MATTHAI 5
5
Taang tunga thusoi
1Huleh mipite a muh in taang ah a kaltou a, a tou a, a nungjuite a kawmah a hung va; 2Huleh ama’n a kam a kaah a, amahuh thu a hilh a;
Hamphatnate
3Hagau a gentheite a hampha uhi: vaan lalgam amahuh diing ahih jiahin. 4Lungngaite a hampha uhi: hamuanna um diing ahih jiahun. 5Thunuaigolhte a hampha uhi; Leigou luah diing ahih jiahun. 6Dihtatna lama gilkial a dangtaahte a hampha uhi: tai diing ahih jiahun. 7Zahngai theite a hampha uhi: zahngaihna tang diing ahih jiahun. 8Lungsima siangthoute a hampha uhi; Pathian mu diing ahih jiahun. 9Lemna siamtute a hampha uhi; Pathian tate chih a um diing ahih jiahun. 10Dihtatna jiaha soih a umte a hampha uhi; vaan lalgam amahuh a diing ahih jiahin. 11Mi’n keimah jiaha ahung housiat va, ahung soih va, zuau a gilou chintenga ahung heeh hun chiangun na hampha uhi. 12Nuam unla, nasatahin kipaah un; vaan ah na kipaahman diing uh a tam mahmah ngal a; na ma va zawlnei umte zong hitobangin ana sawi veu uhi.
Chi leh thaumei apat zil diingte
13Lei chi na hi uh; hizongleh chi chu data leh bangin a kisu-al kiitta diai? huchia’n a panna a umta sih diing a, paihdoh a mite totchil diing ahi giapta hi. 14Khovel vaah na hi uh; taang tunga khopi um chu a kiphual thei sih hi. 15Mi’n thaumei de in loh a khuhkhum ngei sih uh, a tunna ah a koih zaw uhi; huchi'n inn sunga mi um zousiah a salhvaah hi. 16Hutobangin na vaah uh mi mitmuh in vaah heh, huchi'n amahun na natoh hoihte uh a mu diing va, na Pa uh vaan a um chu a paahtawi thei diing uhi.
Daan lui leh Jesu daan
17Daan thu aha, zawlneite thu aha sumang diing a hung ahi chi'n hung ngaihtuah sih un; a sumang diing a hung ka hi sih a, sutaangtung diing a hung ka hi zaw hi. 18Chihtahzetin na kawmvah ka soi ahi, Vaan leh lei a man masiah daan thu a sutvom neucha aha, thaivom neuchakhat zong a mang sih diing, a bawn a, a taangtun kim masiah in. 19Hujiahin koipouh hi thupiah neupente laha khat mai zong susia a, hutobanga bawl diing a mite hilh chu vaan lalgam ah mi neupen ahi diing hi; hizongleh koipouh jui a, huleh hutobanga jui diing a mite hilh chu vaan lalgam ah mi lian a chi diing uhi. 20Ajiahchu ka hung hilh ahi, Na dihtatna un lehkhagialtute leh Pharisaite dihtatna a khup louh inchu vaan lalgam ah na luut top sih diing uhi.
Lungthahna leh tualthahna
21Malai mite kawma, 'Tual na thah louh diing ahi; huleh koipouh tual that chu vaihawmna lauthawnghuaitah ah a um diinguh, kichi na zata uhi; 22Hizongleh ke’n chu na kawmvah ka soi ahi, Koipouh a jiah bei a, a unau tunga lungthah chu vaihawmkhumna lauthawnghuaitah ah a um diing; huleh koipouh a unau kawma, 'Raka (Man louh),' chi chu vaihawmtute vaihawmkhumna lauhuaitah ah a um diing; huleh koipouh, 'Nang mingol,' chitu chu gawtmun mei diila paih lauthawnghuaitah ah a um diing uhi. 23Hujiahin maitaam bula silpiah diing tawia na hung laitah a na unau in na tungah lunghih louhna a nei chih na heetdoh leh, 24Na silpiah diing chu hu maitaam ma ah nusia inla chiah in; huleh na unau toh kilem masaphot inla, huzohchiangin hung inla, na silpiah diing chu pia in. 25Na langpa toh lampi a na chiah laiin kitam zohin; huchilou inchu na langpa’n vaihawmtu ahung mansah diing a, vaihawmtu’n mimantu lian kawmah ahung pekhe diing a, huleh mimantu lian in suangkul ah ahung khumkha diing hi. 26Chihtahzetin ka hung hilh ahi, Paihsa san khat tana na piah kim masiah hua kipanin na pawtdoh het sih diing hi. 27Malai mite kawma, Na aangkawm louh diing ahi, chia kisoi na zata uh; 28Hizongleh ke'n chu na kawmvah ka soi ahi, Koipouh numei enlahtaha en in a lungsimah amahnu toh a aangkawm zouta ahi. 29Huleh na mit jiatlam in ahung sualsah leh kheidoh inla paai mai in; ajiahchu na tahsa pumpi gawtmuna paih ahih sangin na tahsa peng khat manthai chu nang diingin a hoihzaw hi. 30Huleh na khut jiatlam in ahung sualsah leh saattan inla paai mai in; ajiahchu na tahsa pumpi gawtmuna paih ahih sangin na tahsa peng khat manthai chu nang diingin a hoihzaw hi.
Nupa kikhulna
31Mi koipouh in a ji a khul leh khulna lehkha pia heh, ana kichi hi. 32Hizongleh ke'n chu na kawmvah ka soi ahi, Koipouhin mi toh lupkhawm jiah hilou a, a ji a khul leh amahnu chu a aangkawmsah ahi; huleh koipouh hu khulsanu nei chu aangkawm ahi.
Kihaahsialna leh thutahna
33Huchiangleh, malai mite kawma, Kihaahsial sih un, amahvang na kichiamnate Lalpa kawmah taangtun zaw in, chia kisoi na zata uh; 34Hizongleh ke'n chu na kawmvah ka soi ahi, Kihaahsial mawngmawng sih un; vaan louin kihaahsial sih un; ajiahchu hichu Pathian laltouphah ahi: 35Huleh lei louin kihaahsial sih un; ajiahchu hichu a keeng ngahna ahi: Jerusalem louin kihaahsial sih un; ajiahchu hichu kumpipa loupi khopi ahi. 36Na lutang louin kihaahsial sin; ajiahchu samzang khat zong na kaangsah in na vomsah thei sih hi. 37Hizongleh na soi chu, Ahihleh hi; Ahihlouhleh hilou, hisah mai in; ajiahchu hi val chu gilou apat hung pawt ahi.
Phubalaahna
38Mit luang in mit, ha luang in ha, ana kichi na zata uh. 39Hizongleh ke'n chu na kawmvah ka soi ahi, Migilou thuh sih un; hizongleh koipouh in na ngeiphe jiatlam a beh leh a lehlam zong doh zaw in. 40Huleh mi koipouh in na tunga thusia bawl a, na puannaah laah a tup leh na puanjal zong la sah ngal in. 41Huleh koipouh meel khat chiah diing a hung phuut photmah kawmah amah toh meel nih chiah khawm un. 42Na kawma ngen chu pia inla, huleh ahung thunglaah ut chu kiheimangsan sin.
Lungsiatna leh umdan hoihkim
43Na innveengte lungsiat inla, na meelmate hua in, kichi na zata uhi. 44Hizongleh ke'n chu na kawmvah ka soi ahi, Na meelmate uh lungsiat unla, haamsia hung lohte vangpiah unla, ahung mudahte diingin sil hoih bawlsah unla, huleh ahung bawlsete leh ahung suduhdahte diingin haamteisah un. 45Huchi'n na Pa uh vaan a um tate na hi thei diing uhi; ajiahchu ama’n migiloute leh mihoihte tungah a ni a suaahsah a, huleh midihtatte leh midihtatloute tungah zong guah a zusah hi. 46Ajiahchu nanguh hung lungsiatte chauh na lungsiat uleh kipaahman bang ahiai na muh diing uh? siahdongte’n zong huchibanga bawl ve hilou ahi viai mah? 47Huleh na unaute uh chauh chibai na buuh uleh midang sanga bang ahiai na bawltam tuan uh? siahdongte’n zong huchibanga bawl ve hilou ahi viai mah? 48Hujiahin vaan a um na Pa uh a hoihbukim mah bangin nanguh zong hoihbukim un.
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.