SAN JUAN 2
2
Sẽlyamhopma tegma apwányam Caná yókxexma Galilea
1Antanxo ekhem axta entahak keñe axta elánéxko sẽlyamhopma m'a tegma apwányam Caná, yókxexma Galilea. Wokmek axta anhan Jesús egken ma'a. 2Apcháneyakpek axta anhan Jesús yetlo apkeltámeséyak epásegwók xa sẽlyamhopma nak. 3Kelyamásexchek axta vino, entahak axta eyáneya egken Jesús se'e:
—Kelyamásexchek hek vino.
4Aptahak axta apchátegmowágko Jesús se'e:
—Kelán'a, ¿Yaksak ektaha ektaha nak seyáneya xa? Megkawokmok makham ekhem yakwánxa alának ko'o aksok.
5Entahak axta nahan eláneya énxet'ák ektaha axta kélásenneykha s'e:
—Kólyahakxoho sat aptahakxa enxoho apkeláneya Jesús
6Aphágkek axta seis meteymog yátegwáxwa m'a apkelyetmeykegkoho axta cha'a yegmen énxet'ák judíos apmeykha yakwayam elyenyeksek apyempe'ék. Cincuenta litros yegmen axta cha'a xama meteymog yátegwáxwa, setenta litros axta anhan cha'a kawomho'. 7Aptahak axta Jesús apkeláneya énxet'ák ektaha axta kélásenneykha s'e:
—Kóllánesagkoho sat yegmen xa yátegwáxwa nak.
Apkellánesagkok axta nahan. 8Aptahak axta Jesús apkeláneya s'e:
—Kólyáwa sat kaxwo' ketse', kólsakxes sat ma'a ektaha nak apkemha apmonye apkelané sẽlyamhopma.
Apsákxések axta nahan xa énxet'ák nak. 9Apyekkónchek axta yegmen ektamheykekxa vino m'a ektaha axta apkemha apmonye apkelané sẽlyamhopma, axta eyke ey'ásegkok eñamakxa; wánxa axta aksa apkelya'ásegkoho m'a ektaha axta apkelásenneykha, hakte axta apkelyekwé yegmen ma'a. Keñe axta apwónencha'a kaxwé elyamhopma m'a ektaha axta apkemha apmonye apkelané sẽlyamhopma. 10Aptahak axta apcháneya s'e:
—Apyókxoho énxet'ák cha'a yának keynaxchek sekxo' ma'a vino ektakmela nak. Yawak agkok apyenéyak vino ma'a ektaha nak kéláneyeykha, keñe kólagkok ma'a vino meyke ekmomnáwa nak. Keñe exchep aptakmelchesa vino ektakmela ekwokmoho kaxwo' nak.
11Cháxa apkelana axta Jesús émha amonye aksok sempelakkaso agweta' tegma apwányam Caná yókxexma Galilea xa, cham'a apxekmósa axta anhan ektémakxa apcheymákpoho, axta anhan elya'ásekmok apkeltámeséyak.
12Apmeyákxeyk axta Jesús tegma apwányam Capernaum#Mt 4.13. natámen xa. Egken axta apxegexma, tén han apkelyáxeg, tén han apkeltámeséyak; apháha axta yakwatakxoho m'a.
Jesús apcháxñeso tegma appagkanamap
(Mt 21.12-13; Mr 11.15-18; Lc 19.45-46)
13Apmeyákxeyk axta Jesús ma'a tegma apwányam Jerusalén hakte chágketwokmek axta ekhem melwagkayam axta cha'a judíos kéltéma axta Pascua.#Ex 12.1-27; Dt 16.1-8. 14Apwetágweykxeyk axta Jesús kañe' tegma appagkanamap énxet'ák apkexeykekxa weyke yagkelwána, tén han ma'a nekkések, wáx'ay axta anhan. Apwetágweykxeyk axta nahan apheyncha'a ma'a énxet'ák ektaha axta apyakmagkáseykekxa cha'a mók selyakye. 15Xama axta apwet'a Jesús xa, apkelmeyk axta táma apkelana kelyekpexchetma, apkelántekkesek axta yókxexma m'a énxet'ák ektaha axta apheykha kañe' tegma appagkanamap, yetlo nekkések tén han weyke yagkelwána. Appalchesesakmek axta anhan náxop selyakye apagkok ma'a énxet'ák ektaha axta apyakmagkáseykekxa cha'a mók selyakye, apkelyaknegkesásegkek axta nahan mésa. 16Aptahak axta anhan apkelpakhetchesa Jesús ektaha axta apkexeykekxa wáx'ay se'e:
—¡Kólántekkes xa! ¡Nágkólteméses kélyanmagkásamáxchexa Táta apxagkok!
17Keñe axta ekxénwákxoho apwáxók apkeltámeséyak ektéma axta eknaktáxésamaxche s'e: “Eyeykhágwokmók selmeyeykha Xép apxagkok.”#Sal 69.9.
18Aptahak axta apkelmaxneyeyncha'a énxet'ák judíos se'e:
—¿Yaksak aksok sempelakkaso agweta' peya elának xép yakwayam henxekmósek ekpayhawo elának xép xa ektaha nak?
19Aptahak axta apchátegmowágko Jesús se'e:
—Kóltegkes sat se'e tegma appagkanamap nak, antanxo ekhem sat ko'o axátekhásekxak makham.#Mt 26.61; 27.40; Mr 14.58; 15.29.
20Aptahak axta judíos apkelátegmowágko s'e:
—Cuarenta y seis apyeyam axta weykmok apkelánamap se'e tegma appagkanamap nak, ¿Antanxo ekhemya peyk exátekhásekxak makham xép se'e tegma appagkanamap nak?
21Apyókxoho apagko' axta apxénak Jesús cham'a apxéna axta tegma appagkanamap. 22Ekeso eñamakxa ekxeyenwákxoho axta apwáxók apkeltámeséyak aptémakxa appeywa Jesús, cham'a apxátekhágwokmo axta, axta nahan elya'ásekmok apkeltámeséyak ma'a ektémakxa nak ekpeywa eknaktáxésamaxche, tén han ma'a aptémakxa axta appeywa Jesús.
Jesús apteme segyekpelchémo negyókxoho
23Apxámok axta énxet apteme mey'áseyam Jesús neyseksa apha axta Jerusalén ekhem kéltéma axta Pascua, cham'a apkelwet'a axta apkelana Jesús aksok sempelakkaso nak agweta'. 24Axta eyke yeykawok Jesús xa énxet'ák nak, hakte apya'ásegkok axta apkeltémakxa apyókxoho nak. 25Axta keyméxchek kóltennaksek Jesús apkeltémakxa xa énxet'ák nak, hakte apya'áseykegkoho apagko' etnehek ma'a ektémakxa nak elchetamso apwáxók énxet.
Lengua Sur (Enxet) New Testament © United Bible Societies, 1992.