SAN MATEO 7
7
Nágkólteme aksa kélyekpelchémo aptémakxa kélmók
(Lc 6.37-38,41-42)
1“Nágkólteme aksa kélyekpelchémo aptémakxa kélmók, yakwayam enxoho metnehek apyekpelchémo Dios kéltémakxa kéxegkáxa. 2Hakte sat nahan exnéshok Dios apteme apyekpelchémo kéxegke m'a ekwánxa enxoho kélteme kélyekpelchémo kélmók; sat nahan exnéshok Dios apkelyetsáteyak kéltémakxa kéxegke m'a ekwánxa enxoho kélyetsáteyak aptémakxa kélmók.#Mr 4.24. 3¿Yaksak ektaha kéllano nak kéxegke kélyáxeg ekyéxakxo pa'at nekha, megkaxénak kélwáxok ekyetna kéxegkáxa ekyéxakxo yámet nekha ekyawe? 4Yetneyk agkok kéxegke ekyéxakxo yámet nekha ekyawe, ¿háxko katnehek kólewának kóltehek kólána kélyáxeg se'e: ‘Heyho hana alekkesek xép pa'at nekha ekyéxakxo nak.’? 5¡Kéxegke kélmeyókásamáxkoho nak kéltémakxa! Kóllek sekxo' kéxegke xa ekyéxakxo ekyawe nak, keñe sat katakmelek kélweté yakwayam kóllekkesek pa'at nekha ekyéxakxo m'a kélyáxeg.
6“Nágkólmés aksa aksok ekpagkanamaxche semheg, kataknawékxak katnehek kéxegke, kalyeptek kéxegke. Nágkólyenyaw nahan aksok ekmomnáwa kélagkok apkelyagkakxa yátapomap; elteyammaha katnehek.
Nelmaxnagko, negketamso tén han neltémo hẽllekkesek átog
(Lc 11.9-13; 6.31)
7“Kólmaxna, egkések sat Dios; kólchetam, kólwetekxak sat; kólpakmeswom nekha átog, kólmeykesesek sat. 8Kéxegke ektahakxa enxoho kélmaxnagko, kólxawak sat; keñe kéxegke ektahakxa enxoho kélchetamso, kólwetekxak sat;#Dt 4.29; 2 Cr 15.2-15; Jer 29.13. keñe kéxegke ektahakxa enxoho kélpakméswayam nekha átog, kólmeykesesek sat.
9“¿Kólmések enxeykel'a kéxegke kélketchek xama meteymog apkelmaxneya enxoho kelpasmaga?” 10¿Yéwa enxeykel'a anhan kólmések apkelmaxneya enxoho xama kelasma? 11Kélya'ásegkok agkok kélméso aksok eltakmela kélketchek kéxegke kéltaha nak ekmaso kéltémakxa ¡Sat eyke ekyagwánxa agkok elmésagkok aksok eltakmela énxet'ák ektahakxa enxoho apkelmaxnagko aksok ma'a Kélyap apha nak néten!#Jn 14.13-14; 15.7,16; 16.23-24; 1 Jn 3.21-22; 5.14-15.
12“Kólhésho cha'a mók ma'a kélámenyéxa enxoho kéxegke etnésesek kélnámokkok;#Lc 6.31. hakte cháxa eltémókxa nak antehek segánamakxa xa, tén han ma'a apnaktáxeséyak axta énxet'ák apkellegaso axta Dios appeywa.
Ektahakxa nak ketsék átog
(Lc 13.24)
13“Kólántex kéxegke m'a ektahakxa nak ketsék átog, hakte awanhek átog ekmaheyak nak ma'a sẽlmaséseykenxa nak, awanhek nahan ámay, awanhek nahan exma, awanhek nahan ekpayhakxa, apxámok nahan énxet apkelyetleykekxa xa ámay nak; 14keñe ketsék ma'a átog ekmaheyak nak ekyennaktamakxa nak egnenyek, askehek nahan negyetlo, apkántawók nahan énxet apweteykekxa xa ámay nak.#Sal 1.6; Pr 4.18-19.
Ekyexna aksa keykpelchaxkohok ma'a yámet
(Lc 6.43-44)
15“Kólawho kéxegke énxet'ák apkelmopwána amya'a nak, apkelxeyenmol'a ektaha eñama Dios ma'a apkeltenneykha nak. Nekkések cha'a exnésakpohok ey'áwak kéxegke xa énxet'ák nak, aksok nawha'ák ello eyke. 16Kélwanchek kéxegke kólyekpelkohok ektémakxa apkeltamheykha, hakte megkanakxamáxchek cha'a anmen yámet ekyexna ektekkeso m'a yámet ekha am'ák nak, keñe higo ekyexna magkanakxamáxko cha'a eñama aptekkeso m'a pegke. 17Ekyókxoho yámet eltakmela nak, katekkesek cha'a ekyexna eltakmela, keñe m'a yámet ekmaso nak, asagkók nahan katnehek ekyexna. 18Yawanchek kasók ekyexna m'a yámet ektakmela nak, yawanchek nahan katakmelek ekyexna m'a yámet ekmaso nak. 19Kólyakténhok nahan cha'a m'a ekyókxoho yámet ekmaso nak ekyexna, keñe kólchexak ma'a nátex.#Mt 3.10; Lc 3.9. 20Kélwanchek sat kólyekpelkohok kéxegke xa énxet'ák nak eñama m'a apkeltémakxa.#Mt 12.33.
Háwe sat apyókxoho énxet yakwayam elántexek ma'a aptémakxa nak Wese' apwányam Dios
(Lc 13.25-27)
21“Háwe sat apyókxoho elántexek aptémakxa Wese' apwányam Dios ma'a énxet'ák aptéma nak cha'a apkelpeywa hexének se'e: ‘Wese', Wese' ahagkok’, wánxa sat elántexek ma'a énxet'ák apkelané nak Táta apmopmenyého, cham'a apha nak néten. 22Apxámok sat énxet etnehek heyának ekhem nelyekpelchamáxchexa sat se'e: ‘Wese', Wese' ahagkok, neltenneykha axta cha'a negko'o apwesey exchep, nelántekkesegkek axta negko'o kelyekhama' eñama apwesey exchep, nenláneyak axta nahan aksok sempelakkaso nak agweta' eñama apwesey exchep.’ 23Keñe sat ko'o atnehek wátegmowagkok se'e: ‘Malyekpelchágweykmok ahagko' ko'o kéxegke’ ¡Kólmohok ma'a teyp, kéxegke kéltaha nak ekmaso kéltémakxa!’#Sal 6.8.
Tegma ekmaso kélpekkenma kóneg tén han ma'a ektakmalma nak kélpekkenma kóneg
(Mr 1.22; Lc 6.47-49)
24“Kéxegke ektahakxa enxoho kélháxenmo sekpeywa keñe kóllának ma'a sektahakxa enxoho sekpeywa, máxa kóltehek ma'a énxet ekhal'a apya'áseykegkoho apkeláneya axta tegma ekyetnakxa meteymog. 25Wakteyk axta mámeye, tekkek axta anhan yegmen ma'a wátsam, tekkek axta anhan exchahayam ekyennakte agko' yakwayam kategkesek xa tegma nak, wánxa agkok, axta eyke etyekmok, hakte yetneyk axta meteymog ektaha ekyennaktéso xa tegma nak. 26Keñe kéxegke kéltaha nak kélháxenmo aksa sekpeywa keñe megkólanyek ma'a sektahakxa enxoho sekpeywa, máxa kóltehek ma'a énxet mey'áseyak aksok la'a, cham'a apkeláneya axta apxagkok ekyetnakxa yagkamex. 27Wakteyk axta mámeye, tekkek axta anhan yegmen ma'a wátsam, tekkek axta anhan exchahayam ekyennakte agko' yakwayam kategkesek xa tegma nak, apteyekmek axta xa tegma nak, apketsagkáseykpok apagko' axta nahan.”
28Xama axta appenchesa apkeltenneykha Jesús, pelakkasek axta apwet'a énxet'ák ektahakxa axta apkelxekmóso Jesús, 29hakte apkeltennáha axta yetlo ekyawe agko' kélyaheykekxoho, axta kaxnawok ektémakxa apkelxekmóso m'a énxet'ák apkelxekmóso nak ektémakxa segánamakxa.#Mr 1.22; Lc 4.32.
Lengua Sur (Enxet) New Testament © United Bible Societies, 1992.