GENESIS 11
11
Babulon Insâng
1A tîr chun, laikulh minung zawzawng tla chu thu munkhat mang hen hawlh khat hen an hawlh. 2Saklei kângah an va kal le, Babulon ramsung Shinar phâi ah an um. 3“Chei! Tual kan rawh lai,” an ti. Churawhchun, tual rawh mi leh a senghnâk an nei rawh.
4“Tuah khuapi siam sele, vân tawngh khet hen insâng kan sak lai, kan min thangnâk ding leh tual tlûnah kanna rek ver lonâk ding hen,” an ti.
5LALPA chu an khuapi siam leh insâng an sak mi zauh ding hen a hawng ṭum le, 6“Hi minung tla hi tuah anna khat hen hawlh pakhat hen an hawlh; hi hi thilti ding an tum mi an dawmh mi chu asi ko rawh. Sâwtlotê ah an duh mi zawng an ti kho ko lai! 7Kan va ṭum lai le, anna pêm lonâk ding hen an hawlh tla kan chawmh piak na lai,” a ti.
8Churawhchun, LALPA nih tual ah mun kip ah a rek na le, khuapi an siam mi chu an bângtâk rawh. 9Chu khuapi chu Babel (Babulon) an ti. Chunah chun LALPA nih an hawlh tla a dang piak na hen, chu thawk ber chun tual tlûn mun kip ah a rek na ruangah.
Sem Thlâk Tla
(1 Chr 1.24-27)
10Hi bang tla hi Sem thlâk tla an si. Sem chu kum 100 mi asi le, buanso nûnah kum nih asi ah fapa Arpaksad a nei. 11Chu nûnah kum 500 dang a dam le, fa dang tla a nei.
12Arpaksad chu kum 35 a tling ah fapa Selah a nei. 13Chu nûnah kum 403 dang a dam le, fa dang tla a nei.
14Selah chu kum 30 a tling nûnah fapa Eber a nei le, 15chu nûnah kum 403 dang a dam le, fa dang tla a nei.
16Eber chu kum 34 a tling ah fapa Pelek a nei; 17Chu nûnah kum 430 dang a dam le, fa dang tla a nei.
18Pelek chu kum 30 a tling ah fapa Reu a nei, 19chu nûnah kum 209 dang a dam le, fa dang tla a nei.
20Reu chu kum 32 asi ah fapa Seruk a nei; 21Chu nûnah kum 207 dang a dam le, fa dang tla a nei.
22Seruk chu kum 30 a tling ah fapa Nahor a nei; 23chu nûnah kum 200 dang a dam le, fa dang tla a nei.
24Nahor chu kum 29 a tling ah fapa Terah a nei; 25chu nûnah kum 119 dang a dam le, fa dang tla a nei.
26Terah chu kum 70 a tling ah Abram, Nahor leh Haran a neih na asi.
Terah Thlâk Tla
27Hi bang tla hi Terah thlâk tla an si; Abram, Nahor leh Haran. Haran chu Lot pa asi. 28Chun Haran chu Babulon ram ah Kaldai mi tla umnâk khuapi Ur ah a pa dam liauah a thi. 29Abram nih Sarai a umpi le, Nahor nih Haran fanu Milkah a umpi; chu chu Iskah pa khawm asi. 30Sarai chu fa a nei kho lo.
31Terah nih a fapa Abram leh Haran fapa Lot a tupa a kalpi na le, a monu Sarai Abram nupi khawm anmah tla hen Babulon ram ah mi Kaldai tla umnâk Ur khuapi chu an mâk le, Kanaan ram leiah an kal rawh. Haran tiang hen an kal le, chunah chun an va um. 32Terah chu kum 205 a tling hen chunah chun a thi rawh.
Bawm Common Language Bible © Bangladesh Bible Society, 2004. All rights reserved.