GENESIS 13
13
1Tin, Abrama chu Aigupta ram aṭang chuan a chhuak a, chhim ramah chuan a chho ta a, a hnênah chuan a nupui te, a neih zawng zawng te, Lota te an chho ve a. 2Tin, Abrama chu ran te, tangkarua te, rangkachak tein a hausa êm êm a. 3Tin, chhim ram aṭang chuan Bethel thleng zakin a kal zêl a, Bethel leh Ai khaw inkâra a tîra a puan in awmnaah khân, 4a tîra a maichâm siamna ngeiah khân; tin, chutah chuan Abrama chuan Lalpa hming a lam a.
5Tin, Lota, Abrama hnêna kal ve pawh khân bêram rual te, bâwng rual te, puan in te a nei ve a. 6Tin, an awm dunna tûrin ramin a daih ta lo va, an thil neih chu a nasa êm si a; chutichuan, an awm dûn thei ta hlawl lo va. 7Tichuan, Abrama ran pute leh Lota ran pute kârah chuan inhnialna a lo chhuak ta a. Chumi lai chuan Kanaan-hote leh Periz-hote chu chumi ramah chuan an awm a. 8Tichuan, Abraman Lota hnênah, “Khawngaih takin, nang leh keia kârah, i ran pute leh ka ran pute kârah pawh inhnialna awm suh se; unau kan ni si a. 9Ram chu a pum puiin a awm duai lo vem ni? Khawngaih takin ka hnên ata hi intihrang mai rawh. Nang vei lama i kal chuan kei ding lamah ka kal ang a; a nih loh leh, nang ding lama i kal chuan kei vei lamah ka kal ang e,” a ti a. 10Tichuan, Lota chu a dâk a, Zoar khaw lam pan zâwng chuan Jordan phaizâwl zawng zawng chu Lalpa huan ang, Aigupta ram anga ram tina tui tam tak awm chukna a ni tih a hria a, Lalpan Sodom leh Gomorra khua a tihchhiat hma kha a ni si a.#Gen 2.10 11Chutichuan, Lota chuan Jordan phaizâwl zawng zawng chu a thlang ta a; tin, Lota chu chhak lamah chuan a insawn a. Tichuan, an inṭhen ta a. 12Abrama chu Kanaan ramah chuan a awm a, Lota chu phaizâwl khuaahte chuan a awm a, a puan in chu Sodom khaw thlengin a sawn zêl a. 13Tin, Sodom mite chu Lalpa mit hmuhin nasa taka suaksual leh mi sual an ni a.
14Tin, a hnên ata Lota a awm hran hnu chuan Lalpan Abrama hnênah, “Dâk la, i awmna aṭang khân hmâr lam te, chhim lam te, chhak lam te, thlang lam te en rawh; 15i ram hmuh zawng zawng hi kumkhua atân nang leh i thlahte ka pe dâwn che u a ni.#Tirh 7.5 16Tin, i thlahte chu leia vaivut ang maiin ka la siam ang; chutichuan, miin leia vaivut hi an chhiar sên chuan, i thlahte pawh chhiar sên an ni ang. 17Tho la, ram hi a dung leh a vâng fang chhuak rawh; ka pe dâwn che a ni,” a ti a. 18Tichuan, Abrama chuan a puan in chu a sawn a, Hebron-a awm Mamre sasaw kiangahte chuan awm hmun a va khuar a, chutah chuan Lalpa tân maichâm a siam a.
Mizo OV - Re-edited Bible
© The Bible Society of India, 2017.
Used by permission. All rights reserved worldwide.