Kəth Apos 3
3
Mdə Ku Mbantə Nggurdəkəi Laga
1Vir laga Bitrəs ka Yahwana akwa mwari akwa mbwar vəngkər səli aka Hyel ata saka makər na tahaku kamnyar hara adduwa. 2Antə anda adzə nyarfu natə mda ana kəga thləmari Nyarfu na Ɓɗaku ni, mdə laga aɗi na nggurdəkəi təng tə mdə yaɓəla ni. Tədəku viri mda ana si ka tsa ka vəi ni akwa Nyarfu na Ɓɗaku ni, kamnyar ka tsa kiɗə kwaba akəla mji na ana ləkwa mbwar vəngkər səli ni. 3Sakatə tsa wutə Bitrəs ka Yahwana akwa si akwa vəngkər səli ni, antə tsa kiɗə saɗaka akəla ɗa. 4Antə Bitrəs ka Yahwana wul ni njingnga, ka pəla alari, “Wul yeru.” 5Antə hangkala nggurdəkəi ni ngka adzə ɗa, kamnyar tsa tamata abbər tsa ata wutə su akəla ɗa. 6Amma Bitrəs pəla alari, “I aɗi ka kwaba wa. Amma I ata hamta ala gə su tə I kəgari. Akwa thləma Yesu Kristi ar Nazareth, thlatə ka ra mwa ka səla ga!” 7Antə Bitrəs tamtə ni ata tsi mazəmari ka thlentə ni. Antə səla mdə ni wutə duna. 8Antə tsa thlatə mwat ka baɗitə mwa, ka ləkwa mbwar vəngkər səli ni kəga da, tsa akwa mwa ka fəlfəla akwa hu Hyel. 9Antə shanga mji na anda ku wutə ni akwa mwa ka hu Hyel ni. 10Sakatə da nggaɓəla abbər tsa an mdər kiɗə saɗaka na ana ndzəndzi akwa Nyarfu na Ɓɗaku ni, antə shanga ɗa ndatədzi ka duna ata kəra su na hara alari ni.
Gari Tə Bitrəs Hara Aka Mji Akwa Galahər Solaman
11Tun tə sakatə nggurdəkəi tə mdə mbantə ni bartə dza Bitrəs ka Yahwana, shanga mji ku hwi si adzə ɗa akwa galahəu natə mda ana kəga Vərandar Solaman ni, akwa ndatədzi. 12Sakatə Bitrəs wutə mji ni, antə tsa gari ala ɗa abbər, “Giri na mjir Israila, kamnyar mi tə giri akwa ndatədzi ata kəra su ngəni ri? Tsuwa kamnyar mi tə giri akwa wul yeru njingnga apa dlu dunar yeru wala ɓɗakkurər yeru an hara tə tsa akwa mwa nə ri? 13Kamnyar Hyelər Ibrahim, ka Ishaku, ka Yakub, na Hyelər kəkayeri ar mburu, an haptə səliyir Ɓzərni Yesu, mdə tə giri hamta ni ka kampikərni akəma Bilatus, sakatə tsa pəla tsa ata psi ni ni. 14Amma giri ku nggəlar mdə na Ɓɗakkarkara na ka Jirkur ni, ka kiɗa abbər ka mdə psi ala giri mdər tsi mdə ni. #Mat 27:15-23; Mar 15:6-14; Luk 23:13-23; Yah 19:12-15 15Antə giri tsi Mdə na vəi mpikə ni, natə Hyel thlentə ni akwa mtəmtə ni. Antə yeru seɗar su ngəni. 16Atar hamta jiri akwa thləmari ni antə mdə ngəni wutə duna apatə giri akwa wulari ka apatə giri asənda. Hamta jiri aka Yesu an hara tə mdə ngəni ndzi lapiya ndəlang apatə shanga giri akwa wulari ni.
17“Antə kulini, maɗaməma, I ku sənda abbər giri hara su ngəni ɗimikur ngəni ni akwa tur sənda, tsu apatə mji na ol'olər giri hara ni. 18Amma su tə Hyel pəla təng waci atar shanga naɓiyayeri, abbər Kristi arni ata sə ɗar bwani, an nghyaɓəladzi. 19Antə apani ka giri tubi, ka giri shinardzi abwar Hyel, kamnyar ka mdə kəcimta ala giri bikər giri, kamnyar ka Mthlaku jaktə namtə daɓwa giri bilən, 20antə tsa ata thlenta ala giri Kristi natə mdə carɓəla ala giri təng waci ni, watau Yesu. 21Ku ndzi dwali ka Yesu ndzi amtazi, har tar ma sakatə shanga su ku jaktə namtədzi ka ndzi bilən, apatə Hyel ku pəla waci atar naɓiyayeri arni na ɓɗakkarkara. 22Kamnyar Musa pəla, ‘Mthlaku na Hyelər giri ata sə carɓəla ala giri naɓi, tsu apatə tsa ku carɓəla ra. Ata hara ɓɗaku ka giri psi thləm aka kəlara su tə tsa ku pəla ala giri. 23Kəlara mdə na aɗi psi thləm aka naɓi ndagə wa, mda ata kəɓəla ni kazhar nca mjirni.’ 24Antə shanga naɓiyayeri na ku gari, baɗitə ka Samiwal ka mji na si aghəlari, ku pəla su ata kəra virayeri ngəni. 25Giri an mji tə Hyel gari ata kər atar naɓiyayeri abbər da ata səm riɓar alkawal ni, alkawalayeri tə tsa kəta aka kəkayeri ar giri ni, sakatə tsa akwa pəla aka Ibrahim abbər, ‘Atar kəkayeri ar nga antə shanga mjir duniya ata sə wutə barka.’ 26Apani sakatə Hyel ku carɓəla mafarni, tsa thlentə ni ala giri ntangkəma, ka tsa vədza ala giri barka, atar shinar kəlara mda akwa nca giri kazhar kəmanggarkur.”
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.