Markos 14
14
14 Ik.
1Tut ko okaketa Kamakush marapto, Pandane sak pan marapto an; orowa, Kamui kora kenru esapane utara newa, Kambi-nuye utara anak ne nuina no Shinuma kishima wa raige kuni hunara ruwe ne: 2awa, ene itak-hi :— Marapto toho ta shomo, nei toho ta nei no ki chiki utara tumugeta sakayo ukohopuni nangoro kusu ne, sekoro itak.
3Orosama, Shinuma Betania kotan un munin tashum ki Simon koro chisei otta an wa aep ibe rapoketa, shine shiwentep shi no ataye rui turu sak nardos shum o sei shintoko shinep koro wa ek, aige, nei ap pereke hine Shinuma sapa kata shum ota nisa ruwe ne. 4Koroka, utara tumugeta irushka utara okai wa ene itak-hi :— 5Nep gusu tan shum akoatcha an a? Tan shum anak ne ashikne hotne denaria ikashima shine wan hot denaria gusu aehok wa otek-sak guru otta aeungeraite eashkaibe ne, ani itak. Orowa, nei shiwentep kosakayo itak ki nisa ruwe ne. 6Koroka, Yesu ene itak-hi :— Nei shiwentep moshima no okai yan; nep gusu shinuma ramusarakka ya? Shinuma anak ne En otta pirika ikip ki nisa ruwe ne. 7Otek-sak utara ramma echi tura no okai gusu hembara ne yakka echi rengaine nei utara pirikare eashkai: koroka, Kuani anak ne ramma echi tura no an shomo ne ruwe ne. 8Nei shiwentep anak ne kara eashkai pakno ki: tushiri otta Ku netobake aomare gusu etokota kashiketa shum ota nisa ruwe ne. 9Orowa, son no echi otta Ku ye :— Ingi moshirʼebitta Pirika shongo eupaskuma an ushiketa tap tan shiwentep ikip anak ne aeshkarun kuni gusu aye kusu ne na, sekoro itak.
10Orowa, nei tun ikashima wa niu tumugeta an Kariot kotan un guru Youdas anak ne Shinuma ekoshi kuni gusu Kamui kora kenru esapane utara orota oman nisa ruwe ne. 11Awa, nei utara nu chiki yaikopuntek wa shinuma otta ichen kore kuni eitakamkire nisa ruwe ne. Orowa, shinuma irammakaka Yesu ekoshi kuni i hunara nisa ruwe ne na.
12Orowa, Pandane sak pan marapto eatpake toho ta, Kamakushbe yange toho ta, koikara utara anak ne Shinuma otta ene itak-hi :— Aokai Kamakush marapto ibe kuni ne neita chi paye ash wa etokooiki gusu E ramu ya? ani itak. 13Orowa, Shinuma koikara utara tun payere wa orota ene itak-hi :— Machiya otta echi paye, yak anak ne wakka o sei op sei wa ek shine ainu etunangara kusu ne: nei guru osh paye: 14orowa, neita ne yakka shinuma ahun chisei ta, nei chisei koro guru otta ene itak yan; Epakashnu guru ene ye-hi :— Kuani Ku koikara utara tura no otta Kamakush marapto ibe kuni gusu an tumbu neita an a? ari ye yan. 15Orowa, nei guru yaikota so akara etoko-a-oiki wa an poro rikta an tumbu echi nukare kusu ne, nei ita etokooiki yan, sekoro Yesu nei utara otta itak. 16Orowa, koikara utara paye hine machiya otta araki, aige, orota Yesu ye korachi nukan nisa ruwe ne: awa, Kamakush marapto etokooiki nisa ruwe ne na.
17Orosama, onuman an koro Shinuma nei tun ikashima wan koikara utara tura no araki ruwe ne. 18Orowa, rok wa ibe korʼan ita, Yesu ene itak-hi :— Son no echi otta Ku ye, echi shinen En tura no ibe korʼan guru anak ne En ekoshi kusu ne, sekoro itak. 19Awa, nei utara yairamkoiki heashi, orowa, shinen range shinen range, Kuani he? ani ye heashiriki. 20Orota Shinuma ene itak-hi :— En tura no tekehe nima otta omare tun ikashima wa niu tumugeta okai shine ainu ne. 21Inambe gusu ne yakun, gusu chieshinnuye wa an korachi ka Ainu Poho oman ruwe ne: koroka, ani Ainu Poho aekoshi guru anak ne yaisambepokash humi! Nei guru shomo ashikore yak ne shinuma gusu pirika ruwe ne, sekoro itak.
22Ibe rapoketa Shinuma pantak uk wa nunuke koro meshpa, orowa, nei utara otta kore wa ene itak-hi :— 23Uk yan, tambe anak Ku netobake ne. Samata, itangi uk koro yaiiraige ki chiki utara otta kore: orowa, nei utara iku nisa ruwe ne. Orosama, orota Shinuma ene itak-hi :— 24Tambe anak ne inne utara gusu aohetu aeuitaknup gusu Ku kemihi ne ruwe ne. 25Son no echi otta Ku ye, Kamui moshirʼotta echi tura no ashiripe Ku iku pakno, tande orowa no hat pungara ibehe Ku iku shomoki kusu ne ne, sekoro itak.
26Orowa, shine shinotchaki ki okere chiki Kanran ush-nupuri orota soyumba wa paye nisa ruwe ne na.
27Orowa, nei utara otta Yesu ene itak-hi :— Echi utara obitta aure-epetchiure kusu ne: inambe gusu ne yakun, hitsuji chikoikip reshpa guru ku shirikik wa nei hitsuji oyake un shitchari kusu ne sekorʼambe anuye wa an ruwe ne gusu ne na. 28Yakka, hetopo a En ashiknure imakake echi kotchaot Gariraya moshirʼotta Ku oman kusu ne na, sekoro itak. 29Koroka, Shinuma otta Petros ene itak-hi :— Ainu obitta aure-epetchiure yakka, kuani anak shomo, ani itak. 30Orota Yesu ene itak-hi :— Son no e otta Ku ye, tanto, tan ukuran, tu shuine niwatori chikap hau koro etokota eani re shui ne En eshina kusu ne na, sekoro itak. 31Koroka, shinuma shi no yupke itak ani, Aokai tura no ku rai yakka, kuani E eshina shomoki kusu ne, ari itak. Samata, okai utara obitta nei no korachi ye nisa ruwe ne na.
32Orowa, Getsemane ani aye kotan ta araki: awa, Kuani inonno-itak Ku ki gusu, nei rapoketa teda echi rok yan, ari an itak ani Shinuma anak ne koikara utara otta ye nisa ruwe ne. 33Orowa, Shinuma anak ne Petros hemhem, Yakob hemhem, Yoannes hemhem, tura wa paye, aine, shi no kimatek wa poron no ramuoknatara heashi nisa ruwe ne. 34Orowa, nei utara otta ene itak-hi :— Ku ru-rai pak no Ku keutum anak ne shiri yairamkoiki ruwe ne: teda echi okai wa shiruwe yan, sekoro itak. 35Orowa, Shinuma pon no hoshiki no oman wa shirikata hachiri, aige, aeashkai yak anak ne nei pakihi Shinuma orowa no hechaka kuni inonno-itak nisa ruwe ne. 36Awa, ene itak-hi :— Abba, Michihi, Aokai ki eaikapbe nep ne yakka isama: tan itangi En orowa no uk wa En kore; koroka, Ku rengaine korachi shomo ne, E rengaine nei no ki wa En kore, ari itak. 37Orowa, Shinuma ek wa nei utara mokoro wa okai i nukara, aige, Petros otta ene itak-hi :— 38Simon, e mokoro ya? Shine pakihi eani shiure eaikap ya? Echi utara iteki akoramnukara kuni ne shiure wa inonno-itak ki yan: ramat anak ne ki rusuibe ne, koroka, kam anak katchakbe ne ruwe ne, sekoro itak. 39Orowa, shui, Shinuma oyake un oman wa inonno-itak ki wa deeda yep korachi kanna-shui ye nisa ruwe ne. 40Orowa no, shui ek wa nei utara mokoro shiri nukara, shiki pase ruwe ne gusu ne na; orowa, orota nep itak ani ese itak ki kuni nei utara erampeutek ruwe ne. 41Orowa, Shinuma re shuine orota ek wa ene itak-hi :— Tane echi mokoro wa shini yan; pakno ne; pakihi ek wa an; ingara, Ainu Poho anak ne katpak koro utara koro teke otta aekoshi ruwe ne. 42Hopuni wa paye anro, hetak, En ekoshi guru ehange no an ruwe ne, ani an itak ani itak nisa ruwe ne.
43Orowa, nani, Shinuma itak rapoketa nei tun ikashima wa niu tumugeta an shinen ne Youdas anak ne emush hemhem, shirikik kuwa hemhem koro wa, Kamui kora kenru esapane utara newa kambi-nuye utara newa ekashi utara newa orowa no aomande inne utara tura no ek nisa ruwe ne. 44Orowa, Shinuma ekoshi guru anak ne nei utara otta shine shirosh kore wa ene itak-hi :— Nen ne yakka ku chopchopsekara guru anak ne nei guru anak Shinuma ne; kishima wa yaitubare no tura yan, ari itak. 45Orowa, nei guru ek chiki nani Shinuma otta arapa hine, ene itak-hi :— Rabbi he! Aige, chopchopsekan nisa ruwe ne. 46Orowa no, okai utara teke ani Yesu kishina ruwe ne. 47Koroka, samaketa roshki wa okai utara tura, an shinen anak ne koro emush etaye wa Kamui kora, kenru esapane guru koro uitek guru kisaraha oattuye nisa ruwe ne na. 48Nei utara otta Yesu ese wa ene itak-hi :— Emush hemhem, shirikik kuwa hemhem koro wa ikka guru kishima kuni korachi echi araki wa. 49En kishima shiri he an? Kuani kesto Kamui kora kenru ta echi tura no Ku an wa epakashnu, awa, nei ita echi En kishima shomoki: koroka, tan okaibe anak ne Kamui kambi-sosh auweoma kuni ne hopuni ambe ne ruwe ne, sekoro itak. 50Orowa, utara obitta Yesu shaot nisa ruwe ne na.
51Orowa no, Yesu osh oman koro atusa netobake senkaki kokarakari shine upen ainu an: awa, utara nei ainu kishima: 52koroka, shinuma anak ne koro senkaki ande wa atusa wa shaot nisa ruwe ne na.
53Orowa, utara anak ne Kamui kora kenru esapane guru otta Yesu tura nisa ruwe ne: awa, shinuma ukoiram no Kamui kora kenru esapane utara obitta hemhem, ekashi utara hemhem, kambi-nuye utara hemhem uwekarapa. 54Petros anak ne tuima no Shinuma osh ek wa ahun, Kamui kora kenru esapane guru koro ipishi tumbu otta ka ahun nisa ruwe ne; orowa, auitek koro utara tura no abe-nupek samata a wa yaipopkere korʼan ruwe ne. 55Awa, Kamui kora kenru esapane utara ukoramkoro utara anak ne Yesu raige kuni shunge paweteshu-i hunara ruwe ne; koroka, pa eaikap. 56Inne utara Shinuma gusu shunge paweteshu ki yakka, koro paweteshu-i uweoupak shomoki ruwe ne. 57Orowa, shinuma gusu shunge paweteshu ki utara hopumba hine ene itak-hi :— 58Kuani anak ne tekehe ani akara tan Kamui kora kenru Ku isamka, orowa, rereko uturuta teke sak no akara ashiripe Ku kara kusu ne, ani tan guru ye itak chi nu nisa ruwe ne, sekoro itak. 59Tap korachi ye yakka nei paweteshu-i uweoupak shomoki nisa ruwe ne. 60Orowa no Kamui kora kenru esapane guru anak utara tumugeta ash wa Yesu otta nu wa ene itak-hi :— Nep ne yakka E ese shomoki ruwe? Eani gusu tan okai utara paweteshu ambe nekon a ambe ne ya? 61Koroka, Shinuma mo no an wa nep ka ye shomoki nisa ruwe ne. Orowa, shui, Kamui kora kenru esapane guru Shinuma otta nu wa ene itak-hi :— Anunukep koro Poho ne Kiristo E ne ruwe he an? 62Orota Yesu ene itak-hi :— Ruwe ne wa; orowa, Ainu Poho kiroro shimon tek samata a hine kando nishkuru koro wa ek shiri echi nukara kusu ne na, ari itak. 63Orowa no, Kamui kora kenru esapane guru yaikota mi amip yaspa wa ene itak-hi :— Nep gusu moshima okai paweteshu-i chi kon rusui ya? 64Nei koatchap echi nu: nekon a echi yainu ya? Orowa, utara obitta Shinuma araige kuni guru ne sekoro esanniyo nisa ruwe ne. 65Awa, Shinuma kata topse-kara hine koro nanuhu kamure, orowa, shirikik wa, uweingara yan, ani Shinuma otta itak utara okai: orowa no, auitek utara anak ne Shinuma kokik koro kishima nisa ruwe ne na.
66Orowa, Petros anak ne rata tumbu ta an ita Kamui kora kenru esapane guru uitek-mat shinen ek; awa, yaipopkere korʼan Petros nukara koro orun ingara wa, 67Eani ne yakka Nazaret un Yesu tura an guru e ne, sekoro itak. 68Koroka, shinuma eshina wa ene itak-hi :— E ye itak ku eramu ka shomoki, ku ramepakari ka shomoki ruwe ne, sekoro itak koro, shem otta soine nisa ruwe ne; awa, niwatori chikap hau kon nisa ruwe ne. 69Orowa, shui, nei uitek-mat shinuma nukara, aige, Tan guru anak ne nei utara un shinen ne, sekorʼan itak ani samaketa roshki wa okai utara otta ye heashi nisa ruwe ne. 70Koroka, kanna-shui shinuma nei ambe eshina nisa ruwe ne. Samata, naa pon no shiran koro, samaketa roshki wa okai utara anak ne Petros otta ene itak-hi :— Son no poka eani nei utara un shinen e ne; eani, Gariraya un guru e ne ruwe ne gusu ne na, sekoro itak. 71Koroka, shinuma iyoitakushi itak hemhem ki toiko ye hemhem ki wa, — Gusu echi ye tan ainu ku eamkiri shomoki, sekoro itak. 72Orowa nani tu shuine niwatori chikap hau kon ruwe ne. Tata otta, — Tu shuine niwatori chikap hau koro etokota eani re shuine En eshina kusu ne na, ani an itak ani orota Yesu ye itak Petros eshikarun nisa ruwe ne. Awa, nei ambe esanniyo chiki shinuma chish nisa ruwe ne na.
© British and Foreign Bible Society 1897, 2018