Sơnròp Gơlik Gơs 11
11
Theng Babel
1Tŭ hơ̆ jơh lơgar dunnia gơs dô jơnau đơs bal mơ ngui bal dô jơnau đơs. 2Bơh đah mattơngai lik, bol khai lik lòt mơ gŏ dô nơm ƀlàng tòm lơgar Sinear, gen ơm tềng hơ̆. 3Mơ bol do đơs mơ bol ne lah: “Heh, bol he lơh tĕ gac mơ buh niam tòm ồs.” Mơ bol khai gơs gac ala lŭ, mơ cài ala simang. 4Bol khai đơs tai lah: “Behơ̆ bol he bơt tĕ dô nơm ƀòn, mơ bơt dô nơm gơlang jơnhoa tus hơ trồ, bol he lơh tĕ gơs pơnro sơnđan bol he in, rngòt bol he lòt gơprah gơpring tòm ù mòn!” 5Chòp Yàng Jehôwa mù nàng sền gŏ ƀòn mơ gơlang jơnhoa mơ kòn sau kòn mơnus dê neh bơt. 6Yàng Jehôwa đơs lah: “Do, bol khai gơs mìng dô làng bol, mơ tơl nă gơs dô jơnau đơs bal mơ ne broă bol khai rơp lơh, tŭ do ò gơs bơta lơi kơryan bol khai lơh gơs ală bơta bol khai neh kơlôi nền. 7Behơ̆, Bol He mù lă, nàng lơh sơlồng sơlàng jơnau đơs bol khai dê, nàng bol khai in ò tòm wă jơnau đơs cau do mơ cau ne.” 8Lồc behơ̆, Yàng Jehôwa lơh kòn mơnus in lòt gơprah gơpring làm ù tiah, mơ bol khai sang lòi ò bơt ƀòn tai. 9Tài bơh hơ̆ sơnđan ƀòn hơ̆ la Babel,#11:9 Babel: Tòm jơnau Babilôn jơnau do gơs gơtha la “mpồng ală yàng,” tòm jơnau Hebrơ jơnau do gơs sap đơs tòm toh be jơnau gơs gơtha la “sơlồng sơlàng”. bơh Yàng Jehôwa neh lơh sơlồng sơlàng jơnau đơs làm ù dê, mơ bơh tềng hơ̆ Kơnràñ lơh kòn mơnus in lòt gơprah gơpring làm ù tiah.
Jơi bơtiàn cau Israel dê bơh Abraham tus dê Jôsep
(11:10 – 50:26)
Jơi bơtiàn Abraham dê
10Do la jơi bơtiàn Sem dê: bàr nam tơnơ̆ mơ dà kŏ, Sem neh tơl dô rhiang nam mơ tơnggơs Arpaksat. 11Tơnơ̆ mơ tŭ Sem tơnggơs Arpaksat rau, khai gam kis pram rhiang nam tơnggơs kòn klau kòn ùr.
12Arpaksat neh tơl pe jơt pram nam tơnggơs Selah. 13Tơnơ̆ mơ tŭ Arpaksat tơnggơs Selah rau, gam kis poan rhiang pe nam tơnggơs kòn klau kòn ùr.
14Selah neh tơl pe jơt nam tơnggơs Heber. 15Tơnơ̆ mơ tŭ Selah tơnggơs Heber rau, gam kis poan rhiang pe nam tơnggơs kòn klau kòn ùr.
16Heber neh tơl pe jơt poan nam tơnggơs Pelek. 17Tơnơ̆ mơ tŭ Heber tơnggơs Pelek rau, khai gam kis poan rhiang pe jơt nam tơnggơs kòn klau kòn ùr.
18Pelek neh tơl pe jơt nam tơnggơs Rehu. 19Tơnơ̆ mơ tŭ Pelek tơnggơs Rehu rau, gam kis bàr rhiang sin nam tơnggơs kòn klau kòn ùr.
20Rehu neh tơl pe jơt bàr nam tơnggơs Seruk. 21Tơnơ̆ mơ tŭ Rehu tơnggơs Seruk rau, gam kis bàr rhiang poh nam tơnggơs kòn klau kòn ùr.
22Seruk neh pe jơt nam tơnggơs Nakôr. 23Tơnơ̆ mơ tŭ Seruk tơnggơs Nakôr, gam kis bàr rhiang nam tơnggơs kòn klau kòn ùr.
24Nakôr neh tơl bàr jơt sin nam tơnggơs Terah. 25Tơnơ̆ mơ tŭ Nakôr tơnggơs Terah rau gam kis dô rhiang jơt sin nam tơnggơs kòn klau kòn ùr.
26Terah neh poh jơt nam tơnggơs Abram, Nakôr mơ Haran.
27Do la jơi bơtiàn Terah dê: Terah tơnggơs Abram, Nakôr mơ Haran; Haran tơnggơs Lot. 28Haran chơt di đap Terah la bèp khai dê, tòm lơgar khai dê, tòm Ur, lơgar Kalde dê. 29Abram mơ Nakôr gơs bau, bau ùr Abram dê sơnđan la Sarai, mơ bau ùr Nakôr dê sơnđan la Milka kòn Haran, Haran bèp Milka mơ bèp Jisda. 30Mơ tai, Sarai la cau kơnền, gen khai ò gơs kòn.
31Mơ Terah lam Abram, kòn klau khai dê, Lot, sau khai la kòn klau Haran dê, mơ Sarai, bau ùr Abram dê lik bơh dê Ur, lơgar Kalde dê nàng mut tòm lơgar Kanaan. Bol khai lòt tus hơ Caran gen ơm tơn tềng hơ̆. 32Rài kis Terah la bàr rhiang pram nam, mơ Terhah chơt tòm Caran.
© 2018 United Bible Societies. All rights reserved.