Tuk 33
33
Jëk Je-kɔb kɛnɛ E-thɔ
1Täämɛ, mëë ci Je-kɔb ku lët, cuɛ E-thɔ nɛn bëë, kä jälɛ kɛɛl kɛ wutnikɛ ti kur ŋuaan. Kɛ kui̱ ɛmɔ cuɛ gaatkɛ däk kä mänkɛ ni Leya kɛnɛ Re-cɛl kɛ kuaany määnkɛ da̱ŋ rɛw. 2Cuɛ kuaany määnkɛ kɛnɛ gaatkiɛn la̱th nhiam, cu Leya kɛnɛ gaatkɛ jɛ guɔ̱ɔ̱r, kä cu Re-cɛl kɛnɛ gatdɛ ni Jo-thɛp te jɔk. 3Kä jɛn Je-kɔb puɔ̱nydɛ cuɛ kɛ bo̱th kä cuɛ rɔ goŋ ni kä bärɔw amäni min cɛ däman ŋäthikä. 4Kä nɛ̈nɛ jɛ, cu E-thɔ ri̱i̱ŋ kä ne̱e̱rɛ jɛ kä min cuɛ Je-kɔb cim kä cukɛ wiee kɛɛl. 5Täämɛ mëë ci E-thɔ män nɛn kɛnɛ gaatkiɛn, cuɛ thi̱ec i̱, “Kä kɛ ŋaani jäl kɛ ji̱ kɛɛl ti?” Cu Je-kɔb ɛ loc i̱, “Kɛ kɛn gaat tin ci Kuoth kɛ ka̱m ɣä kɛ lɔc kɔ̱a̱cdɛ.” 6Ni ɛn wa̱nɔ cu kuaany mään Je-kɔb kɛnɛ gaatkiɛn rɔ̱ ti̱eec kä cukɛ rɔ̱ goŋ. 7Cu Leya kɛnɛ gaatkɛ kɛ guɔ̱ɔ̱r kä cukɛ rɔ̱ ben goŋ. Kä kɛ kɔrɛ cu Jo-thɛp kɛnɛ man ni Re-cɛl ben kä cukɛ rɔ̱ ben goŋ. 8Ɛ jɛ nɔ, cu E-thɔ Je-kɔb ku thi̱ec i̱, “Ɛ ɣöth ŋukä ni kɛɛliw ɛn ni̱n cä jek däär ɔ?” Cu Je-kɔb ɛ loc i̱, “Kɛ muc ti cä ka̱m ji̱, kuäärä, kɛ ɣöö bi ɣä kulɛ lor kɛ tɛ̈th lɔaac.” 9Kä nɛ̈nɛ jɛ, cuɛ Je-kɔb jiök i̱, “Ɣän ta̱a̱ kɛ ti ro̱ŋ. Gɔaa ni ɣöö a nyinku tekɛ ji̱, dämaar.” 10Cu Je-kɔb ɛ loc i̱, “/Ci ɛ jɛn, mi tɛth lɔcdu kɛ nëndä, kɛ gɔɔy lɔaacdu käni mucdä, kɛ ɣöö nëndä kɛ ji̱ cärɛ nikɛ mi cä Kuoth nɛn, kɛ ɣöö ji̱n ci ɣä lor agɔaa. 11Liɛpä ni ji̱, käp mucdä ëë ci kuaanykä jɛ nöŋ ji̱ kɛ ɣöö ci Kuoth ɣä ciɛŋ ni gɔaa, kä täämɛ ta̱a̱ kɛ ti ro̱ŋ kɛ ɣä.” Kä cuɛ jɛ kok ɛlɔ̱ŋ amäni mëë cu E-thɔ ɛ nhɔk. 12Ɛ jɛn, cu E-thɔ ku wee i̱, “Kuanɛ jiɛn, kä bä kɔn bo̱th.” 13Cu Je-kɔb ɛ loc i̱, “Kuäärä, ji̱n ku jɛ ŋa̱c ɛn ɣöö ja̱lä kɛ gaat ti nyin tiɛtni kɛnɛ ɣöö guɛcä det kɛnɛ ɣɔ̱k ti jäl dɛykiɛn kɛ luëth. Mi wä kɛ wä ja̱l ɛlɔ̱ŋ, cäŋ kuɛɛ la ni cäŋ kɛl, de̱e̱kɛ li̱w ni kɛn diaal. 14Kua̱ mal lip ni ji̱, wër nhiam, kuäärä, kä bä ɣɔ̱k kɛnɛ gaat cu lëër kɔɔru kɛ ɣöö cikɛ bi̱lɛ cuuc amäni mi wa̱a̱ cop kä ji̱ kuäärä ro̱o̱l päämni Ɛ-dɔm.” 15Cu E-thɔ jɛ jiök i̱, “Kä a ji̱ ba̱nyä tha̱a̱ŋ wutni ti ba ji̱ luäk kɛ ja̱l kɛ̈ɛ̈l.” Kä cu Je-kɔb ɛ loc i̱, “Kɛ gɔɔy lɔaacdu, kuäärä, /cu rɔ lɛ jut.” 16Ɛ jɛ nɔ, kɛ jɛn cäŋ ɛmɔ cu E-thɔ jiɛɛn locdɛ ro̱o̱l päämni Ɛ-dɔm. 17Kä jɛn Je-kɔb taŋdɛ cuɛ rɔ ti̱ec dhɔɔr mi cɔal i̱ Cu-koth kä cuɛ rɔ ta̱th due̱l thi̱n kä cuɛ ɣɔ̱ɔ̱kɛ lät kä gɛ̈wni. Kɛ kui̱ ɛmɔ cua gua̱a̱th ɛmɔ cɔl i̱ Cu-koth (min lot ni ɣöö bi̱lɛni).
Cuɔ̱p Je-kɔb kä Cɛ-kɛm
18Ɛ jɛ nɔ, mëë luny Je-kɔb jɔk kä Pa-dan-a-ram, cuɛ cop kɛ mal kä Cɛ-kɛm ro̱o̱l Kɛ-naan, kä cuɛ cieeŋdɛ yiath piny jɔk wec. 19Cuɛ gua̱a̱th muɔ̱ɔ̱n ɛ cɛ rɔ yiëth ciëŋ thi̱n ɔ kɔk kɛ yio̱w ti kuɔ̱r kɛl kä gaat kua̱r wec ɛmɔ mi cɔal i̱ Ɣä-mor, min tekɛ gatdɛ mi cɔal i̱ Cɛ-kɛm. 20Cuɛ yi̱k täth thi̱n mi cuɛ cɔl i̱ Ɛl-ɛ-loy-I-thɛ-rɛl. (Min lot ni ɣöö Kuoth in la Kuoth I-thɛ-rɛl.)
Nuer Bible © Bible Society in South Sudan 1998,2012.