Baɗitari 6
6
Ɗimikur Ar Mji
1Sakatə mji baɗitə hara hang ata kəra duniya, tə da ku yatsə maɗankwi, 2maɗa' Hyel wuta abbər maɗankwi tə mji ya ni ɓɗakɓɗaku, antə da ku carɓəla maɗankwi laga akwa nca ɗa, ka kəl ɗa. 3Antə MTHLAKU pəla, “Mambələrna na ana hamta mpika aɗi ata ndzi akwa mda har ba saka madi wa, kamnyar tsa an kum ka mamshi. Məvari aɗi ata təramta aru pal ka sərkumari wa.”
4Akwa saka ndaga ka saka na aghəla nda, mji na saɓəl saɓəl gurjam gurjam ni aɗi akwa duniya, kamnyar tə maɗashilər Hyel ku pi ka maɗankwi ar mji, ka yatsa ala ɗa maɗankyar. Maɗa' ngəni an ndzi katsalayeri waci, da an mji tə thləma ɗa ku tuwa. 5MTHLAKU ku wuta abbər ɗimikur ku hara hang kamta akwa duniya, tsuwa su na akwa ɗəffa shanga mji tədəku an dzamər ɗimikur. 6Antə ɗəffa MTHLAKU ku ɓzi kamnyar tə tsa ku namtə mda ata kəra duniya. 7Kamnyar ngəni antə MTHLAKU pəla, “I ata shamta shanga mji natə I alakta ata kəra duniya. I ata shamta mji ata kəma duku ka shanga mwaɓi mtaku, ka shanga suayeri na ana mwa ka yimər kuta ɗa ata di, kəga ɗikayeri na ata kutahyel, kamnyar ɗəffi ku ɓzi tə I ku namtə ɗa ni.” 8Amma Nuhu ku wutə mdəkur ata nca MTHLAKU.
9Ngəni an mjir nyarmbwar Nuhu. Nuhu an mdə na ka jirkur, tsa aɗi ka sur nggəla adzə ni akwa zamanərni wa. Nuhu ku mwa ka Hyel. 10Nuhu ka maɗashili makər natə da an Shem, ka Ham, ka Yafeth.
11Tsuwa akwa saka ndaga Hyel wuta abbər shanga duniya ni ku ndzi hilhilari, tsuwa tsa ku nghyi ka thlentər hangkal. 12Hyel ku wul duniya, ka wuta abbər tsa ku ndzi hilhilari ka duna, kamnyar tə shanga mji ku hilantə kərɗa akwa duniya.
Nuhu Ku Ɗəmhədzi Kamnyar Yimər Avava
13Antə Hyel ku pəla aka Nuhu, “I ku ɗəmha akwa ɗəffi abbər I ata shamta shanga mji, kamnyar tə duniya ku nghyi ka haptər hangkal atar ɗa. Antə apani I ata shamta ɗa japu ka duniya. 14Martə sharər yimi ka udzəm na ɓɗaku, kamnyar kəra ga, kara thlagaɓəla kutari, kara fəi dzari na avivi ka dzari na aɓəlaɓəla ka kwalta. 15Nggədza laku tə ga ata mar sharər yimi ni. Ka gə namtə saɓəlkurərni ka da ndzi dzartsi aru makər, ka baukurərni ndzi dzartsi ntəfkumari, ka nalkurərni ndzi dzartsi makkumari. 16Ka gə hartə kəra shar ni, kara mbilar daɓu na ata mwanta apa dzartsi pal akwa daɓwa kərari ka tengari ni. Ka gə namtə sharər yimi ni ka kutari ndzi jikə makər, aghəi, ka na ata ɗəffu, ka na ata kər, tsuwa ka gə vətə nyarmbwa ata thlimbəlari. 17Kamnyar I ata səntə yimər avava ata kəra duniya, kəi shamta shanga su na ka mpika na ata kəra duniya, antə shanga su na akwa duniya ata mta. 18Amma I ata kəta ala ga alkawal abbər ga ata ləkwa shar ni ka mwalankiri, ka maɗa' nga, kəga mwankir ɗa shang ata kəma duku. 19Tsuwa akwa kəlara jili su na ka mpika ga ata səntə ɗa suɗsuɗa sal ka mwala akwa shar ni, ka da ndzi ka mpika adzə nga. 20Akwa nca kəlara jili ɗika madi, ka kəlara jili mwaɓi madi, ka kəlara jili su na ana mwa ka yimər kutari ata di, suɗsuɗa an ata si adzə nga kamnyar ka da ndzi ka mpika. 21Tsuwa kara kətə shanga jili kari susəmayeri na aɗi kara vəi kamnyar nga, ka kamnyar ɗa.” 22Antə Nuhu ku hara shanga suayeri ni kalkal apatə Hyel ku tsawa alari.
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.