Marko 2
2
Itaŋida Yesu Atulo ollo Oye Aŋati Huan
(Mat 9:1-8; Luk 5:17-26)
1Ihalu omuk oŋitek, acaharu nyia Yesu Kapernaum, buo aati ette itayiruna awanan honyi ihaŋ. 2Ania, ette aati arriai ittubanio itua haŋ many aŋaramahi amaji; ara duadi bu ihosiere ikat haŋ, buo inyi ette ittittoyo jihosi ekiana Hollum. 3Ofuonni nyia omuk aati aŋuan hulla akafunie, jio Yesu, obo atulo ollo oye aŋati huan. 4Buo te efuda waati, ittallihi nyia isi ifanyari inyi ihosiere Yesu; ania, ette isi ihet aaji to hide maji ninyia awattari Yesu. Ninyia aŋahini isi ettullit, ette isi ililiofonia atulo alia ollo oferio iferit. 5Ninyia igonyu Yesu eruk hosi, ette inyi jiaran jio atulo alia, “Illa, ahohinie eyyata hoi.”
6Owoni nyia buo fe omuk ettiyanak ifahita diya. Igigiloi nyia isi ta atajia hosi jio, 7“Aŋai orinyak atulo olo ekiana ihuo nyia? Abalari inyi afure Hollum! Hollum fe hama oremik ihohina eyyata!”
8Teya teya, omijak nyia Yesu egigilita hosi, ania ette inyi ifiyo isi jiojio, “Nyio igigiloti itai erre hunna arai 'to ihuania? 9Anani enne iliaha 'to, ijiari jio atulo ollo oye ŋati huan olo, ‘Ahohinie eyyata hoi’, kuyya ijiari jio, ‘Totte, iduhu eferit hoi, adahai?’ 10Etahutak adi ni jihatai jio, owon Lonyi Tulo iko elohittok ifau ihohiniere eyyata.” Ania, ette inyi jiaran jio atulo ollo oye ŋati huan jio, 11“Ajio ni jihoi, totte, iduhu eferit hoi, ilo haŋ!”
12Ette atulo alia idioto ihosiere hosi 'daŋ, ette iduhuna eferit honyi, ette leten addi. Illillihai nyia isi 'daŋ, ette itahabuyo Hollum jiojio, “Hèbeŋ hohoi egonyu obo ariŋ ihuo ana.”
Iloŋu Yesu Lefi
(Mat 9:9-13; Luk 5:27-32)
13Teya, inyiak nyia Yesu icaharu ilotifor tafar Galilea. Attati eluluŋ tulo ikudana inyi, buo inyi ette ittiyenio isi. 14Buo ninyia alo inyi ahosiere, igonyu inyi Lefi lonyi Alfeyo itoŋo imahatab honyi, ette inyi jiaran jihonyi, “Ijifunie ani.” Ette Lefi idioto, ette ijifaru inyi.
15Buo ninyia aŋiyo Yesu ihaŋ Lefi,#2:15 ihaŋ Lefi : kuyya ihaŋ honyi (ajiaran jio, ihaŋ Yesu). ofuonni nyia eddudduhak musuru iko eyyak arriai, ette iŋiyo ikonyi buo lejifak honyi. Oluaji nyia aati hulle ijufunie 'to inyi. 16Igonyuni nyia omuk ettiyanak ifahita hulla arai 'to Afarisei Yesu oŋiyo iko eyyak buo eddudduhak Musuru, ette isi ifiyo lejifak Yesu jiojio, “Nyio oŋiyo inyi iko aati ihuo hulia?”
17Ninyia itayiru Yesu ekiana hosi, ette inyi itarraŋ jiojio, “Obeŋi aŋidarak awahi adiktor, ati aŋuak hama awahi inyi. Abeŋ ni attu iloŋori abisak, ati attu ni iloŋori eyyak.”
Eram ono Aferuna
(Mat 9:14-17; Luk 5:33-39)
18To obo oloŋ oferuni nyia lejifak Yoane iko Farisei. Attati omuk aati ifuanna, ette ifiyo Yesu jio, “Nyio oferuttai lejifak Yoane iko Lejifak Farisei, buo hulohoi obeŋi oferuttai?”
19Itarraŋ Yesu isi ojio, “Oremehini soho atamonok hayamani iferuna buo ayamani howon ikosi? Obeŋ! Ittallihi isi iferuna buo inyi howon. 20Ati ofuonni adi oŋitek hunne iyarik ayamani tehiji hosi addi, tania, oferuni adi isi.
21“Obeŋ tulo attaf ettulit boŋo amaruani ta aboŋo aŋejuk, nyio, iruna adi aboŋo aŋejuk ette iguasuno addi, ette tibuo italat ettulit boŋo amaruani. 22Obeŋ buo fe tulo iturak afino aŋejuk itua ihulo amaruani nyio, obor adi afino ehulo ania, ette ijuhoro addi, buo fe ehulo ette irrohoji. Ati ijiara iturani afino aŋejuk itua ihuloo aŋejuho.”
Eram ono Sabatto
(Mat 12:1-8; Luk 6:1-5)
23 #
Edasita 23:25
To obo oloŋ Sabatto, adaharu nyia Yesu ta atua matta hima. Ninyia hadahai isi, ette lejifak honyi itterio igila ossi hima. 24Attati Farisei jiaran jihonyi, “Imijie, nyio ihanie isi ariŋ enne itihi efahita hohoi ihaniere to oloŋ Sabatto?”
25 #
1Sam 21:1-6
Buo Yesu ette itarraŋ isi ojio, “Hèbiaŋata itai ihenuna erre hunyia ihan Dafide iko aati honyi ninyia awahi isi obo aŋiyo? Omi nyia ahure jihosi, 26#Ehumak 24:9ania, ette Dafide ijiŋana ihaji Hollum, ette iŋiyo emunio hunyia isiori jio Hollum, ette buo fe isiarana omuk jio aati honyi. Ihan nyia inyi eram ania, buo Abiatar nyia ara ahehumani elle ittokon. Ati ojiori efahita hohoi, oduari nyia emunio hunia jio aati asai iŋiyere isi, arari fe ehumak hama.”
27Attati Yesu itisidonia ekiana honyi jihosi, ette jiaran, “Oyyeuni nyia Sabatto te eram waati, buo obiaŋara aati te eram Sabatto. 28Tania, ara Lonyi Tulo Lamonye ara duadi bu olo Sabatto.”
© The Bible Society in South Sudan 2003