यॊहनस 5
5
पोखारी ही हेद्दे येसुस ओर्तोसिन कोड़े नन्ना
1इबड़ा ही ख़ॊख़ा येसुस यहूदीर ही ओन्टा परब नू येरुसलॆम केरस। 2येरुसलॆम नू भेन्ड़ो बकड़े गुसन ओन्टा पोखारी रहचा, अदिन इब्रानी भखा नू “बॆतसता”#5:2 इदही नन्ना नामे ‘बेतेसदा’ अरा ‘बॆतसैदा’ हवे। ब'अनर। अदही ओनबेंड़र'आ पाँच गोटा झला रहचा। 3इबड़ा नू ढ़ॆर बग्गे रोगियर अन्धहा, लेंगड़ा, ख़ेड्डे-खेक्खा ख़इका आलर बिड़िरका रहचर। [अरा अम्मु ही नुक्रनन पाब ऎरा लगियर। 4एन्देरगेका बेड़ा बेड़ा नू उर्बासी पैकस पोखारी नू एत्ता लगियस ती अम्मुन नुक'आ लगियस, अम्मु नुक्रना गनेम नॆ मुन्द आ पोखारी नू एत्ता लगियस, आस इन्द्रिइम रोगे र'ओस होले हूँ कोड़े मना लगियर।]#5:4 पच्चा ख़ेक्खा ता लिख्रका पच्चा पुथी गुट्ठी नू ईद मल जोड़रकी र'ई। 5असन ओन्टा आलस बिड़िरका रहचस। आस अड़तिस बछर ती बेमार रहचस। 6येसुस आसिन बिड़िरका ईरियस, अरा नगदे उल्ला ती एन्ने बिड़िरका दसन अक्खस ती, आसिन मेंजस, “नीन कोड़े मना बेद्ददय का?” 7रोगे आलस बाचस, “उर्बायो, अम्मु नुक्र'ओ ख़ने, एंगन पोखारी नू एत्त'आ गे नॆ हूँ मल्कर। एंग्है अंड़सना ती मुन्द दिम नन्नर एत्तनर कानर।” 8ख़ने येसुस आसिन बाचस, “चो'आ, अरा निंग्है पिटरिन चॊद'आ ती ऎका।” 9आ बारिम आ आलस कोड़े मंजस केरस, अरा तंग्है पिटरिन होच्चस ती कुद्दा नुंगा हेलरस।
लिकिन ईद मंजका उल्ला ख़न्न ऎख़ना उल्ला रहचा। 10औंगे कोड़े मंजका आलासिन यहूदी मुद्धर बाचर, “इन्ना ख़न्न ऎख़्रना उल्ला, औंगे नॆग ही लेक्खा निंगा पिटरिन चॊदना ती काना ठौका मल्ली।”#नहे 13:19; यिर्म 17:21 11लिकिन आस आरिन बाचस, “नॆ एंगन कोड़े नंजस आस बाचस, ‘निंग्है पिटरिन चॊद'आ ती ऎका।’” 12ख़ने आर आसिन मेंजर, “ ‘निंग्है पिटरिन चॊद'आ ती ऎका’ एन्ने निंगन बाचस, आस नॆ हिके?” 13कोड़े मंजका आलस बल्ला लगियस का आस नॆ हिकदस। एन्देरगेका असला आलर ही गोंहड़ा ही मारे येसुस असले गुच्छरका केरकाचस।
14ख़ॊख़ा येसुस आ आलासिन धर्मेसी मन्दिर नू ख़क्खियस ती आसिन बाचस, “ऎरा, नीन कोड़े मंजकादय, अउरिम पाप अमके नना। महले इन्द्रिइम कोड़हे खिलपत निंगा मना ओंगी।” 15आ आलस केरस ती यहूदी मुद्धारिन तिंगियस का एंगन कोड़े नंजस आस येसुस हिकदस।
धर्मेसी ख़द्दस ती उज्जना
16इबड़ा नलख गुट्ठिन येसुस ख़न्न ऎख़्रना उल्ला नू नंजका ती, यहूदी मुद्धर आसिन डाहा हेलरर। 17लिकिन येसुस आरिन बाचस, “एम्बस इन्ना गूटी बिगर ख़न्न ऎख़्रका ती नलख नना लगदस, अरा ऎन हूँ नलख नना लगदन।” 18औंगे यहूदीर आसिन पिटा गे अउर कोड़हे बेद्दा लगियर का आस ख़न्न ऎख़ना उल्ला ही नॆगन लेका मल चाड़ा लगियस, लिकिन धर्मेसिन तंग्है बंगस ब'आलियस ती तंगन धर्मेसी जोक्खा ननालियस।
19औंगे येसुस आरिन इदन फरीफरी तिंगियस, “ऎन निमन मानिम ब'अदन, ऎन धर्मेसी ख़द्दन एंग्है मने लेक्खा एन्द्रा हूँ नना पोलदन। एन्द्रन एम्बासी नन्नन ऎन ऎरदन अदिन लेका ऎन नन्दन। एन्द्रन एन्द्रन एम्बस नन्दस अदिन ऎन हूँ अन्नेम नन्दन। 20एम्बस गा एंगन चोन्हा नन्दस, अरा आस एन्देर एन्देर नन्दस अबड़ा उर्मिन एंगा ऎद्ददस। आस इबड़ा ती अउर कोहाँ नलख गुट्ठिन हूँ एंगा ऎद'ओस। होले नीम अनचकर'ओर। 21एकन्ने एम्बस केचका आलारिन चॊद्दस ती आर गे उज्जना चि'अदस, अन्नेम ऎन हूँ नॆकन ऎन बेद्ददन आर गे उज्जना चि'अदन। 22एम्बस नॆकन हूँ नेंवई मल नन्दस, लिकिन नेंवई नन्ना ही उर्मी अदियन एंगा सोंपचकादस। 23औंगे ओर्मा आलर एकासे धर्मे बंगासिन मईन नन्नर, अन्नेम धर्मेसी ख़द्दस एंगन हूँ मईन नना गे एन्ने नंजस। नॆ एंगन मईन मल नन्दस, आस एंगन तइय्का धर्मे बंगासिन हूँ मईन मल नन्दस।
24ऎन निमन मानिम ब'अदन, नॆ एंग्है कत्थन मेन्नर ती एंगन तइय्का धर्मेसिन पत्त'अनर, आर जनमजुग उज्जनन ख़क्खकानर। आर गे दंडे ही पॆसका इकला हूँ मल मनो। आर खे'अना ती कट्टियर अरा उज्जना नू कोरच ख़च्चकानर। 25ऎन निमन मानिम ब'अदन, बेड़ा बर'आ लगी, अरा आद अक्कुन बरचकी र'ई। आ बेड़ा नू बॊलता नू केचका आलर ऎन धर्मेसी ख़द्दन ही सड़न मेनोर। अरा अदन नॆ मेनोर आर उज्जोर। 26धर्मे बंगस गे उज्जनन चि'अना सवंग र'ई, अरा आस आ उज्जना चि'अना सवंगन आसी ख़द्दन एंगा चिच्कादस। 27अरा आस एंगा आलारिन नेंवई नना गे अदिया हूँ चिच्कादस, एन्देरगेका ऎन मनवा ख़द्दन हिकदन।
28इदही पत्त नू अमा हैकटर'आ, एन्देरगेका बेड़ा बर'आ लगी, केचका ओर्मा आलर एंग्है सड़न मेनोर। 29अरा आर उज्जा चो'ओर। दौ नलख नंजका आलर जनमजुग उज्जनन ख़क्खा गे उज्जा चो'ओर, अरा मलदौ नलख नंजका आलर दंडे ख़क्खा गे उज्जा चो'ओर।#दानि 12:2 30ऎन एंग्है मने लेक्खा एन्देर हूँ नना पोलदन। धर्मे बंगस ब'अना लेक्खम दिम ऎन नेंवई नन्दन। अरा एंग्है नेंवई नन्ना उजगो र'ई, एन्देरगेका ऎन एंगा पत्तार'आ गे मला, एंगन तइय्का एम्बासिन पत्तार'आ गे बेद्ददन।
येसुसी पत्त नू गोवाह
31ऎन ऎनिम एंग्है पत्त नू गोवाह चि'अदन होले, एंग्है गोवाह ही मोल मल मनी। 32एंग्है पत्त नू गोवाह चि'उस अउर ओर्तस र'अदस। अरा ऎन अख़दन का एंग्है पत्त ता आसी गोवाह ठउकम र'ई। 33नीम यॊहन नूड़रत'उस गुसन मेना गे आलारिन तइय्कर, अरा आस एंग्है पत्त नू चिच्का गोवाह मानी हवे।#यॊ 1:19-27; 3:27-30 34-35यॊहनस गा लघरना अरा बिलचना कन्डेल लेक्खा रहचस, अरा नीम जोक्क उल्ला आसी बिल्ली नू रिरयार'आ बेद्दा लिक्कर। एंगा आलासी गोवाह ही चाड़ मल मनी। लिकिन नीम नाड़र'आ गे दिम ऎन इबड़ा कत्थन तेंगदन।
36एंगा यॊहनसी गोवाह ती कोहाँ गोवाह एंग्है सिखाब'अना अरा एंग्है हैकट नलख हवे। धर्मे बंगस इबड़ा नलखन नन्ना ती मुंजा गे एंगा चिच्चस, अरा अबड़ा पुरुब नन्ती का आस एंगन तइय्कादस। 37एंगन तइय्का धर्मे बंबस हूँ तानिम एंग्है पत्त नू गोवाह चिच्कादस। नीम इकला हूँ आसी सड़न मल मेंजकादर महले आसी मुहिन मल ईरकादर।#मत्ता 3:17; मर 1:11; लूक 3:22 38अरा नीम आसी कत्थन निम्है जिया नू मल उइय्दर, एन्देरगेका आस निम्है गुसन तइय्का एंगन मल पत्त'अदर। 39नीम नेम्हा पुथी ही कत्था गुट्ठिन चिहुंक ती पढ़'आ, एन्देरगेका अबड़ा नू ती जनमजुग उज्जनन ख़क्खोर एन्ने सोचदर। अबड़ा दिम एंग्है पत्त नू गोवाह चि'ई। 40अन्नु हूँ आ उज्जनन ख़क्खा गे नीम एंग्है गुसन मल बरदर।
41ऎन आलर ती बरना ओहमन मल बेद्ददन। 42एन्देरगेका ऎन निम्है पत्त नू अख़दन का निम्है नू धर्मेसी चोन्हा मल र'ई। 43ऎन एम्बासी नामे ती बरचकादन, लिकिन नीम एंगन मल इंझ्रदर। नन्नस ओर्तस तंग्है नामे ती बरदस होले, आसिन नीम इंझर'ओर। 44नीम गा निम्है नू ओर्त ओर्तोस ती ओहमन ख़क्खा गे बेद्ददर। लिकिन नीम ओर्त लेका धर्मेस ती बरना ओहमन ख़क्खा गे मल बेद्ददर। होले नीम एकासे पत्त'आ ओंगोर?
45धर्मे बंगस गुसन ऎन निमन बदी ननोन एन्ने अमके सोच'आ। नीम असरा ननू मूसस दिम निमन बदी ननोस। 46नीम मूसासिन मानिम नू पत्त'अदर होले, नीम एंगन हूँ पत्त'ओर दने, एन्देरगेका आस एंग्है पत्त नू लिखचकादस। 47लिकिन नीम आस एन्देर लिखचकादस अदिन मल पत्त'अदर होले, ऎन एन्देर ब'अदन अदिन एकासे पत्त'ओर?”
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.