Luka 21
21
Ơn phan Yàng in
(Mak 12:41-44)
1Yàng Jesu pò mat, gŏ ală cau pas ơn phan tòm đam jàr, 2kung gŏ dô nă cau ùr bơnrau rƀah ne ơn bàr su trà.#21:2 Hơ̆ la nggùl su. 3Kơnràñ đơs lah: “Añ đơs ngan mơ bol mê, cau ùr bơnrau rƀah do neh ơn oă rlau mơ jơh ală cau ne. 4Bơh jơh ală cau ne ai phan tơngkah tơngkañ bol khai dê mơ ơn tòm hơ̆, ai cau ùr rƀah siơ̆u siar do neh ơn jơh phan khai gơs, la phan ròng siam să khai.”
Yàng Jesu yal lài bơh hìu duh khoai rơp tơrlah tơrlơm mơ bơta rê wơl Kơnràñ dê
(Mathiơ 24:1-51; Mak 13:1-37)
5Tòm tŭ gơs cau đơs bơh hìu duh khoai geh bơka mơ lŭ niam mơ ală phan ơn, gen Yàng Jesu đơs lah: 6“Ală bơta bol mê gŏ tŭ do, tòm ală ngai rơp tus rơp ò gơs pơnai lŭ lơi ơm hơđang pơnai lŭ ndai mơ ò gơtơrlơm.” 7Bol khai lùp Kơnràñ lah: “Ơ Cau Bơto, tŭ lơi rơp gơlik gơs ală bơta hơ̆, mơ dơ̆ ală bơta hơ̆ mòr gơlik tus gen gơs tềl krơi lơi taih?” 8Kơnràñ đơs lah: “Kơrhia tĕ, rngòt bol mê gơkòl pơrlồm tìs nrah mòn, bơh gơs oă cau rơp ai sơnđan Añ lòt tus mơ đơs lah: ‘Añ la Krist!’ mơ lah: ‘Tŭ tơngai neh tus rềp.’ Bol mê bañ lòt jat bol khai. 9Tòm tŭ bol mê rơp kơno đơs bơh kơlìn gơtoă mơ nggồr nggàc, bañ rngòt rngơt; bơh ală bơta hơ̆ pal gơlik tus lài, mơya òhềt la tŭ lồi dut.”
10Kơnràñ đơs tai mơ bol khai lah: “Làng bol do rơp bơtào tòmsò mơ làng bol ne, lơgar do tòmlơh mơ lơgar ndai, 11rơp gơs lơnggơr ù dờng, oă tiah gơs jơgloh rung mơ pluh plàng; kung gơs ală broă rngòt cù kìr mơ tềl krơi dờng bơh trồ. 12Mơya lài mơ tŭ gơs ală bơta hơ̆, cau rơp ai tê kup bol mê mơ kup kơryan bol mê, bơtào tòm hìu jum, tơmut tòm hìu jàm, hwài bol mê tus di đap ală cau bơtau mơ ală cau kwang đơng lơgar tài bơh sơnđan Añ. 13Hơ̆ la tŭ lơmpah nàng bol mê in lơh cơng. 14#Luk 12:11-12.Behơ̆ bol mê lơh nền tĕ tòm nùs, bañ kơlôi lài mbe rơp tò să he.#21:14 Cil: pò să. 15Bơh Añ rơp ai bol mê in jơnau đơs mơ bơta jak chài mơ ală cau sò tơm di bol mê ò rgơi tòmdră hala đơs tơrwơl. 16Bol mê kung rơp gơkòl mè bèp, oh mi, jơi bơtiàn, gơp bơyô pơrlơ̆ dră; bol khai rơp tơnchơt cau ƀà tòm mpồl bol mê. 17Bol mê rơp gơkòl jơh ală cau gơjrañ kơuềng tài bơh sơnđan Añ. 18Mơya dô dang che sŏ di bồ bol mê dê kung ò roh sơl. 19Kơnòm di bơta kơ̆ nùs bol mê dê mơ bol mê geh sròng#21:19 sròng: Hala kơrmap gàr hwềng soàn. hwềng soàn he dê.
20Tòm tŭ bol mê gŏ Jerusalem gơkòl mpồl ling gơrwàng, gen git tĕ lah bơta tơrlah tơrling gơ mòr tus. 21Tŭ hơ̆ cau lơi ơm tòm Jude dô tĕ hơđang mơnơm, cau lơi ơm tòm Jerusalem lik tĕ, cau lơi ơm tòm ƀlàng bañ mut tòm Jerusalem. 22#Ôse 9:7.Bơh hơ̆ la ală ngai lơh glài, tồ jơh ală bơta neh cih gơlik gơs di ngan. 23Tòm ală ngai hơ̆, bòl glar cau bun in mơ cau gơs kòn pô in! Bơh rơp gơs bơta rung rài dờng gơdùh tòm ù mơ bơta lơh glài Yàng Tom Trồ rơp tus hơđang làng bol do. 24Bol khai rơp gơplơ̆ hơđơm mat đào, gơkòl cau kup lơh dĭ digùl jơh ală làng bol, Jerusalem rơp gơkòl ală làng bol bơdìh jă trơm jơl tus di ală tŭ tơngai làng bol bơdìh dê geh wil tơl. 25#Esai 13:10; Ejek 32:7; Jôel 2:31; Yalt 6:12-13.Rơp gơs ală tềl krơi tòm mattơngai, kơnhai mơ ală sơmañ; ai tòm ù gen ală làng bol jê sồt bòl glar, ò git mbe kòñ lơh bơh dàlềng mơ ryà gơ nggồr ur ur. 26Cau gơdô nùs tài bơh rngòt rngơt tòm tŭ gơn sền ală bơta rơp gơlik gơs tòm làm jơh dunnia, bơh gơnap gơnoar ală tap trồ dê gơlơnggơr. 27#Dan 7:13; Yalt 1:7.Tòm tŭ hơ̆, cau rơp gŏ Kòn Mơnus ai gơnap gơnoar dờng mơ bơta gơklŏ ryŭ ryơm ơm tòm mhwal mơ tus.
28Tŭ lơi ală bơta hơ̆ rơp gơlik tus, gen ntào tĕ song mơ tơnggòr hơđang, bơh bơta dong tă bol mê dê tus rềp.”
29Chòp Kơnràñ đơs mơ bol khai dô jơnau pơnyơu lah: “Sền tĕ chi ƀal mơ ală chi ndai; 30tòm tŭ gơcat nha, gen bol mê gŏ mơ git lah kơnhai duh mòr tus. 31Kung behơ̆ sơl, tòm tŭ bol mê gŏ ală bơta hơ̆ gơlik gơs, gen git tĕ lah lơgar Yàng Tom Trồ mòr tus rau. 32Di ngan Añ đơs mơ bol mê, cau pah rài do ò sơrlèt rlau jơl tus di tŭ jơh ală bơta hơ̆ gơlik gơs rau. 33Trồ tiah rơp roh, mơya jơnau đơs Añ jê ò gơs tŭ lơi roh.
34Behơ̆ bol mê kơrmap gàr tĕ să he, rngòt bơta ñô sa oă ir, bơta bơñul lơmbè mơ bơta kơlôi rcang rài do dê lơh giga nùs bol mê dê, mơ ngai hơ̆ tus nisơna hơđang bol mê be tras jàl mòn; 35bơh ngai hơ̆ rơp tus hơđang kòp nă cau ơm làm gùt plai ù kung behơ̆ sơl. 36Behơ̆ bol mê pal drơng kơp tĕ mơ hòi dan sùm, tồ bol mê in gơs tơl pràn nàng lik klàs bơh di ală bơta pal tus hơ̆ mơ ntào di đap Kòn Mơnus.”
37 #
Luk 19:47. Mơ tai, kòp ngai Yàng Jesu bơto sồr tòm hìu duh khoai, ai kòp mang Kơnràñ lik lòt mơ ơm hơđang mơnơm sơnđan la Ôlibe. 38Gơ rơp rìng àng, jơh làng bol lòt tus hơ Kơnràñ tòm hìu duh khoai nàng iat Kơnràñ.
© 2018 United Bible Societies. All rights reserved.