JOHAN 13
13
Jisu Le Senthyükelonyu dan Phasü Kethyü
1Lo nkenkechwi nga mhundyü Jisu le kazü hinyu a-le A-pvü ki gunla titse kethyü gwünkho le ryü laso; tsekethyü shalo; lo kazü hinyu kebin a-temi dan sogwa ryü, lo kethonthen tsüdan sogwa hü ti.
2Lo kheje ki chvütyü kebin ka Satan le Jisu ten pe me ben nyu shüla lo tse kethyü tedo pe Simon nyugü Iskariot Judas nyun nyu shüla. 3Lo Jisu le A-pvü le tha aphu hoshü pe a-ben ka shükela, tson-o a-le Sunggigü ka nyu ryü lo Sunggigü ki nigun nrün shalo. 4Tsügenyu chvütyü kebin ka so gü a-phi yhünla njüo züluphi nme khipe a-senphinlo. 5Tson-o a-le zü jape zükelu khun nyu shülo njüo senthyükelonyu dan pha sülao züluphi pe a-senphin pvü kehü tsü pe shonla latse gun. 6Lo a-le tson sen tse Simon Pitor ka ryü. Tsüselo Pitor le a-ka, “Npugü, nle apha süti ole?”
7Jisu le a-ka, “Ale thyü kebin hile nle ntsoka shamvu; ai nle hisiki sha loti.”
8Pitor le a-ka, “Nno thame kae apha sü loho!”
Jisu le a-ka, “Ano npha sü mvulo nle a kipon njün ndi.”
9Simon Pitor le a-ka, “Npugü, apha hvu ntimvule aben hvu lo ape-e sin ta.”
10Jisu le a-ka, “Zülu kelanyu le a-pha hvu nyeki kechaki sü mvue gwa, a-le nshün kü kebin genyu. Lo hagun le nshün bin, ai aphu le mvu.” 11Kechamvule segü le a-ten pe me ben nyu shüti yo tsekethyü sha kebin genyu a-le, “Hagun aphu nshün kü mvu,” tsonshü.
12A-le tson-o anyugun pha süla ntsin a-le a-phi khibenlo njüo dun tinla. “Hagun ale hagun ge thyü keshü hi shalo semon?” tson-o a-le ketso. 13“Hagun le alope Senkethyügü, tse lo alope Npugü, tse hü; lo hagun le tson kehü tsü le a-ketsin, ale tsügü genyu. 14Lo ale Npugü lo Senkethyügü thyüo hagun pha süla hülo hagun ko khinyunyu pha sülo zü. 15Kechamvule ale hagun ge thyü keshü hontse hagun ko no tsühontse thyülo titse kethyü genyu. 16Ale hagun ka zo tsentsü shüti le, gonyu le a-npunyu nyeki gon mvu; nmvue mele nikeshügü tsüle a-nikeshügü nye gon mvu. 17Hagun le tsü shao zenlo hü yatselo, hagun hen kegwa ketsin!
18“Lo ale hagun aphu rüla zo mvu; ale senyu kejülo yo, ale tsüdan shabin; ai ketsin lesü no penlo nrün genyu, ‘A tensü ketyü gü le sepe pe atsu.’ 19Tha tsü kethyü mhundyü nthu gerho ale nchwenyu hagun ka zoshütile, kechamvule tsü thyü keshü ka, ‘Ale tsügü,’ tse kethyü hagun no tenyenlo titse kethyü genyu. 20Ale hagun ka zotsentsü shüti le, temi lihigüe ale a-nikeshügü zenkelonyu le azenlo hünyo; lo temi lihigüe a zenkelonyu le a nikeshü güe zenlo hünyo.”
A-ten pe Me Ben Nyushü Nrün Jisu Le Nchweki Zokeshü
(Mt 26:20-25; Mk 14:17-21; Lk 22:21-23)
21Jisu le tsonzo keshü siki a-nyun keyhunkerun-o, “Ale hagun ka zo tsentsü shüti le, hagun nme le aten pe me ben nyu shüti.”
22Lo a-le segü rüla zoyo sha ntsen mvuo senthyükelonyu dan le khinyunyu kenri so. 23Lo Jisu so gunkeryü senthyükelonyu nme le miz ka Jisu nyun ntsen ka bin. 24Tsügenyu Simon Pitor le a-ben lope ndo pe a-hio a-ka, “A-le segü rüla zobin yo?” tse ketso shü.
25A-le Jisu nyun ntsen nyu bin-o ranigü Jisu ka, “Npugü, tsüle segü la?”
26Jisu le a-ka, “Ale tensü hilope honpen nyu ntsen pe a-tsü keshü gü tsüle.” Tson-o a-le tensü lope ntsenlo njüo pe Simon nyugü Iskariot Judas tsüshü. 27Tson-o a-le tensü tsügü khikelo siki Satan le a-nyun nyu yüla, lo Jisu le a-ka, “Nle thyü titse kebin gü thyü kemhelo nye!” 28Ai a-le nyu genyu jo tsü pe zoshü yo tsekethyü nme-e shalo mvula. 29Ai peha le Judas le rakakhin sen kehü genyu mvulo keshvu heilo nye, tsonshü letse, nmvue a-no tha pe kendinyu tsüshülo tse hü ado, tse rüchün la.
Hukum Keshün Gü
30Lo a-le tensü tsügü khipe tyü kelo siki kamhun ki whütse chwila, lo tsüle tsang-e zün laso.
31Lo Judas le kamhun ki chwila ntsin, Jisu le, “Ntsoka Temi Nyugü le a-zan kechwi thyü titse bin laso, lo Sunggigü le A-npvü a-ge zankechwi thyüshü titse bin laso. 32Lo Sunggigü le a-genyu zankechwi thyülo yatselo Sunggigü le a-ko no zankechwi thyü loti. 33Hire, ntsenyu dan, ale gwüngwa nye sin hagun zen bin loho so. Hagun le afü ti; ai ale himhundyü Judanyu ka, ‘Hagun le a kegun bin ka ryü loho,’ tsokeshü hontse; ale hagun ka zoshü gü zhü nyo. 34Hagun no keso hülo tsekethyü ale jo keshün nme khipe hagun ka shüti tse bin nyo. Ale hagun so keryü hontse hagun ko kesolo nye. 35Hagun le kesolo yatselo tsügenyu hagun lope ale senthyükelonyu letse kethyü mele hagun sha loti.”
Pitor Le Jisu Zan Zomvula Nrün
(Mt 26:31-35; Mk 14:27-31; Lk 22:31-34)
36Simon Pitor le a-ka, “Npugü, nle dikipon güti la?”
Jisu le a-ka, “Ntsoka ale kegü bin ki nle a sithen loho; ai hisiki a sithen ryü loti.”
37Pitor le a-ka, “Npugü, ale ntsoka nyuthyüo n sithen lomvu tila? Ale n genyu sishü ti!”
38Jisu le a-ka, “Nle a-genyu sishü tila? Ale nka zo tsentsü shüti le, nle azan zomvu gwünshen ge kemvuthen tero le khun loho.
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.