SAN LUCAS 23
23
Jesús kélyentama nápakto' Pilato
(Mt 27.1-2,11-14; Mr 15.1-5; Jn 18.28-38)
1Apsawhekpók axta apchaknákxo néten énxet'ák, keñe axta kélyentamákxo Jesús aphakxa Pilato. 2Nápakto' Pilato axta kéltamhok kólsexnenak Jesús, entahak axta amya'a apxénákpo s'e:
—Negwet'ak axta negko'o apkelyáteyágkoho énxet etekkesek ekmaso s'e énxet nak. Apxénchek axta megkapayhawok agmések selyakye wese' apwányam Roma, apxeyenmék nahan aptaha Mesías, tén han aptaha Wese' apwányam.
3Aptahak axta apkelmaxneyeyncha'a Pilato Jesús se'e:
—¿Xépya judíos Wese' apwányam apagkok?
—Cháxa aptahakxa nak appeywa exchep —axta aptahak apchátegmowágko Jesús.
4Keñe axta aptaha Pilato apkeláneya énxet'ák apkelámha amonye'e appasmo apkelmaxnéseso Dios énxet'ák apagkok se'e, tén han ma'a énxet'ák:
—Mateyk ko'o xama aksok ekmaso apkelané s'e énxet nak.
5Apyánchesakmók axta eyke apkelyennaktésamo apkelpeywa. Aptahak axta s'e:
—Apkelyáteyagkok etekkesek ekmaso apyókxoho énxet negheykegkaxa eñama m'a ektémakxa nak apkelxekmóso. Axta apchénawók aptekkeso ekmaso m'a Galilea, temék nahan kaxwo' se'e Judea.
Jesús kélya'aso aphakxa Herodes
6Xama axta apleg'a Pilato xa, aptegyáha axta amya'a apkeltamho ey'asagkoho nakso' kexaha apkeñama Galilea xa énxet nak. 7Xama axta kéltennasa aptaha apkeñama Galilea, apcháphásek axta aphakxa Herodes, aptaha axta wese' apchásenneykha apkeláneykha yókxexma Galilea, chakhawók axta anhan apmahágkaxa Herodes ma'a tegma apwányam Jerusalén. 8Xama axta apwet'a Herodes Jesús, payhekxeyk axta apwáxok, hakte nano' axta apmáheyo éta', eñohok axta cha'a amya'a exénakpok, apmenyék axta anhan éta' elának aksok sempelakkaso nak agweta'. 9Xámok axta apkelmaxneyeykha, axta eyke yátegmowágkok Jesús. 10Apháha axta anhan énxet apkelámha apmonye'e appasmo apkelmaxnéseso Dios énxet'ák apagkok ma'a, tén han ma'a énxet'ák apkelxekmóso nak apnámokkok ektémakxa segánamakxa, apyánchesakmok axta apxeyenma ekmaso Jesús xa énxet nak apkeltamho esexnena'. 11Keñe axta aplágwokmo Herodes tén han ma'a sẽlpextétamo apagkok, apáwa aptakmela axta kéltaxneyásekxak Jesús ektémol'a wese' apkelnakta peya yesmésakpok. Keñe axta Herodes apcháphásekxo makham Jesús aphakxa Pilato. 12Axta chénhok apkelásekhamakpekxoho Pilato Herodes ma'a, apkenmexma axta eykhe nano' axta.
Jesús apxénamap yakwayam emátog
(Mt 27.15-26; Mr 15.6-15; Jn 18.39—19.16)
13Apchánchesákxeyk axta Pilato apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák apkelmeykha nak apnámokkok, tén han ma'a apyókxoho énxet'ák. 14Aptahak axta Pilato apkeláneya énxet'ák se'e:
—Kéxegke axta selyentegkáseyam se'e énxet nak, kélxénchek axta anhan apkelyáteyágkoho etekkesek ekmaso énxet'ák; elmaxneyágkok axta ko'o seltamho ay'asagkohok ektakmela kélnápakta'awo' kéxegke, akke ko'o ót'ak aksok ekmaso apkelané eksexnenagko xama enxoho, cháxa kéltahakxa nak kélpeywa kéxegke. 15Mét'ak nahan Herodes, ékeso eñamakxa segáphasáseykxo nak makham. Kélwet'ak kéxegke méko xama aksok ekmaso apkelané ekpayhawo emátog se'e énxet nak. 16Añásesagkohok sat aksa, keñe sat eynyekxa'.
17Enyekxohok axta cha'a Pilato xama énxet apmomap yakwayam kalkohok apwáxok énxet, neyseksa elánamáxche ekhem melwagkayam kéltéma nak Pascua.
18Wánxa agkok, apyókxoho énxet axta eyke aptahak apkelyennaktésawo apkelpeywa s'e:
—¡Yána emátog xa! ¡Enyekxa' m'a Barrabás!
19Kañe' sẽlpextétamakxa axta kélhésók xa Barrabás eñama m'a aptekkeso axta ellámáxche nepyeseksa tegma apwányam, tén han eñama m'a ekyetno axta apyógkexma. 20Apmenyék axta eykhe ényekxak Pilato m'a Jesús, ékeso eñamakxa appakméteykxo axta makham; 21yágwokmók axta eyke apkelyennaktésamo apkelpeywa énxet'ák. Aptahak axta s'e:
—¡Epetches aksok ektegyéso! ¡Epetches aksok ektegyéso!
22Antanxo axta entahak apteme apkelpakhetcheso Pilato énxet se'e:
—¿Yaksak aksok ekmaso apkelané? Mót'ak ko'o xama aksok ekmaso apkelané ekpayhawo nak emátog. Añásesagkohok sat, keñe sat eynyekxa'.
23Apkelenxanakmok axta eyke apkelyennaktésamo apkelpeywa énxet apkeltamho kólyepetchesek aksok ektegyéso Jesús; apxakak axta anhan aksok apmopmenyého, hakte axta elwátesakmok apkelyennaktésamo apkelpeywa. 24Apmokók axta elának Pilato m'a apcháneyákpexa axta etnehek; 25apyenyekxeyk axta m'a énxet ektaha axta kélyeseykha, cham'a apha axta sẽlpextétamakxa eñama aptekkeso ellámáxche nepyeseksa tegma apwányam, tén han eñama m'a ekyetno apyógkexma. Keñe axta Pilato apmésa Jesús xa énxet'ák nak, yakwayam enxoho etnésesek ma'a apmokókxa enxoho etnésesek.
Jesús kélyepetcheso aksok ektegyéso
(Mt 27.32-44; Mr 15.21-32; Jn 19.17-27)
26Xama axta kélyentama Jesús yakwayam kólyepetchesek aksok ektegyéso, apmákpek axta xama énxet apkeñama axta Cirene, yókxexma axta apkenyektak ma'a, kéltamhok axta epatmok aksok ektegyéso yakwayam eswok neptámen Jesús.
27Apxámok axta énxet apyetlo Jesús, tén han kelán'ák. Kellekxagweyha axta elano Jesús, kelpayheyha axta anhan atña'ák eñama ellapwámeyak. 28Apkelanawók axta Jesús. Aptahak axta apkeláneya s'e:
—Kelán'ák kéleñama nak Jerusalén, nágkóllekxagwaha hellanok ko'o, kóllekxagwaha kaxének kélwáxok kéxegke kélagko', tén han ma'a kélketchek. 29Hakte kammok sat ekhem yakwánxa etnehek apkelpeywa énxet se'e: ‘Eleñémo agko' kelán'a megkamowána nak kótak étche, tén han kelán'ák megkatnama nak makham nakláwa xama enxoho, tén han ma'a megkéyegko nak makham nam'agkok sakcha'a.’ 30Keñe sat etnehek yának énxet'ák egkexe s'e: ‘¡Hegahapwata' negko'o!’, keñe sat etnehek nahan yának egkexe étkók se'e: ‘¡Hẽlpós negko'o!’#Os 10.8; Ap 6.16. 31Kéltemésesek agkok yámet elyapakmaté nak áwa' xa ektaha nak, sat eyke ekyagwánxa agkok ma'a yámet ektaha nak apák.
32Kélnaklókek axta anhan apkánet énxet elmasagcha'a apkeltémakxa, yakwayam kólyepetcheshok aksok ektegyéso xamo' Jesús. 33Xama axta kélwagkasa m'a yókxexma kéltémakxa axta ekyetnamakxa kélpátexchapok, kélyepetchesek axta aksok ektegyéso Jesús, tén han ma'a apkánet énxet elmasagcha'a axta apkeltémakxa, xama axta kélchexnak ekpayhókxa nak apkelya'asamakxa, keñe axta pók kélchexna ekpayhókxa nak nepsagkalwa. 34Aptahak axta Jesús se'e:
—Táta, ná eyakmagkásekxa apkeltémakxa xa énxet'ák nak, hakte melya'ásegkok xa aksok apkelánégko nak.
Xama aksok axta aptawásegkok sẽlpextétamo yakwayam enxoho katakmelhok apmelassamap Jesús aptaxno.#Sal 22.18. 35Apháha axta énxet apkeláneyncha'a m'a, wokmók axta apkesméso Jesús ma'a énxet'ák apkelámha apmonye'e axta nepyeseksa judíos. Aptahak axta apcháneya s'e:
—Apkelwagkasegkek axta teyp énxet, ewagkasakpoho apagko' teyp kaxwo' nak, eyámnaksoho enxoho aptaha Mesías apkeñama Dios, tén han ektaha enxoho Dios apkelyéseykha.
36Sẽlpextétamo axta anhan apkesmeyásak Jesús. Apyepetchegwokmók axta, keñe axta apmésa apkeltamho ének vino ekmáske agko'. 37Aptahak axta apcháneya s'e:
—¡Nakso' agkok aptaha exchep judíos wese' apwányam apagkok, ewagkasakpoho apagko' teyp!
38Yetneyk axta anhan kéltáxeso néten aksok ektegyéso ektéma axta kéltáxeso s'e: “Enxet'ák judíos wese' apwányam apagkok se'e.”
39Xama énxet ekmaso aptémakxa apyexnamo xamo' Jesús axta apyamatcháseyha. Aptahak axta apcháneya s'e:
—¡Nakso' agkok xép aptaha Mesías, ewagkasakpoho apagko' teyp, hẽlwagkas nahan negko'o xa teyp!
40Wánxa agkok, appakhetchesek axta eyke apxegexma m'a pók. Aptahak axta apcháneya s'e:
—¿Yagyekak xép Dios? Hawók xép xa ektahakxa kéllegasáseykegkoho xa énxet nak. 41Payhawók negko'o anlegagkohok ektahakxa nak sẽlegasáseykegkoho, hakte payhawók kaxhok mók ma'a ekweykenxal'a nenlané aksok ekmaso; akke elaneyk xama aksok ekmaso xa énxet nak.
42Keñe axta anhan aptaha appeywa s'e:
—Jesús, kaxén sat apwáxok ko'o aptaha sat Wese' apwányam xép.
43Aptahak axta apchátegmowágko Jesús se'e:
—Sakhem sat hexhok xamo' xép ma'a yókxexma apkelmaheykegkaxa nak Dios énxet'ák apagkok apkeletsapma. Nakso' xa sektahakxa nak seyáneya exchep.
Jesús apketsapma
(Mt 27.45-56; Mr 15.33-41; Jn 19.28-30)
44Yetseksókhem axta chénawók ekyaktesóxma ekyókxoho m'a yókxexma nak, ekweykmoho las tres taxnam. 45Massék axta elsasáxma ekhem, keñe axta apyepteykpo nepyeseksa m'a apáwa#Ex 26.31-33; 2 Cr 3.14. apyexnama axta kañe' tegma appagkanamap. 46Aptahak axta Jesús apyennaktésawo appeywa s'e:
—¡Táta, eltamhok ko'o emok xép ehagak!#Sal 31.5; Hch 7.59.
Xama axta aptaha appeywa xa, keñe axta apketsapa.
47Xama axta apwet'a sẽlpextétamo apkemha apmonye ektahakxa, apkeltemésesek axta apcheymákpoho Dios. Aptahak axta s'e:
—Nakso' nak axta eyke agkok aptaha meyke aptémakxa s'e énxet nak.
48Apkeltakhákxeyk axta yetlo apkeltekpageykha cha'a apnenya'ák apyókxoho énxet'ák ektaha axta apkelwayam ma'a, ektaha axta anhan apkelweteykegkoho m'a ektahakxa axta. 49Aphákxeyk axta eyke apkeláneyncha'a makhawo' ektahakxa m'a apyókxoho apkelweteykxa axta Jesús, axta anhan ma'a kelán'ák ektaha axta ekyetlo eleñama m'a Galilea.#Lc 8.2-3.
Jesús kélatawanya
(Mt 27.57-61; Mr 15.42-47; Jn 19.38-42)
50-51Apheyk axta xama énxet ektakmela aptémakxa, aptaha axta anhan appéwomo, apwesey axta José, Arimatea axta apchókxa xa, xama tegma apwányam apyetnama nak ma'a Judea. Nepyeseksa énxet'ák judíos ekyawe kéláyo axta apkeñamak xa. Apkelháxanmeyk axta kawak aptémakxa Wese' apwányam Dios xa José, axta kaleklók apwáxok aptamheykegkaxa axta énxet'ák judíos ekyawe kéláyo nak. 52Apmeyákxeyk axta aphakxa Pilato xa José, keñe axta apkelmaxneya Jesús aphápak. 53Apáwa apcháxñeyo apagko' axta appextétak natámen apleklo néten aksok ektegyéso, keñe axta appekkenwokmo kañe' takhaxpop meteymog kaxwé ekmetmomáxche, axta kólpekkenweykmok makham xama énxet ma'a takhaxpop nak. 54Wokmek axta ekhem apkeláneykekxexa aptamhágkaxa énxet'ák yakwayam eleyxek kammok ekhem apkellókasamakxa apkelyampé, chágketwokmek axta yakwánxa kammok.
55Teyánegwákxók axta takhaxpop kelán'ák ekyetlama axta Jesús eleñama m'a Galilea, kelanawók axta takhaxpop, kelanawók axta anhan ma'a ektahakxa axta kélpekkenma Jesús aphápak.
56Xama axta elwákxo axanák, kelaneykxék axta sokmátsa tén han ma'a kéltexneykegkohol'a egyempehek.
Jesús apxátekhágwayam
(Mt 28.1-10; Mr 16.1-8; Jn 20.1-10)
Kellókasek axta elyampé kelán'ák ekhem apkellókasamakxa axta cha'a apkelyampé énxet'ák judíos, ekhawo m'a elánemaxchexa axta katnahagkok.#Ex 20.10; Dt 5.14.
Lengua Sur (Enxet) New Testament © United Bible Societies, 1992.