Matiyò 4
4
Deblì mômhì Jisòs
(Mâk 1.12-13; Lûk 4.1-13)
1Afu metì Yohnà Yulena lyi yen nì Jisòs a yi lak yi sùsi shyəma deblì momhi wun afû. 2Wù yen tan afû hì yusa kə ni bè chyə̂ a mu tuk mkìk, yə wi shyə. Yi bàm yi tɨ̂n jìŋ hì yafa wûn. 3Deblì wùt mòmhena ki bên jis ha wun na, “Wò shìki mô kə nâ wâ Fùyèn, jis lê ma ti ghɨna kahi ha mwə̀ mù yə̂ mù, ma wò yə.”
4Jisòs fîsì jis ha wûn na, “Ghɨ nyak a ŋwàklù Fùyèn na, wùt chyə wi kə kum nì shyə yəna, biyani chyə kum nì nâbi yìni gha te Yènfù jìsa.”
5Deblì fî lyi Jisòs yen nì wûn a Jèlusalèm, a mô tèk yì Fùyènì, kwok tom wun a fù ndòŋ ndôŋfù ndâ Fùyèn yì chìk, 6jis ha wun na, “Wò shìki mò kə nâ wâ Fùyèn ni, chyàkti chwo lê a chyə̂, beka ghɨ nyak kəbi a ŋwàklù Fùyèn na: ‘Wù nè jîsà lò ha anjèlsù wunsu kum wò, na su kina wò; ma su kwo njiŋhi wò a nyə̂, ma wò nê tè kùn à jə̀ wulu wa a yi ti.’”
7Jisòs fîsì jis ha wun na, “Ghɨ nyak kəbi ŋwàklù Fùyèn na, ‘Kə bè chinte Bâba Yèn fa fu na fu ni gha.’”
8Deblì fî lyi wûn afû kwok nì wun a tô kùn, yì dà chwûtì lak tu mbyi tu ha wûn kə tù jɨ̀m nì ghak ghe yi mô atɨ̂n, 9wù ki jîs ha wun na, “Mu nè folò mwə̀ munâ mù jɨ̀m ha wò a wu yu afa wò tuma ngwuk sasu a mu ashyə̂ kokhi mu.”
10Jisòs jis ha wûn na, “Kahi a mu yi bàm Satàn! Ghɨ ti nyak a ŋwàklù Fùyèn na, ‘Wò kəta kə hi ngumli ha Bâba Yèn fafu, fêtà kə ha funfu!’”
11Deblì lo chya a wuna ngwùŋ kə wu yu anjèlsù Fùyènsu ben hì kina wûn.
Jisòs yîmì fêt yi wuni a Galìlî
(Mâk 1.14-15; Lûk 4.14-15)
12Jisòs yû na ghɨ ti fa Jon a chyâk, wù kahi lô yena Galìlî, 13wù yen tê ndokò jə̀ hi tè chyə̂ a Nasalì biyani yen hì chyə yi tèk yi Kàbanùm, yi mô yi bi lwi Galìlî, a bàh à laka Sebulùn nì Naftalì. 14Yi tì gan ni hi lunhe gha ye fòktì Ìsayà tì nyàka na: 15Ghàn ghɨt a Sebulùn nì ghàn ghɨt a Naftalì nì ha ghàn ghe ghàn chyə yi bi wu lum wu jwô yì chìk, a mô yi njin yi Jodàn, Ha ghàn ghɨt a yi lak yi Galìlî, kəbi wu lùk afa tumu chyə̂ ghàn hi khə na, 16ghɨt ghe ghɨ chyə a bɨn a finana ti yen ban yi chiki yi ghaka kə ni, bani ti ben a ghɨta tu ghe ghɨna chyə wu lùk, lɨ̂ŋhà kpo bakhe afû.
17Hi yìmì mu tuk afû hi yèn ashyə̂ Jisòs hì fôktè tum à Fùyèn jîsà na, “Ghàn kahi təm ghana a ghàn a sùbe beka fə̂n wù Fùyènù ti bakhâ.”
Jisòs lyi jùmtìbàmsu wunsu shyəsu
(Mâk 1.16-20; Lûk 5.1-11)
18Tuk lefu Jisòs hì gbê yi bi lwi Galìlî, yen wana ne ale à bà. A mô Samùn we ghɨ ndùku toŋte na Bità nì Andùlù, a mô ghɨta kwo yila. Ghɨna tuma wətu a jwô hi kwo a yila. 19Wù jis ha ghɨna na, “Ghàn jumti mu, ma mu nè yiki ghàn, ma ghàn hi bɨlà kwo ghɨta.” 20Kə wu yu, ghɨna de wətu ghɨna tu afû jûmtì yen Jisòs.
21Ghɨt ghɨna shihi yèn, Jisòs fî yen wana ne ale à bà, a mô Jêms ghê Jon, a mwəlà mù Sebedì, ghɨna mô a ngwùk ghê bè ghɨna tumte wətu ghɨna tu. Wù toŋa ghɨna. 22Kə wu yu, ghɨna fwo de bè ghɨna a ngwùk jûmtì yen nì Jisòs.
Jisòs hì yike fê chwuka à ghɨ̂t
(Lûk 6.17-19)
23Jisòs hì gbê chyâ kə lak yi Galìlî yì jɨ̀m fê yike a ghɨna sù ndasu chintesu, fôktè tum yì jùŋ kum fə̂n wù Fùyènù fê chwuka nâbi yìni nki yafi a ghɨta ndùku kəta. 24Gha ghɨ̂n kum fêt yi wuni yi gbî kə lak yi Siliyà yì jɨ̀m, ghɨta shìki lyê ghɨt ghe ghɨ ndùku yafa nâbi nì yìni yafi, ghɨ ben ha wûn. Ghɨ hì bê nì ghɨta ghɨ ywo yi lûm a ghɨna njyàsu wùnsu nâ haŋaŋ, bê nì ghɨta ghɨ kəta yohnù be, bê nì ghɨt a fenana nì ghɨta ma ghɨ ti kə̂blì, wù chwuk kə à jɨ̀m. 25Ghɨta fwu dô kə ni ma ghɨ fwu a Galìlî, fwo a Tù tèk Ìwûm fwo a Jèlusalèm, fwu a Jùdiyà nì a bàh a lak afa wu ndùku mô a yi jin yi jwô à Jodàn hì yênà kə wun a yi bàm.
© Wycliffe Bible Translators, Inc.