Matteyo 3
3
Ettittoyo ono Yoane Etifuotoni Batisimo
(Mar 1:1-8; Luk 3:1-18; Yoa 1:19-28)
1Ihalu oŋitek hua, ottu nyia Yoane Etifuotoni Batisimo ihidiofo Yudea, ette ittittoyo jio, 2#Mat 4:17; Mar 1:15“Idehina eyyata hatai; nyio, iliaha Olobie ettedou.” 3Yoane nyia linyia ojio Isaya ekianani Hollum jio,
“Obo latulo elle iwuwoŋita ihidiofo jio,
‘Ihuhumana ekoi ono Lamonye,
itabisana alori honyi!’ ”
4 #
2Hob 1:8 Iyyafatio nyia Yoane aboŋojin hunne ihuhumuni to hofir konnikonni buo ottodok amuhunyo ihuluk honyi. Oŋiyotio nyia inyi amaa iko neesio 'tege. 5Ofuonni nyia aati jihonyi to Yerusalem, ta fau Yudea, iko jio aŋacio 'daŋ hutteger owore Yordano. 6Opuloni nyia isi eyyata hosi, buo inyi ette itifuotonia isi batisimo itua owore Yordano.
7 #
Mat 12:34; 23:33 Ninyia igonyu inyi aati arriai hulo Farisei iko Sadusei ofuonni ifuotuna batisimo, ette inyi jiaran jihosi jio, “Itai amunuok hulo! Ŋai asar itai ifuhori ettigemio onno olo Hollum ifahuna? 8Ihuo ayyani onno oŋijak 'to eŋijiti, ihaniete egemita hunne itahutani 'to jio ibusana itai eyyata hatai. 9#Yoa 8:33Hègigiloti jio irisata adi itai ettigemio ta ajiaran jio ara Abramo ahohonyi hatai, nyio, eramak ni itai, oremik Hollum iduhuna amoruoi huna, ette iyyeuna aduri hutto woyo Abramo. 10#Mat 7:19Ihuania accio atolu ihadde 'yani. Ayyani onno obeŋ 'to oŋijak eŋija hunno oyiji 'to, olloŋori adi inyi addi, ette ibironia ihima. 11Etifuocio ni itai batisimo ta aari itahutaniere jio ibusana itai eyyata hatai. Ati obo alla agalik ani ollo ottu te ehalu hoŋ, abeŋ ni luŋa aremik iŋok amuha honyi. Itifuocio adi inyi itai batisimo to Loholio Olibo iko te eema. 12Awon egilli honyi ihani, igilliyere emma hunne igis inyi. Ififieu adi inyi emma 'daŋ ette ihanana imugu honyi, buo ette isuahina acono 'daŋ ihima onno obeŋ 'to odunya.”
Ifuotuna Yesu Batisimo
(Mar 1:9-11; Luk 3:21-22)
13To ninyia tonyia, ottu nyia Yesu to Galilea, ette leten jio Yoane itua owore Yordano ifuotuniere batisimo jihonyi. 14Ati awak nyia Yoane itik inyi, ette jiaran, “Awak duo ni ifuotuna batisimo jihoi, inyiak buo fe iyye ittuna jihoŋ!”
15Ati itarraŋ nyia Yesu inyi ojio, “Ijiara do hétera ihuo nyia, oŋida itasiru awahan Hollum.” Ette Yoane iruk ihaniere ihuo nyia.
16Teya teya, ninyia ifuotu Yesu batisimo, ette ittuna addi to tua hari; aŋa nyia edou, attati inyi igonyuna Oloholio Hollum osuu ihuo awolo, ette isuronia jihonyi. 17#Mat 12:18; 17:5; Mar 1:11; Luk 9:35Attati ekiana ittuna tedou onno ojio, “Lonyi hoŋ olo luŋa, ollo obuor ataji hoŋ bebe.”
© The Bible Society in South Sudan 2003