ATITI AWM ANGCHEI NAI 4
4
Ka-ina hawi Abela
1Naibaly Adam ly aju hawi vanrei i ahawi i aju ly deaungdi aniu bo. Naibaly chapo tapen i, “Areng i saho y kai my i vui chapo kanga bo,” nanai Evi ly thui i, huni chapo ai Ka-ina, #4.1 Ka-ina: Hebrai leu y “nga bo” napi. nanai amyn pathi. 2Huni bo y chapo Abela ai tapen bi. Abela ly beram typ nai keung ne i, Ka-ina ly li hlau sa nai ne. 3Neng kra tleh y nai kha y Ka-ina ly Areng teng y talam ai nai hlau i amti amjang phyrei la achu.#Mt 23.35; Lk 11.51; 1 Jh 3.12 4Naibaly Abela py mymy i beram cho chalu tleh iy ngan bawi hawi keh naichi Areng teng y talam teang. Areng my Abela hawi mymy i talam nai ai ly kawn pi.#Heb 11.4 5Na i py Ka-ina hawi mymy i ati ti talam nai ai ly kawn pi y. Hunai deaungkho y Ka-ina ly khri pa-rei kado theu i, my i meimai takhuisui na. 6Naibaly Areng my Ka-ina teng y, “Ati mana nai y nang ly kado theu mo? Ati mana nai y nang i meimai takhuisui lawh mo? 7Nang atiti kahawi sa baly amo theu pajau ai;#4.7 amo theu pajau ai; ti y baly nang i talam nai ai kaimy kawn pi ai. na i py nang kahawi so y nai deaungkho y kamngo ly nang my i katheu pa-kho y amo ryhryh na bo. Kamngo my nang ai peang ai ngai, na i py, kamngo ai ly nang my pajau vui ai nai tla,” napi.
8Naibaly Ka-ina my amnau Abela teng y, “Choh, hlau mang y chei hawi sina,” napi. Hlau mang y chei hawi nai thym khala lam y, Ka-ina my amnau Abela ai padei vui bo.
9 Areng my Ka-ina teng y, “Ngamnau Abela ly ma y mo?” napi. Ka-ina my, “Kai pany y. Kai ly amnau ai typ nai keung ne lawh sai a?” nanai pathang.
10Naibaly Areng my, “Nang ly ati mana nai y, hini ka-jei awm parai nai sa lawh mo? Ngamnau i thi my khaileaung mang dengdairei vawitheung tha teang ai nai palau nai raawi kamta ang kaau na a!#Heb 12.24 11Nang ly amsawi lawi i, li hlau so pajau y leang bo. Nangmy padei nai ngamnau i thi ai khaileaung ly labeaung kadawi nai kamta pajawn vui bo. 12Nang ly atho sa naimy amti amjangchi pati i py ati sai py ngo y ai; nang ly yhm hlau by y nai khumi ka-jau lawm ai,” napi.
13Naibaly Ka-ina ly Areng teng y, “Hini pajeng naira ly kai i vui kham pajau y na bo. 14Nang ly kai ai hini khaileaung i nai patheu vui bo. Nang i mei ka-niu i nai py patheu vui bo. Kai ly yhm hlau by y nai khumi ka-jau lawm ai bo; naibaly kai ai avum nai khumi ngiereichi ly ang padei ai,” napi.
15Na i py Areng my, “Ny y leang; ami py ne sy, nang ai padei nai khumi i tlang tleaung y tlen saryhrei vawitheung katha teang ai,” napi. Hunai deaungkho y Ka-ina ai avum i py padei y ai nai, Areng my Ka-ina tlang tleaung y ka-ma-ra khai pi. 16Naibaly Ka-ina ly Areng teng i dengdairei theu vui iy Eden nisi mang i, “Ajau nai” pri mang y awm vui bo.
Ka-ina i kangpreangchi
17Ka-ina ly aju la i deaungdi neampacho tapen; Amyn ly Enoka, nanai pathi. Naibaly Ka-ina ly chapo Enoka i amyn hawi Mary harei sa. 18Enoka ly chapo Irad ai sa: Irad ly chapo Mehujaela ai sa: Mehujaela ly chapo Methushaela ai sa: Methusaela ly chapo Lameka ai sa. 19Lameka ly Adah hawi Zillah napi nai aju leaung nyhrei awm. 20Adah ly Jabala ai tapen: Jabala ly si hawi beramchi khawn iy, kanih tangbeungra awm naichi i amsi pajo ne. 21Ni i amnau ly Jubala ne. Ni ly Byhlyh hawi taro cheaungpreng beu kawp nai keungchi i amsi pajo ne. 22Zillah my Tubal Ka-ina ai tapen; ni ly paitheng, paiphi thip kawp nai keungchi i amsi pajo ne. Ni i tuicho ly Naamah ne.
23Lameka my ajuchi teng y,
“Adah hawi Zillah awi, tangai hawi; thawndeang leaungrei ly kai ai khyh pakhau nai deaungkho y kai ly ni ai tleh vui bo.
24Ka-ina ai padei nai khumi ai ly tlen saryhrei vawitheung tha lawh baly#Mt 18.22
kai ai padei nai khumi ai ly tlen vuisaryh taja tlen saryhrei vawitheung tha teang ai,” napi.
Setha hawi Enosh
25Adam hawi aju Evi ly chapo leaungrei tapen bi. Evi ly “Ka-ina my padei vui nai Abela i jeng y Tameuh my ang pei bi nai chapo ne,” nanai thui i Setha, #4.25 Setha: Hebrai leu y “Theang pi teang bo” napi. nanai amyn pathi bo. 26Setha ly chapo leaungrei sa i amyn ly Enosh, nanai pathi. Huni deung dengdairei khumichi ly Areng i amyn kachai y chiu u amteaung bo.
Khumi Common Language Bible © Bible Society of Myanmar, 2005.