San Lucas 22
22
Ñepu'ã Jesús rehe
1Hi'aguĩma pe pan ilevadura'ỹva arete, hérava Pascua, 2ha umi pa'i ruvicha ha mbo'ehára kuéra oheka mba'éichapa ojuka haguã Jesúspe, okyhyjégui umi tetãyguágui.
3Judas Iscariote, umi doce apóstol kuéra rehegua peteĩva corazõme oike Satanás, 4ha oho oñomongeta umi pa'i ruvicha ha tupao ñangarekoha mburuvicha kuéra ndive mba'éichapa omoĩta Jesúspe ipópe kuéra. 5Ha ha'e kuéra ovy'a ha oñemoĩ hikuái peteĩ ñe'ẽme ome'ẽ haguã ichupe plata; 6ha Judas ome'ẽ ichupe kuéra iñe'ẽ ha oheka mba'éichapa omoĩta Jesúspe ipópe kuéra oĩ'ỹ jave pe genteta.
Ñandejára Jesús karu pyhare
7Ha oguahẽ pe pan ilevadura'ỹva arete, tekotevẽ haguã ojejuka pe ovecha ra'y Pascua peguarã; 8ha Jesús omondo Pedro ha Juánpe, ha he'i ichupe kuéra:
--Tapeho, pembosako'i ñandéve pe Pascua, ja'u haguã.
9Ha'e kuéra oporandu ichupe:
--¿Mamópa reipota rombosako'i?
10Ha Jesús he'i ichupe kuéra:
--Peikévo pe ciudádpe pene ruvaitĩta peteĩ kuimba'e ogueraháva ý kambuchípe; tapeho hapykuéri pe óga oikeha peve, 11ha peje pe óga járape: “Pe mbo'ehára ko oporanduka ndéve: ¿Mamópa oime pe koty ha'u haguã Pascua che remimbo'e kuéra ndive?” 12Ha ha'e ohechaukáta peẽme peteĩ koty guasu, yvategua, oĩmbámava; pembosako'i upépe.
13Oho hikuái, ha ojuhu pe ha'e he'i haguéicha ichupe kuéra; ha ombosako'i pe Pascua.
14Ha oguahẽma ramo hora, Jesús oguapy mesápe, ha hendive umi apóstol kuéra, 15ha he'i ichupe kuéra:
--Hetaite niko che ha'use kuri penendive ko Pascua, amano mboyve. 16Ha'éko peẽme nda'uvéima va'erãha ichugui oikopa peve hekoitépe Tupã Ñandejára réinope.
17Ha ojapyhy pe vaso, ome'ẽ las gracias Tupã Ñandejárape ha he'i:
--Kóina kóva, ha pe'u ichugui oñondive kuéra; 18ha'e peẽme ko'águi rire nda'u mo'ãveiha ko parral'a rykuerégui ou peve pe Tupã Ñandejára reino.
19Ha ojapyhy pe pan, ha ome'ẽ las gracias, oipese'ã, ha ome'ẽ ichupe kuéra he'ívo:
--Kóva ha'e che rete, pende rehe oñeme'ẽva. Pejapo kóva ñemomandu'aha ramo che rehe.
20Upéicha ojapo avei, ocenamba rire, ojapyhy pe vaso, ha he'i:
--Ko vaso ha'e pe pacto pyahu che ruguy rupi, pende rehehápe oñeñohẽva.
21‘Opáichavo, péina ápe, pe che me'ẽharã po oĩ chendive mesápe. 22Ko kuimba'éicha ou va'ekue yvy ári niko ohóta voínte añete pe haperã oñemoĩ va'ekue ichupe rupi; opáichavo, ¡angái upe kuimba'e ojapyhyukáva ichupe!
23Ha ha'e kuéra oñepyrũ oporandu ojupe kuéra, mávatapa upe ojapótava upéva.
Ñe'ẽjoapi pe mba'eguasuvétava rehe
24Ha oñepyrũ oñoñe'ẽjoapi mávatapa ha'e kuérava upe ojererekótava mba'eguasuvéva ramo. 25Jesús katu he'i ichupe kuéra:
--Umi tetã megua mburuvicha oporoguereko ipoguýpe kuéra, ha umi oguerekóva tetã nguéra ári autoridad oñembohéra mba'e porã apoha; 26peẽ kuéra katu ndaupéicha va'erãi; pe mba'eguasuvéva pende apytépe, toiko pe imitãvévaicha uvei, ha pe mburuvicha katu toiko tembiguáicha. 27¿Mávapa mba'e guasuve, pe oguapýva mesápe okaru haguã terãpa pe tembiguái? ¿Ndaha'éipa pe oguapýva mesápe? Ha che niko aiko pende apytépe tembiguáicha.
28‘Peẽ niko peime tapia va'ekue chendive pe che jehasa asy kuéra jave. 29Upéva rehe che ame'ẽta peẽme peteĩ reino, che Ru ome'ẽ haguéicha chéve avei, 30pekaru ha pey'u haguã che mesápe che réinope; ha peguapy haguã mburuvicha guapyhápe pejuzga haguã umi doce tribus Israel reheguápe.
Jesús he'i Pedro onegataha ichupe
31He'i avei Ñandejára Jesucristo:
--Simón, Simón, péinako Satanás ojerure kuri pende rehe pene mbokuchu haguã trigo oñembokuchu háicha yrupẽme; 32che katu ajerure kuri nde rehe Tupã Ñandejárape ani haguã ikangy pe nde jerovia. Ha nde, rejere jevy rire, emombarete jevy nde ryvy kuérape.
33Simón katu he'i ichupe:
--Che Jára, aime aha haguãicha nendive cárcelpe terã amano haguã jepe nendive. 34Jesús he'i ichupe:
--Pedro, ha'e ndéve pe gallo osapukái mboyve ko árape nde eréta mbohapy jevy nda che kuaaiha.
Oñemo'aguĩ pe ipaharã
35Upérõ Jesús oporandu ichupe kuéra:
--Pomondo ramo guare vosa'ỹ rehe, plata ryru'ỹ rehe, ha py rehegua'ỹ rehe, ¿oimépa ra'e ofalta va'ekue peẽme?
Ha ha'e kuéra he'i:
--Ahániri.
36Ha he'i ichupe kuéra:
--Ko'ãga katu pe oguerekóva vosa, togueraha, ha plata ryru avei; ha pe oguereko'ỹva kyse puku katu tome'ẽ ijahoja hepyrã rehe, ha tojogua peteĩ. 37Ha'éko peẽme tekotevẽha oikopa hekoitépe che rehe pe Tupã Ñandejára Kuatiañe'ẽ Marangatúpe he'íva: “Ojerereko ichupe umi tekove vai peteĩva ramo.” Pe che rehe oje'e va'ekue oikopa vaerã katuetei.
38Ha'e kuéra katu he'i:
--Ore Jára, péina niko ko'ápe mokõi kyse puku.
Ha ha'e he'i ichupe kuéra:
--Iporãmante.
Jesús oñembo'e Getsemaníme
39Ha osẽ oho, jepiguáicha, Olivo cérrope, ha hemimbo'e kuéra oho avei hendive. 40Ha oguahẽ rire he'i ichupe kuéra:
--Peñembo'éke ani haguã peñepy'ara'ã.
41Ha Jesús oñemomombyry ichugui kuéra ku ita ojepoíva mombyrykuéicha, ha oñesũ oñembo'e, 42ha he'i:
--Che Ru, reipota ramo na eipe'a che hegui ko jepy'apy asy arekóva; opáichavo, ani oiko che rembipota, pe ne rembipotánte toiko.
43Ha upévo ojechauka ichupe peteĩ ángel yvága pegua omombarete haguã ichupe. 44Ha ojepy'apy eterei jave, oñembo'e mbareteve; ha pe hy'aikue ho'a yvy peve tuguy tyky guasúicha.
45Opu'ã rire pe oñembo'ehágui, oho hemimbo'e kuéra rendápe, ha ojuhu okepa hikuái mba'embyasýgui; 46ha he'i ichupe kuéra:
--¿Mba'érehe piko peke? Pepu'ã ha peñembo'e ani haguã peñepy'ara'ã.
Jesús ojereraha preso
47Oñe'ẽ jave gueteri hína ha'e, oguahẽ sapy'a ko genteta, ha pe hérava Judas, umi doce hemimbo'e kuéra peteĩva, ou henonderã kuéra, ha oñemboja Jesús rendápe ha obesa ichupe. 48Jesús katu he'i ichupe:
--Judas, ¿peteĩ beso reheve piko reme'ẽ ko kuimba'éicha ou va'ekue yvy áripe?
49Ha umi oĩ va'ekue hendive, ohechávo pe oikóva oporandu ichupe:
--Ore Jára, ¿roporokutútapa espádape?
50Ha peteĩ umi ha'e kuérava oikytĩ pe pa'i ruvicha guasu rembiguáipe, ha oipe'a ichugui pe inambi ijakatúa pegua. 51Jesús katu he'i:
--Iporãmante; peheja.
Ha opokóvo pe tembiguái nambi rehe omonguera. 52Ha he'i Jesús umi pa'i ruvicha ha tupao ñangarekoha ruvicha ha karai kuérape, ou va'ekue hekávo:
--¿Mondaha rekávoichapa pesẽ espada ha yvyra reheve? 53Opa árapemi aime penendive tupaópe, ha napemopu'ãi pende po che rehe; opáichavo, kóva ha'e pende hora ha pe pytũ rehegua pu'aka.
Pedro onega oikuaaha Jesúspe
54Ha oapresa hikuái Jesúspe ha ogueraha pe pa'i ruvicha guasu rógape; Pedro katu oho hapykuéri puku. 55Ha ojatapy hikuái pe korapy mbytépe ha oguapypa ijerekuévo, ha Pedro oguapy avei ijapytépe kuéra. 56Ha peteĩ mitãkuña tembijokuái ohechávo ichupe oguapyha hína pe tata ypýpe, opyta oma'ẽ porã hese, ha he'i:
--Kóva avei oĩ kuri hendive.
57Pedro katu onega ha he'i:
--Kuñatai, che ndaikuaái ichupe.
58Uperiremínte ambue ohechávo ichupe he'i:
--Nde ha'e kuérava avei.
Ha Pedro he'i:
--Kuimba'e, che ndaha'éi.
59Ha uperire una hora haguépeicha, oime ambueve he'i jevy jevýva:
--Añetehápe kóva oĩ avei hendive kuri, galileaygua voi avei niko.
60Pedro katu he'i:
--Kuimba'e, ndaikuaái upe eréva.
Ha upévove, Pedro oñe'ẽ jave gueteri hína, peteĩ gallo osapukái. 61Ha oñembojere Ñandejára Jesucristo oma'ẽ Pedro rehe, ha imandu'a Pedro pe ñe'ẽ Ñandejára Jesucristo he'i va'ekue ichupe rehe: “Pe gallo osapukái mboyve, ko árape, nde eréta mbohapy jevy nda che kuaaiha.” 62Ha Pedro osẽ okápe ojahe'o soro.
Oñeñembohory Jesús rehe
63Ha umi kuimba'e oñangareko va'ekue hína Jesús rehe oñembohory hese ha oinupã ichupe; 64ohesajokua, oinupã hova rupi, ha he'i ichupe:
--Ere, ¿mávapa nde rovapete ra'e?
65Ha heta mba'e tie'ỹ he'ive hikuái ichupe.
Jesús Concilio renondépe
66Ha ko'ẽma ramo, oñembyaty hikuái upe tetã megua karai kuéra, pa'i ruvicha ha mbo'ehára kuéra, ha ogueraha hikuái Jesúspe pe oñembyatyhápe, ha oporandu ichupe:
67--¿Ndépa ha'e pe Cristo? ere oréve.
Ha ha'e he'i ichupe kuéra:
--Ha'e ramo peẽme ha'eha, nda pe che rerovia mo'ãi; 68ha aporandu ramo peẽme, ndapeje mo'ãi chéve terã ndapepoi mo'ãi che hegui. 69Opáichavo, ko'ãga guivéma voi ko kuimba'éicha ou va'ekue yvy ári oguapýta Tupã Ñandejára Ipu'akapáva akatúape.
70Ha oĩ haguéicha oporandu hikuái ichupe:
--¿Aipóramo piko nde Tupã Ñandejára Ra'y?
Ha Jesús he'i ichupe kuéra:
--Che ha'e, peẽma voi peje haguéicha.
71Upérõ ha'e kuéra he'i:
--¿Mba'épa ñaikotevẽve oñemombe'u ñandéve? Ñandete voi ñahendupa ramóva ijurúgui.
Guaraní New Testament, Buenas Nuevas para el Paraguay © Paraguayan Bible Society, 1970.