Tuk 30
30
1Täämɛ mëë ci Re-cɛl ɛ ku nɛn ɛn ɣöö ci dap gan ku dha̱l kamädɛ kɛnɛ Je-kɔb, cuɛ nyiman ku til ɛlɔ̱ŋ, kä cuɛ Je-kɔb jiök i̱, “Mi /ci ɣä bi moc gaat, kä bä li̱w.” 2Ɛn wanɛ mɔ cuɛ Je-kɔb lɔcdɛ waŋ kɛ jɛ ɛlɔ̱ŋ, kä cuɛ jɛ jiök i̱, “Ɛ ku ɣän a Kuoth in ci ji̱ pën dap?” 3Ɛ jɛn, cuɛ Je-kɔb ku jiök i̱, “Ja̱ŋ, käni nya läätädä ni Bila kä wër ni̱ni kɛ jɛ, bɛ ɣä cu da̱p gaat ti ba ciöl ɣä, kɛnɛ ɣöö de̱ri ɣä cu da̱p gaat kɛ jɛ.” 4Ɛ jɛ nɔ, cu Je-kɔb Bila cu jak kä ciekdɛ. 5Mëë cikɛ tɔ̱ɔ̱c, cuɛ ruët kä cuɛ Je-kɔb da̱p gat mi dho̱o̱l. 6Mëë cɛ ku dap, cu Re-cɛl ku wee i̱, “Ci Kuoth ɣä ku moc cuɔ̱ɔ̱ŋ kä cɛ palä liŋ kä cɛ ɣä moc gat dhöl.” Ɛ jɛn, cuɛ ciötdɛ cu cɔl i̱ Daan. 7Cu Bila rɔ nyɔk kɛ ruët, kä cuɛ Je-kɔb lɛni da̱p dho̱o̱l mi rɛwdɛ. 8Ɛn wanɛ mɔ cu Re-cɛl wee i̱, “Nhiam Kuɔth cä tɛr cuŋä tɛr kɛ nyimaar, kä cä jɛ tiam.” Kä cuɛ ciötdɛ cu cɔl i̱ Nap-ta-li.
9Kä mëë ci Leya jɛ lɛni nɛn bä ɛn ɣöö ci dapdɛ rɔ ka̱p cuɔ̱ŋ, cuɛ nya läätädɛ ni Dhil-pa ka̱m Je-kɔb kɛ ɣöö bɛ jɛ jak kä ciekdɛ. 10Kä cu nyam ɛmɔ Je-kɔb da̱p gat mi dho̱o̱l. 11Ɛn wa̱nɔ cu Leya cu wee i̱, “Cä ku tekɛ baŋ.” Cuɛ ciötdɛ cu cɔl i̱ Gad. 12Kä cu Dhil-pa Je-kɔb lɛni nyɔk kɛ däp dho̱o̱l dɔ̱diɛn. 13Min ca dho̱o̱l ɛmɔ dap, cu Leya cu wee i̱, “Ci lɔcdä ku tɛɛth kɛ ɣöö bi män diaal ɣä cɔl i̱ ram mi tɛth lɔcdɛ.” Ɛ jɛn, cuɛ ciötdɛ cu cɔl i̱ A-cɛr.
14Kɛ cäŋ kɛl, kɛ gua̱a̱th in ŋe̱r kɛ naath, cu Rɛ-u-ben dɛy jiaath kuany rɛy kakä, kä cuɛ kɛ nöŋ man ni Leya. Ɛn wa̱nɔ min ci Re-cɛl kɛ nɛn, cuɛ Leya lim jiökɛ jɛ i̱, “Mal ɣä ni moc tha̱a̱ŋ dɛɛni jiaath gatdu.” 15Kä nɛ̈nɛ jɛ, cu Leya jɛ jiök i̱, “Ji̱n /ci ŋäc ni ɣöö ɛ mi kuiy gua̱a̱thdɛ ɛn ɣöö ci cɔwdä woc kä ɣä, lɛni kok ni ɣöö bi dɛy jiaath tin ci gatdä kɛ nöŋ ɣä ben mat bä?” Kɛ kui̱ ɛmɔ cu Re-cɛl ɛ ku jiök i̱, “Mi ɛ jɛn ɛnɔ, ɛn wääri bia cu niɛɛn kɛɛl yɛnɛ jɛ mi wi̱i̱ ɣä ka̱m dɛy jiɛn tin ca nööŋ.” 16Ɛ jɛ nɔ, mëë ci Je-kɔb cu luny jɔk guäth ka̱a̱knikɛ kɛ thiaŋ, cu Leya jɛ wä lor kä cuɛ Je-kɔb jiök i̱, “Kɔn ban tɔ̱ɔ̱c kɛɛl ɛn wääri kɛ ɣöö cä ji̱ kɔk kɛ dɛy jiaath ti ci gatdä kɛ nöŋ ɣä.” Kɛ kui̱ kä nɔmɔ cu Je-kɔb niɛɛn kɛɛl kɛ jɛ ɛn wäär ɛmɔ. 17Ɛn guäth ɛmɔ cu Kuoth pal Leya liŋ, kä cuɛ ruët, kä cuɛ dap kɛ gat dhöl min la dhieec dhɔɔlkiɛn kamädiɛn kɛnɛ Je-kɔb. 18Min ci Leya dhɔl ɛmɔ ku dap, cuɛ cu wee i̱, “Ci Kuoth ɣä luɔ̱c kökdä kɛ ɣöö cɛ ŋun ni gat dhöl kɛ ɣöö cä nya läätädä jak kä ciek cɔaadä.” Cuɛ ciötdɛ cu cɔl i̱ Yi-tha-kar. 19Cuɛ rɔ nyɔk kɛ ruët, kä cuɛ dhɔl in bäkɛliɛn lɛni da̱p Je-kɔb. 20Cuɛ cu wee i̱, “Ci Kuoth ɣä ku moc kɛ muc mi gɔaa ni jɛn pa̱ny. A tɛɛmɛ niɛ walɛ bi cɔwdä ɣä ku ciɛŋ thiɛkä, kɛ ɣöö cä jɛ da̱p dhɔɔl da̱ŋ bäkɛl.” Ɛ jɛn, cuɛ ciötdɛ cu cɔl i̱ Dhɛ-bu-lun. 21Kɛ jɔakdɛ cuɛ ku dap kɛ nyaadɛ, cuɛ ciötdɛ cu cɔl i̱ Dina.
22Ɛn wa̱nɔ cu Kuoth lɛni te kɛɛl kɛ Re-cɛl bä, kä cuɛ palɛ liŋ kä cuɛ jɛ luɔc dapdɛ, 23kä cuɛ ruët kä cuɛ dap kɛ gatdɛ. Cuɛ ku wee i̱, “Ci Kuoth buarä woc.” 24Kä cuɛ ciötdɛ cu cɔl i̱ Jo-thɛp, ɛ jɛn i̱, “A Kuoth Nhial mal ɣä nyɔk kɛ muɔ̱c dho̱o̱l dɔ̱diɛn.”
Tuk riäŋä Je-kɔb
25Kɛ kɔr kä mëë ci Re-cɛl Jo-thɛp dap, cu Je-kɔb La-ban ku jiök i̱, “Lony ɣä kä a ɣä luɔcä muunda. 26A naaŋä mänkä kɛnɛ gaatkä tëë jekä kɛ pe̱k läätdä mëë cä lät kä ji̱, kä bä cu wä. Ɛpuc ji̱n ŋäci gɔɔy läätdä min cä lät kä ji̱.” 27Kä cu La-ban ɛ jiök i̱, “Ma̱a̱th, a malä ji̱ la̱r ruacdä. Cä jɛ tit kɛ thuɔ̱k ɛn ɣöö ci Kuoth Nhial ŋɔakä poth kɛ kui̱du. 28Kɛ kui̱ ɛmɔ, lar pe̱k kä tɔ̱ dëë rɔ̱ lot kɛ pe̱k lätni tin ci lät kä ɣä tɔ̱, kä bä kɛ ka̱m ji̱.” 29Kä cuɛ La-ban jiök i̱, “Ɛpuc, ji̱n ŋäci pe̱k läätdä min cä lät kä ji̱, kɛnɛ ti̱et in cä tiit ni ɣɔ̱ɔ̱ku, kä ci dëtku rɔ̱ rep te̱tädä. 30Kä mëë ba̱a̱, jekä ni ti tɔt, kä cikɛ rɔ̱ re̱p ɛlɔ̱ŋ kɛ ɣöö ci Kuoth nyinku poth gua̱thni diaal ti̱n cä wä thi̱n. Kä täämɛ ɣän bä gɔlä ku lɛ lätikä i̱ nɛy?” 31Cu La-ban ɛ thi̱ec i̱, “Ɛŋu mi go̱o̱ri?” Cuɛ jɛ loc i̱, “Thilɛ mi bi ka̱m ɣä, kä nho̱kni ɣä ni min latdä mi, ɣän bä ŋot nikɛ mi yiëënä detku kä bä kɛ yian ɛ ɣän. 32Ɛn walɛ ɣän bä rɛy de̱e̱tku wä car, kä bä rɔɔm diaal tin biɛɛlkiɛn kuac kiɛ cuɔri liɛny go̱lä, kɛnɛ dɛy rɔɔmni diaal tin ca̱a̱r kɛ böwni diaal tin tekɛ biɛl mi kuac kiɛ cor. Kɛn tɔ̱ kɛ kɛn tin bi ro̱ŋ kɛ kök läätädä. 33Kä mi wi̱i̱ wä ben kɛ ɣöö bi tin cä kuany go̱lä ben guic, ji̱n bi jɛ ŋa̱c ni kä kɛɛl ɛn ɣöö ɛ ɣän ram mi lät kɛ thuɔ̱ɔ̱k, kɛ ɣöö mi wi̱i̱ dɛl mi böw wä jek thilɛ biɛl mi kuac kiɛ cor rɛydiɛn, kɛ dɔw dɛ̈ɛ̈l rɔmä mi /ci mɔ ca̱r, ba mi cä kual.” 34Cu La-ban ɛ jiök i̱, “Gɔaaɛ. A jɛ ce̱tnikɛ jɛn mɔ ci car ɔ.” 35Kä nɛ̈nɛ jɛ, ɛn cäŋ ɛmɔ pa̱ny jɛn La-ban puɔ̱nydɛ cuɛ tut de̱e̱t böwni kɛnɛ ŋut de̱e̱t böwni diaal tin kuac kiɛ cuɔri woc, kɛn tin diaal tin cɛ bil kɛ mi bo̱r. Jɛn bä, cuɛ rɔɔm diaal tin ca̱a̱r woc. Kä cuɛ gaatkɛ jak kä yiënkɛ kɛ. 36Cuɛ kɛ jak kä nɔ̱a̱n kɛ gua̱a̱th in te Je-kɔb thi̱n kɛ kam mi ja̱lkɛ kɛ ni̱n diɔ̱k. Kä cu Je-kɔb duɔth de̱e̱t La-ban tin kɔ̱ŋ yien.
37Ɛ jɛ nɔ, täämɛ cu Je-kɔb rɔ jiöp to̱ŋ ti ɣɔ̱ɔ̱c kä kar jiɛn da̱ŋ diɔ̱k ti gööl, kä cuɛ ko̱mkiɛn kuɛk a biilɛ kɛ ala ti riaali. 38Jɛn cuɛ to̱ŋ tɔ̱tɔ̱, tin cɛ ko̱mkiɛn kuɛk la̱th rɛy pa̱nyni pi̱i̱ni tin la mäth det thi̱n. Cuɛ kɛ la̱th rɛy puɔ̱li pi̱i̱ni tɔ̱tɔ̱ kɛ ɣöö bikɛ te nhiam de̱e̱t tin buɔ̱pkɛ rɔ̱ guäth in la bä kɛ maath. 39Ɛ jɛ nɔ, mëë ci det ku ben maath kɛ cäŋ däär, cukɛ rɔ̱ bɔ̱p nhiam to̱ŋni tɔ̱tɔ̱, kä cukɛ di̱eth kɛ dɛy ti cua̱ny kɛnɛ dɛy ti cuɔri kɛ ti kuay. 40Kä cu Je-kɔb rɔɔm dääk go̱lä rɛy böwni, kä cuɛ rɔɔm La-ban tin bo̱o̱r jak kä rietkɛ wuɔ̱thkiɛn kui̱c böwni tin cua̱ny kɛnɛ tin ca̱a̱r kä det La-ban. Kɛ jɛn ta̱a̱ ɛmɔ cu Je-kɔb tekɛ det ti la nyinkɛ pa̱ny ti /ke̱nɛ liɔm kɛɛl kɛ det La-ban. 41Kɛl ɛn bä, gua̱thni diaal mi bɔ̱p det tin gɔwkiɛn rɔ̱, Je-kɔb la läthɛ to̱ŋ rɛy pi̱i̱ni kɛ ɣöö bikɛ rɔ̱ bɔ̱p nhiam to̱ŋni, 42kä mi bɔ̱p rɔɔm tin jiäkiɛn rɔ̱, jɛn /cɛ to̱ŋ läth rɛy pi̱i̱ni. Kɛ kui̱ ɛmɔ cu rɔɔm La-ban a tin jiäk ni kɛn, kä cu nyin Je-kɔb a tin gɔw ni kɛn. 43Inɔ cu Je-kɔb ria̱ŋdɛ ku di̱t ɛlɔ̱ŋ kä cuɛ tekɛ det ti nyin ŋuan. Cuɛ rɔ jek wutni kɛnɛ män ti kuaany, kɛ thɔ̱a̱rɔa̱a̱li kɛnɛ muɔ̱li.
Nuer Bible © Bible Society in South Sudan 1998,2012.