ADECHHÜ 12
12
Anyiza na Abram Keci
1 #
Kek 7.2,3; Ibr 11.8. Apvüwa na Abram kiza, “No diyyiwa, nshilithu, nu nba jjen tsü teshi theng nu hi ayyi kesü pi no ccüca keten witsü walo. 2Hi ashicü kejon pi no cüden, nu mathu na mizzatenti keti kemehai saben. Hi sawegü pi no cü nu n-nyan sa mechan chiden, isanu no kesawegü kepvüwa saden.”
3 #
Gal 3.8. “Hi sawegü pi no cü ketenthu sawegü cüden. Isala kishen cü pi no cü ketenthu kishen cüden.”
“Nu hi no wina sawegü pi mizzatenti #12.3: Nu hi no... mizzatenti tsüdi; nyelela Mizzatenti tsüdila hi wi hi sawegü pi no kecü ti sawegü pi mathu la cülo khieben tsüdila cüden.”
4Abram na ma kahang mapi 75 wi Apvüwa na ma kekiza ti ma Haran wina Lot ssinu shhu. 5Abram na ma wubvü Sarai, ma cünyuwa tsa Lot, nu ma keben-keyeng tsüdi nu Haran wi ssikeya amaghathu tsüdi ssiya nu Kanaan yyi wi wale kesa ghena shhu.
Mathu wa Kanaan cukeya wi, 6Abram na ayyi tsü pvüdhi sen nu Moreh ji chanton kemetha, Shekhem wi kemetha pen kesü wi ghoya. (Tsü tsüwi Kanaan nyithu na ayyi ciwi hangben.) 7#Kek 7.5; Gal 3.16. Apvüwa na Abram tuwi gho nu ma wi khi, “Diyyi hawa ha hi pi nshicübvüghathu cü ketenwa tsü.” Ciwi Abram na kekinyipen kesü sapi Apvüwa ma tuwi keghowa tsü cü. 8Tsaseng wi ma apen ketsen sen nu Bethel nyunuti na nishuwa yikha wi cü nu ciwi Bethel wi niduwa nu Ai pi nishuwa sanu manyi jüwi ma kemnanpen saya. Ciwi la ma kekinyipen kesü saya nu Apvüwa kinyi. 9Tsüti Abram na apen kesü wina ketsen sen apen kesü wi wa sen nu Kanaan yyi acülawa wi wa.
Abram na Ejipt wi kewa
10Isala Kanaan wi azeng nmehai ntsa sanu Abram na apen ketsen sen Ejipt wi cü, nu matsü keu ciwi hang wale sa. 11Ma Ejipt ggü pvüdhi du keten wi ma wubvü Sarai wi kiza, “No nza tsikemehai kesü, 12Ejipt nyithu na no kemu wi mathu no pi iwubvüle saben, tsalina mathu hi pathi nu no ya hang yathsüaben. 13#Ade 20.2; 26.7. No itssüggüwale mathu kizalo, isathu no ghena mathu hi npathila nu kemehaisa hi noncca cüben.” 14Ma Ejipt ggü pvüdhi kedu wi Ejipt nyithu na ma wubvü tsüna nza tsikemehai ntsa kesa muya. 15Kedithu pahan na nzawa tsü muya nu ma tsikemehai cüki khipi kadimiwa kiza, nu mathu ma ssinu kadimiwa jjen wi wa. 16Ma ghena kadimiwa na kemehaisa Abram ssiya nu khaghaneni nu aneni, amesüsi, gadathu, amaghathu, nu sunsiesathu kejon kupi ma cü.
17Isala kadimiwa na Sarai ssiya kesalina Apvüwa na adhagha keti kesü kesun pi kadimiwa nu ma jjen wi keben anyithu miwi chi cüa. 18Tsaseng wi kadimiwa na Abram cichi nu ma keü, “No imiwi mangwa satheng nu? Mangkesa na ma nwubvüle hi nkiza nu? 19Mangkesa na ma ntsüggüwale hi kiza nu hi ya ma pi iwubvü ti sa thsü ten nu? Khili nwubvü ha ssiya nu akhemi wi shhulo!” 20Kadimiwa na ahza pi ma nyithu cü nu mathu ya Abram ma wubvü manyi gweghe nu ma keben tsüdi sen nu diyyiwa ciwi na bvü thsüa.
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.