SAN MATEO 3
3
Juan el Bautista apkeltenneykha yókxexma meykexa énxet
(Mr 1.1-8; Lc 3.1-9,15-17; Jn 1.19-28)
1Apwokmek axta Juan el Bautista yókxexma meykexa énxet ma'a Judea, cham'a ekhem axta, apkeltennáha axta anhan. 2Axta etnohok cha'a apkeltenneykha s'e: “¡Kólyakmagkas kélwáxok, chágketwa'ak ma'a aptémakxa nak Wese' apwányam Dios!”#Mt 4.17; Mr 1.15.
3Juan axta m'a ekyetnama axta aptáxéso weykcha'áhak Isaías, aptaha axta Dios appeywa aplegaso, aptéma axta appeywa s'e:
“Xama énxet apteme apkelpáxameykha
yókxexma meykexa énxet se'e:
‘Kóllanés Wese' egegkok ámay apagkok;
Kólpékesho kélláneso xama ámay.’ ”#Is 40.3.
4Yágyatnáxeg apwa' axta kéllané aptaxno m'a Juan, aksok nawhak empehek axta apteté nepxet,#2 R 1.8. sawa' axta aptók, tén han ma'a aksok senlálektamo nak égmenek eñama naxma. 5Apkelxegkek axta énxet'ák apkeleñama Jerusalén, tén han ma'a énxet'ák apkeleñama axta yókxexma Judea, tén han ma'a apkeleñama axta keto' wátsam Jordán, yakwayam yeyxwomhok Juan apkeltenneykha. 6Apkelxénágkek axta ektémakxa melya'asáxma, keñe axta Juan apyakpasásegko yegmen ma'a wátsam Jordán.
7Xama axta apwet'a Juan apxáma apkelwayam fariseos tén han saduceos apkeltamho eyakpásesagkok yegmen, aptahak axta apkeláneya s'e: “¡Kélhawók kéxegke yéwa!#Mt 12.34; 23.33. ¿Yaksak eltennaso kéxegke peya kólwagkasaxchek teyp neyseksa m'a kéllegasáseykegkoho ekmaso agko' eyágketwa'a nak? 8Kólteme ektakmela kéltémakxa yakwayam enxoho kataxchek eyámnaksoho kélyakmagkaso kélwáxók. 9Nágkaxén aksa kélwáxok kólwagkasaxchek teyp kéltaha enxoho kélxénáxkoho kélagko' se'e: ‘Negko'o nenteme Abraham aptawan'ák neptámen’;#Jn 8.33. hakte kawomhok aptemesáseykekxa Dios Abraham aptawan'ák neptámen se'e meteymog nak. Nakso' xa sektahakxa nak seláneya kéxegke. 10Kélpekkenwokmek kaxwo' póte m'a yámet awhak nak, yakwayam kayakténnaxchek kepmenák. Ekyókxoho yámet ekmaso nak ekyexna, kayakténaxkohok cha'a, neyseksa táxa nahan kólchexa'.#Mt 7.19. 11Yegmen ko'o ekmáha sekyakpásásegko kéxegke yegmen yakwayam enxoho wának kólyakmagkasek kélwáxok; wánxa agkok, énxet apxegakmo nak netámen ko'o eyakpásesagkok sat kéxegke Espíritu Santo tén han yetlo táxa. Apmopwána eghak ma'a maxnawok ko'o, megkapayhawok alsókasek ko'o apkeltéto apmagkok. 12Apsókmók nahan pála apagkok ma'a, yaxñásesek sat hótahap, elyetnakhaksek sat ma'a pa'at apák nak. Exatmok sat hótahap apagkok ma'a tegma kéltakmelchesamakxal'a, sat eyke elwatnegwakxak pa'at apák ma'a megkaspóneykxa nak táxa.”
Jesús kélyakpáseso yegmen
(Mr 1.9-11; Lc 3.21-22)
13Yókxexma Galilea axta apkeñamak Jesús apmahágko m'a wátsam Jordán, cham'a aphakxa axta Juan, yakwayam enxoho eyakpásesek yegmen Juan ma'a Jesús. 14Axta eykhe emokok sekxo' Juan. Aptahak axta apcháneya s'e:
—Ko'o eyke payhawók heyakpásesek xép yegmen, ¿Yaksak ektaha sey'awa nak apkeltamho ayakpásesek yegmen?
15Aptahak axta apchátegmowágko Jesús se'e:
—Etne xa seltamhókxa nak etnehek, hakte payhawók anlának ekyókxoho m'a ekpéwo nak anlának nápakto' Dios.
Keñe axta apkelyahákxoho Juan. 16Aptekkek axta Jesús neygmen natámen kélyakpáseso yegmen. Mayhekxeyk axta néten, keñe axta apwet'a Jesús apweywento Dios Espíritu apagkok ekpayhókxa apkenmágkaxa, máxa axta aptahak wáx'ay. 17Legáxchek axta kélpeywa eñama néten, entahak axta s'e: “Keso hatte seyásekhayo nak ko'o s'e, selyéseykha ahagko' axta.”#Gn 22.2; Sal 2.7; Is 42.1; Mt 12.18; 17.5; Mr 1.11; Lc 9.35.
Lengua Sur (Enxet) New Testament © United Bible Societies, 1992.