LUK 23
23
Jisu Zen-o Pilat Mhundyü Nyu Kegun
(Mt 27:1-2,11-14; Mk 15:1-5; Jn 18:28-38)
1Lo tsükatsü temi aphu so-o a-zen Pilat mhundyü nyu gunla. 2Tson-o anyugun le a-nkhin-o, Pilat ka, “Agun le temi higü hile n temi sa zen kehü lo khajana pe Kaisar tsü nyalo tseo sorkari nkhin kehü lo a-npvü a-le raja nme letse, lo tsü le Khrista gü letse hüo a-hyulo le.”
3Lo tsükatsü Pilat le a-ka, “Nle Judanyu raja gü tsü ole?” tson-o a-ketso. Tsügenyu Jisu le, “Ele, nle kezo gü tsüle,” tson zoshü.
4Tsüselo Pilat le peshükeda ju lo temi dan ka, “Ale temi higü ge a-kemu nme-e hyulo mvu le.”
5Ai anyugun le anyugun yhenthyüo, “A-le Judia kazü aphu nyu, lo Galil kazü nyu ryüo hi keti, me senthyüo temi dankevü pe nthu hiti laso,” tsonni sola.
Jisu Zen-o Herod Mhundyüka Kegun
6Ai Pilat le jo tsü shashü njüo, “A-le Galil nyu ole?” tsekethyü temi dan ka ketsoshü. 7Tson-o a-le Herod kipon nyu letse kethyü shalo njüo, a-le Jisu nipe Herod ki shüshü; Herod le tsügwünkho ka tsü Jerusalem nyu ryüo bin kehü genyu. 8Lo tsükatsü Herod le Jisu hyu keshü ka a-kenyü rila. Kechamvule a-le nduka a-rüla shao kethon kie a-hyushü nyüsa ryü kela genyu; lo a-le ndun tho-e thyü pe a-hishü ti ado tse rüchün kehü genyu. 9Tsügenyu a-le Jisu ka jo kechon ketso; ai Jisu le a-ka thame zoni shü mvula. 10Lo peshükedanyu ju lo lesükeshatsin nyu ju le tsükatsü bin-o a-nkhin pe ketetsin thyü sola. 11Tsüselo Herod le a-shüpahü zenlo-o Jisu no tha lihi kemvu nme hontseo, ro kendi thyüo a-phinya shweshwe tsekethyü nme khipe a-nbenshü njüo a-nipe Pilat ki shüni la. 12Lo tsünyü tsü we Herod lo Pilat au le kengü gwalo la; ai tsü mhundyü we au le kerüchün gunryü.
Jisu Hüla Lotse Pen Kela
(Mt 27:15-26; Mk 15:6-15; Jn 18:39—19:16)
13Tsüselo Pilat le peshükeda ju lo pelünyu ju lo temi ko kequenlo njüo anyugun ka, “Hagun le temi higü hile me thyü nshvu kehünyu letse kethyü genyu a-ten zen-o aki ryü bin nyo. 14Ai hire, ale hagun mhundyü nyu a-ketso petsü sa gun-e, hagun le kenkhin jo tsü rüchün kegun le, ale a-ge kemu nme-e hyulo mvu; lo Herod-e tsühontse hyulo mvu. 15Tsügenyu a-le a-nipe ngun ki shüni shüla so; lo hire, a-le meno a-dushvula kezü tho nme-e thyüshü mvu lenye. 16Tsügenyu ale shaja pe a-tsüla njüo a-honi shü lati.” 17(Kechamvule nken kegun nga tsennyü Pilat le donyu nme hoshü pe anyugun tsü mvulo keshvu genyu.)
18Tsonshü ntsin anyugun aphu nra sen-o, “Temi higü no bin nya, ai Baraba we khini pe agun tsüshü lalo.” 19(Baraba tsüle sorkari shwikerüchün nyu nme lo me dukeshvu nyu nme genyu a-ten pe doka nyu khin njü.)
20Tsükatsü Pilat le Jisu hoshü lanyüo zoni, 21ai anyugun le nra anyugun yhenthyüo, “Krus ge hüla lo, a-khipe Krus ge hüla lo!” tsonlo la.
22Ai Pilat le gwünshen ge gü ka anyugun ka, “Nyu genyu ola? Temi higü le nyu gwakemvu thyüshü ola? Awe le a-ge a-hüla kezü kon nme-e hyulo mvu le; tsügenyu ale a-vüla njüo a-hoshü lati.”
23Ai anyugun le nra anyugun yhenthyüo a-hüla lotse kethyü hi ton sola. Tson-o anyugun le anyugun jo genyu kvulo. 24Tsüselo Pilat le anyugun kehi hontse khipe anyugun tsüla. 25Tson-o a-le sorkari shwinyü kemvu gü lo medukeshvu genyu doka nyu khin kenjü gü, anyugun le a-hoshüla lotse hi kethyü gü honi shüla; ai a-le Jisu we khipe anyugun no anyugun kendo thyülo lotseo zoshü la.
Krus Ge Jisu Hükethyü
(Mt 27:32-44; Mk 15:21-32; Jn 19:17-27)
26Tsükatsü anyugun le Jisu nrhisü zen gun kejü ka Simon tsekethyü Kurinnyu nme le kazü kecha kipon ryü kejü hyulo-o anyugun le a-nrhisülo njüo a-no krus sen tsü pen-o Jisu sithen lotse sola.
27Tsükatsü temi danda nme le Jisu sithen hü tsüdan nyu tenunyu dan me ko a-chechü hü. 28Ai Jisu le rani gü anyugun ka, “Jerusalem tenunyu ju, hagun le agenyu we chü nyalo, ai hagun le hagun nyenyu genyu chülo chi. 29Hire, gwünkho nme le ryü zhü nyo, tsünyü tsü nyu kendinyu lo a-gin nyu nyuphou pvü kemvunyu lo ntsenyu no thame kae a-ge nyüzü tsü kemvunyu dan le a-phou kengvütsin, tsonti. 30Lo tsükatsü mele kazüthun dan ka, hagun le ntsi-o age tsüryülo, lo rinchothun-e no ryüo asunlo lo, tson ti. 31Mele senbin kerhün gü ge nsen hihontse thyü yatselo senbin kesinyu ge we dihontse thyü so tila.”
32Lo tsükatsü kemu kethyü nyu mihvu ko pe a-sin-o hüla titse tenzen ryü. 33Tsüselo anyugun le kazü zan nme, “Pekhunru,” tsekethyü nme tilo njüo, tsüka krus ge a-hüla. Lo kemu kethyü hvu nme pe a-njüzin lo nme pe a-ngwazin tse a-sin-o hüla. 34Tsükatsü Jisu le, “Apvü anyugun kemu jü pe anyugun tsülo; kechamvule anyugun le thyü kebin hile shao thyü bin kemvu genyu!” tsonshü.
Tson-o anyugun le henshwio a-phi a-nya kenjünlo. 35Lo temi dan le tsüka bin-o nri bin. Lo pelünyu jue a-shwinyüo, “A-le me kechanyu we kenilo hü, a-le Sunggigü le kejükelo Khrista gü le tselo, a-no a-npvü a-kenilo chi!” tson sola.
36Lo tsüntimvule shüpahünyu dan-e keyüthyüo, keshonzü sen gü a-lao, 37“Nle Judanyu raja gü letse lo n npvü nkenilo chi,” tson sola.
38Lo a-pe soka, “HIGÜ HILE JUDANYU RAJA GÜ,” tsonkethyü thu sinshü.
39Tsüselo hü kenjü kemunyu hvu nme le Jisu nkhin-o, “Nle Khrista gü mvu ole? Tson yatselo nle n npvüe lo ayi ko tse kenilo ta.”
40Ai kecha gü le a-kesü-o, “Nko a-hontse kenjün thyü bin-e nyuthyüo tson hü nla? Nle Sunggigü nshvu mvu ole?” 41Tson-o a-le, “Nyi we nnyi shaja hyulo zü; nnyi we nnyi tho chün hyulo bin nyo; ai temi higü we tejvü kemvu nme-e thyü mvu.” 42Tson-o a-le, “Jisu, nle n raja bin nyu kegun ka aphin rüchün shülo!”
43Tsüselo Jisu le a-ka, “Ale nka zo tsentsü shü tile, nle nthu nnyi kebwen bin nyu bin tinla tiso.”
Jisu Kesi
(Mt 27:45-56; Mk 15:33-41; Jn 19:28-30)
44Lo tsü le tegi kevüja tseryü kenyhun la, lo tsükatsü gü tegi kenshen keti kazü aphu nyu tsangzün tin tsela. 45Yhüko-e benshü mvula; lo Kershvuka nyu phi sükhin kenjü gü le a-chvü nyu nrhen chwela. 46Tsüselo Jisu le nra sen-o, “Apvü, ale a kapu ho pe nben nyu shü güzhü sele nye,” tsonshü. Lo a-le jo tsü zoshü njüo a-kapu hoshü la.
47Lo tsükatsü shüpahünyu sokedagü le tha tsüdan thyükela hyushü njüo Sunggigü shwen-o, “Temi higü hile kentsen nyu nme hile la!”
48Lo temi dan tsü nri titse keryü nyu aphu tha tsühontse kethyü tsü hyushüo anyugun nyun jen-o tin küla. 49Lo a-keshanyu aphu lo Galil nyu a-sithen keryü tenunyu jue gü pere ki dun-o tha tsühontse thyü kela tsü shwi kü.
Jisu Pen gü Sunkela
(Mt 27:57-61; Mk 15:42-47; Jn 10:38-42)
50Tsükatsü pelünyu temi kegwa teshwen kepvünyu nme a-zan le Josef tsekethyü nme le bin hü, 51a-le pelünyu kechanyu dan kendo lo anyugun le thyükela nyu tsü anyugun zen-o kejorhün mvu; lo a-le Judanyu rünyi Arimathia nyu, 52Lo a-le Sunggigü Raja le keryü khwen kehünyu nme. Temi tsügütsü le Pilat ki gü Jisu min hi. 53Tson-o a-le Jisu min tsü penshye pe linen phi lope jelo njüo pen gü tso run pe sika thyü titse kenjü nduka temi nme min lope shüshwi kemvu nme nyu shüla. 54Lo tsünyü tsü nga genyu tha ndonron kethyü jon, lo Sabbath ti güzhü.
55Lo Galil nyu a-zen keryü tenunyu jue me sithen gü sikae lo a-min pe nyu tsethyü shüla yo tsü aphu hyu. 56Tson-o anyugun le nigun ryüo tharünkenyi lo terzü kechacha kethyü ndolo. Tson-o Sabbath nyü we anyugun le tejvü gü zen-o rüyülo.
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.