Ku Jaktə Kampikər Səndə Yesu
(Mat 26:71-75; Mar 14:69-72; Luk 22:58-62)
25Sakatə Siman Bitrəs athləthlata akwa thlir u'u ni, antə mdə laga pəla alari, “Amma, ga aɗi pal akwa nca mjirthlipər mdə ngəni wa?”
Antə Bitrəs beɗəmta ka pəla, “Awa, aɗi I wa.”
26Antə pal akwa nca mjir kəthlər aka prist na ol ni, yangkura mdə tə Bitrəs nthləmta thləmari ni, pəla aka Bitrəs abbər, “I aɗi wutə nga adzə ni akwa fakə ni wa?”
27Antə Bitrəs jaktə beɗəmta. Təng təkəma fugəm tuwa.
Mdə Ku Səntə Yesu Akəma Bilatus
(Mat 27:1-2,11-14; Mar 15:1-5; Luk 23:1-5)
28Tsu ɗəɗəpə mbing antə da kəɓəla Yesu akwa kəyir Kayafas ka mwantə ni akwa kəyir gwamna. Amma mjir Yahudi aɗi ləkwa kutakəyir gwamna nə wa, ta da ahilantə ɓɗakkurər ɗa akəma Hyel, tə da aɗi ata mzhi səm susəmər Kucalər Fəlɓəla Kəi nə wa. 29Antə Bilatus mwari adzə ɗa aɓəla ka yu abbər, “Man tə mdə ngəni ɓzamta tə giri burkatə ni nə ri?”
30Antə da pəla alari, “Ma mdə ngəni aɗi mdər hara ɗimikur wa, ai yeru aɗi ata səntə ni ala gə wa.”
31Antə Bilatus pəla ala ɗa, “Kətə giri ni, ka giri hara alari shariya apatə tsawur giri thlamta.” Antə mjir Yahudi pəla alari, “Yeru aɗi ka dunar kuthlikur ar tsi mdə wa.” 32Ngəni an kamnyar nghyaɓəla ndər tə Yesu pəla ni na akwa ncantə jili mtə na ata sə wutə ni. #Yah 3:14; 12:32
33Antə Bilatus jaktə ngka akwa vəi ɓukcirni, ka kəga Yesu, ka yu ni abbər, “Ga an kuthlir mjir Yahudi ni ya?”
34Antə Yesu shinau ka pəla, “Sur yu ngəni thlata akəla gə nənga mji damwa an gari ala gə ata kəri ri?”
35Antə Bilatus pəla, “I mdər Yahudi ya? Mjir nga kəga pristayeri na ol'ola an hamta nga ali. Man tə gə hara ri?”
36Antə Yesu shinau ka pəla, “Kuthlikurərna aɗi ar duniya ngəni wa. Ma kuthlikurərna an ar duniya ngəni, sakani mjir nu ra ata mpa kamnyar ta mda ahamta ra aka mjir Yahudi, amma kuthlikurərna aɗi ar duniya ngəni wa.”
37Antə Bilatus pəla, “Azha gə kuthli ya?” Antə Yesu shinau ka pəla, “Ga an akwa pəla I kuthli ni. Kamnyar jiri, an su na hara tə mdə yaɓəla ra ni, tsuwa an su na səntə ra akwa duniya ni, kəi pəla su ata kəra jirkur. Tsuwa kəlara mdə na hir jirkur, tsa ana psi thləm ali.”
38Antə Bilatus yu ni abbər, “Man jirkur nə ri?”
Mdə Ku Thlamta Shariyar Mta Aka Yesu
(Mat 27:15-31; Mar 15:6-20; Luk 23:13-25)
Aghəla tə Bilatus yu ni ni, antə tsa jaktə ləɓəla adzə mjir Yahudi ni, ka pəla ala ɗa, “I aɗi wutə biku adzə ni wa. 39Amma ku ndzi surharar giri abbər kəi psi ala giri mdə pal akwa pərsəna akwa kəlara sakar Kucalər Fəlɓəla Kəi. Apani, giri akwa bara kəi psi ala giri kuthlir mjir Yahudi ni ya?” 40Antə da jaktə haptə kuraku akwa pəla, “Awa, aɗi mdə ngəni wa! Psi ala yeru Barabbas!” Nggədza ye Barabbas ni mdər thla laku.
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.