LUK 19
19
1Jisu Jeriko khou gutna tat ruan pat khwan the. 2Mi khou tei kazanc Zakkaia twmeipu gaanv khat nai khwan e. Kamei tei dihkhav kakhamei kapy khat khwan e. Kumna kamei lungcgay khwan e. 3Jisu kiu thow cho twmei kamei zauh khang karamc khwan e, tiki kahyang ana lana kamei meic kangdai khou tei rui how ngam mak khwan the. 4Kumna kamei Jisu pat nimei chaeng khou pak kasuakc patna, kata zauh khang mbu bang khou ku the.
5Jisu mi bamv khou tei guang tangc pwkhou, zauc thauna, “Zakkaia, key katumc o; aseic ai nang kai khou bangv puni,” twna sa the. 6Khoutei kamei chadi chadana keyna, neihlana Jisu ta kakai khou tibangvlou the.
7Hei tei how lana meic guayna tei, “Kamei paapcmei kai khou bangv khang gut kan the,” twna tanglumna sa the.
8Zakkaia tei dingthauna sa the, “Poubauhmei, atuang naimei guay tuang kapaek akhat ntaw lungcsimei guay khang tii pat the, khatni ai rui thowkumhmei tuang guatna laaloumei tuang nai khwan e thei, ai kadam padeih mbuna khangclou dat ni the.”
9Khoutei Jisu rui kakhou sa the, “Aseic hei mi kaikhunc ti hei kanlou the, kalam thu kamei hei ni Abraham nac mpouh muay de. 10Meic Nac Mpouh hei maan kanmei ta phu khang khatni kanlou khang guang tuang e.”#Met 18.11
Mina Ruh Latgiam
(Met 25.14-30)
11Meic nunc tei hei tei nking bam khou, latgiam akhat salou khwan e. Kalam thu kamei Jerusalem ana guang the, kum tina Ravguangc guangcdic guang puni the twna meic nunc tei ning bam khwan e.#Met 25.14-30 12Khoutei Jisu rui sa the, “Meicdaihmei kai khou puancloumei nac gaanv khat rui kamei guanghbamv laa lana hanc guang dat khang duhmei kandic akhat thangc tat khwan e. 13Kamei tat ni khou, kamei rui kabangc gaanv ruh ta kaw guangna mina ruh ruh tiilouna, ‘Ai guang dat mak saanv mi hei rui ali bam khwan o,’ twna kadylou the.
14“Tiki meic nunc tei rui kata karaeng e, kumna kaniw rui kathei thangc meickhyn nunc ndiulouna, ‘Mi pu ti hei aniw guangh tisw nii mak ge,’ twna sa the.
15“Tiki kata guangh tiswlou the, kumna kamei guang dat the. Khoutei kamei rui syan tiilou kanmei bangc gaanv ruh ta tei kawna azuh azuh guanh pat the cho twmei thanv the.
16“Reymeipu tei guangna, ‘Poubauhmei, nang tuang mina tei rui mina ruh tuangc the,’ twna sa the.
17“Khoutei kakaipouc tei rui sa the, ‘Gay the, gaymei bangc! Nang ramh katitnamei khou lwm nuhpui zaeng rui, kaidai ruh ta sin tho.’
18“Kaneimeipu tei guangna, ‘Poubauhmei, nang tuang mina tei rui mina panguh tuangc the,’ twna sa the.
19“Khoutei, ‘Nang kaidai panguh sin tho,’ twna kakaipouc tei rui sa the.
20“Khoutei baihmei bangc akhat ni guangna, ‘Poubauhmei, mi hei nang rui tiiloumei mina tei e. Mi hei phey rui duamna rylou tuang the. 21Nang thu suailou nuh makmeipu de; kumna ai nang ta pingna the. Nang thu nang tuang hamhmei ta sini laameipu e khatni nang rui lingclou makmei ta taymeipu e!’
22“Khoutei guangh tei rui sa the, ‘He meicsimei bangc, nang mwang khou rui sa pat kanmei lat tei rui, ai rui nang ta latzan sw puni the. Ai hei suailou nuh makmeipu e, ai hei atuang hamhmei ta laameipu e khatni ai rui lingclou makmei ta taymeipu e twmei nang thay the. 23Ai guang dat khou kathuay kazauhna laa dat khang hei tei syan alipuikai khou lou nuh diki, tabui swna lou mak tu cho?’
24“Khoutei kamei rui kadaeng khou ding bammei nunc khou tei sa the, ‘Katuang mina tei kakhou rui laana, mina ruh sinmeipu khou tei tiilou ti tho.’
25“‘Poubauhmei, kakhang thu ruh nai bam dyng the cho?’ twna kaniw rui sa the.
26“Kamei rui sa the, ‘Ai rui nangniw khou sa tuang e: Naipui mei khou tei tii mbulou puni, maekpui mei khou tei kakhou naimei na tei sini laa tat kan puni.#Met 13.12; Mrk 4.25; Luk 8.18 27Tiki ata kaniw tuang guangc tisw zihmei, ata zauczihmei nunc ta tei, mi khou hei zay guangna ahu khou dowluai o.’ ”
Jisu Jerusalem khou Guangh Swna Gutmei
(Met 21.1-11; Mrk 11.1-11; Jhn 12.12-19)
28Mi guay hei salou tang lana, Jisu Jerusalem nzwanna ngangh the. 29Kamei Olive Chyng twna kawmei bamv khou, Bethphage lev Bethani ana guang pwkhou, kamei rui kaziap gaanv nei ta ndiulou huna, kaney khou sa the, 30“Nangney hu khou naimei namv khou hei nangney tat ro. Mi khou tei gut pwkhou meic tuangclou makmei kuanniam launa bangclou bammei ta ariw puni. Hei tei ricna mi khou hei laaguang o. 31‘Tabui swna nangney mi hei ric bam tu cho?’ twna thanv pw e thei, ‘Kaipouc#hamh e thei kakaipouc khang kage naina e,’ twna sa tio.”
32Ndiuloumeipu nei tei tat the, kumna kaney khou saloumei tei kahak ariw the. 33Kaney kuanniam launa tei ric bam khou, “Nangney tabui swna mi hei ric bam tu cho?” twna kakaipouc rui thanv the.
34“Poubauhmei khang kage naina e,” twna kaney rui daw the.
35Kaney rui hei tei zay guang the. Kaniw rui kuanniam ruc khou tei phey nsaplouna Jisu ta tidungclou the. 36Kamei tuangc guang pwkhou, meic nunc rui kaniw tuang phey chaeng khou bamclou the.
37Olive Chyng but khou rui kasou tat key nimei bamv khou kamei guang tangc pwkhou, kaziap meic kangdai, kaniw rui how kanmei charynmei taanv guay khang tei rui Ravguangc ta thuanckuna, kauc ranvna mi kumna kauc the:
38“Poubauhmei zanc khou guangmei guangc hei sangaymei e!
Tingkauh khou chuzaenghmei nai diu,
khatni kauh liangmei khou hymdaihmei sw diu!”#Kal 118.26
39Meic kangdai khou tei rui Pharisimei gaanvsaekc rui, “Dinhpouc, nang ziap nunc ta mphut tio,” twna sa the.
40Khoutei Jisu rui sa the, “Ai rui nangniw khou sa tuang e: kaniw kauc ti mak ge thei, ntauh guay rui kauc thau puni de.”
Jisu Jerusalem Ruc khou Kaploumei
41Jisu Jerusalem daeng ana guangna mi kaidai ta tei how pwkhou, kamei mi ruc khou tei kaplouna, 42sa the, “Nang khang chuzaenghmei phungc guang nimei chaeng tei aseic na sini thay khwan e thei mu ni! Tiki hei tei nang how mak khang nang khou rui nkamhlou kan the. 43Nang ta zauczihmei rui nang ta rilin chau haengvna ding bin nimei ganv guang pw the. 44Nang ta khatni nang raengc lungc khou bammei mei guay ta sw mut sutlou puni the. Ntauh akhat ruc khou ntauh akhat nsaplou bam dat lak khe. Kalam thu Ravguangc nang ta nkhavlou khang guangmei ta nang thay mak khe.”
Jisu Ravkai khou Gutmei
(Met 21.12-17; Mrk 11.15-19; Jhn 2.13-22)
45Khoutei Jisu Ravkai khou gutna ramh zuanc bammei guay ta tei nthau ganc the. 46Kumna kamei rui kaniw khou sa the, “‘Akai hei huayneypui kai sw puni,’ twna hylou e, tiki nangniw rui kwamtumei nunc kai tiswlou the.”#Isa 56.7; Jer 7.11
47Kumna tingmik pum kamei Ravkai khou nchamlou khwan e. Khoutei amuh daihmei nunc, Riakdanv dinhpouc nunc, khatni charuangc kapy nunc rui kata swluai khang karamc khwan e.#Luk 21.37 48Tiki kaniw sw khang kachaeng maek khwan e, kalam thu meic guayna rui kalat nking niina nking bam khwan e.
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.