यॊहनस 18
18
येसुसी हॆंरना
(मत्ता 26:47-56; मर 14:43-50; लूक 22:47-53)
1येसुस गोहरारनन नंजस मुंजियस ख़ने, आस तंग्है चेलर गने किद्रॊन ढाबन कट्टियस ती आ पक्खे केरस। असन ओन्टा जैतून मन्न ही बटकी रहचा। अइय्या आस तंग्है चेलर गने केरस।
2येसुसिन धरत'आ गे पपहर गे संगे चि'ऊ यूदस हूँ आ अड्डन अख़'आलियस, एन्देरगेका येसुस घड़ी घड़ी तंग्है चेलर गने अइय्या काला लगियस। 3ख़ने यूदस ओन्टा रोमी सैनर ही फउद अरा मुध नैगर अरा फरिसीर तरती तइय्का धर्मेसी मन्दिर ख़ापू सैनर गने आ बटकी नू बरचस। आर होरा, कन्डेल अरा लड़ई ही कमहड़ गुट्ठिन ओन्द्रर ती बरचर।
4येसुस तंग्है मइय्याँ मन्ना उर्मी कत्थन अक्खस ती बहरी केरस ती आरिन मेंजस, “नीम नॆकन बेद्ददर?” 5आर आनाकिर्ताचर, “नासरेत ता येसुसिन बेद्ददम।” येसुस बाचस, “आस ऎनिम हिकदन।” (येसुसिन धरत'आ गे पपहर गे संगे चि'ऊ यूदस हूँ आर ही गने इज्जका रहचस।) 6“आस ऎनिम हिकदन” एन्ने येसुस बाचस ख़ने, आर पछली किर्रियर ती ख़ॆख़ेल नू खत्रर केरर। 7ख़ने येसुस अउरिम आरिन मेंजस, “नीम नॆकन बेद्ददर?” आर बाचर, “नासरेत ता येसुसिन बेद्ददम।” 8येसुस आनाकिर्ताचस, “ऎन गा निमन बाचकन ‘आस ऎनिम हिकदन’, लिकिन नीम एंगन बेद्ददर होले, इबड़ारिन काला चि'आ।” 9“नीन एंगा चिच्का अबड़र ती ओर्तारिन हूँ मल एब्सकन”#यॊ 6:39 एन्ने येसुस बाचका कत्था मना गे ईद एन्ने मंजा।
10सिमॊन पतरस गुसन ओन्टा तलवार रहचा, अदिन आस नतकियस ओथ्रस अरा कोहाँ नैगासी ओर्त जॊंख़ासिन खोत्तस। ख़ने आसी तीना ख़ेबदा खंड़रा। आ जॊंख़ासी नामे मलख़ोस रहचा। 11ख़ने येसुस पतरसिन बाचस, “निंग्है तलवारन खाप नू उइय्या। एम्बस एंगा चिच्का सस्ती ही डुबहा ती एंगा ओन्ना दिम र'ई।”#मत्ता 26:39; मर 14:36; लूक 22:42
हन्नासी मुन्द येसुस
(मत्ता 26:57,58; मर 14:53,54; लूक 22:54)
12फेन सैनर अरा आर ही सैनर ही मुद्धस अरा धर्मेसी मन्दिर ख़ापू सैनर येसुसिन धरचर ती हॆंचर। 13अरा आसिन मुन्द हन्नास गुसन होच्चर, आस आ चाँन ता कोहाँ नैगस कैफसी तंग ससिरस रहचस। 14ई कैफस दिम यहूदी मुद्धर गे सलहा चिच्का रहचस का, “ओर्त आलस उर्मी आलर गे खे'अना दौ हवे।”#यॊ 11:49,50
पतरस येसुसिन बलदन ब'अदस
(मत्ता 26:69,70; मर 14:66-68; लूक 22:55-57)
15सिमॊन पतरस अरा अउर ओर्तो चेलस येसुसी ख़ॊख़ा ख़ॊख़ा केरर। ई चेलस कोहाँ नैगासी चिन्हार आलस रहचस, ख़ने येसुस गने कोहाँ नैगासी चाली गूटी केरस। 16लिकिन पतरस बहरी बली गुसन इज्जका रहचस। ख़ने नन्ना चेलस नॆ कोहाँ नैगासी चिन्हार रहचस, आस बहरी बरचस ती बली ख़ापू आली गने बाचस ती पतरसिन भितरी होच्चस। 17ख़ने बली ख़ापू रहचा आद पतरसिन मेंजा, “नीन हूँ ई आलासी चेलर ती ओर्त मलदय का?” पतरस बाचस, “मला, ऎन मलदन।” 18आद पइय्याँ उल्ला रहचा, ख़ने जॊंख़र अरा धर्मेसी मन्दिर ख़ापू सैनर चिच्ची ओद्दर ती ओनबेंड़र'आ इज्जर ती अख़र'आ लगियर। अरा पतरस हूँ आर ही गने इज्जस ती अख़र'आ लगियस।
कोहाँ नैगासी मुन्दहारे येसुस
(मत्ता 26:59-66; मर 14:55-64; लूक 22:66-71)
19फिन कोहाँ नैगस येसुस ती आसी चेलर ही अरा आसी सिखाब'अना ही पत्त नू मेंजस। 20येसुस आनाकिर्ताचस, “ऎन एन्देर सिखाबाचकन अदन ओर्मर अख़नर। ऎन उर्मी यहूदीर ख़ॊंड़रना गोड़हा एड़पा गुट्ठी नू अरा येरुसलॆम मन्दिर नू घड़ी घड़ी सिखाबाचकादन, अरा नुड़'अरकी एन्द्रन हूँ मल बाचकन। 21ख़ने नीन एंगन एन्देरगे मेन्दय? एंग्है सिखाब'अनन नॆ मेंजका र'अनर आर गुसन मेना। ऎन एन्देर बाचकन अदिन आर अख़नर।” 22येसुस एन्ने बाचस ख़ने, धर्मेसी मन्दिर ख़ापू सैनर ती ओर्तोस असन हेद्दे इज्जका रहचस, आस येसुसिन चटकाचस अरा बाचस, “कोहाँ नैगासिन एन्नेम आनाकिर्त'अना का?” 23येसुस आसिन आनाकिर्ताचस, “ऎन इन्द्रिइम बिड़दो बाचकन होले, अदिन तेंगा का एन्देर बिड़दो बाचकन। लिकिन ऎन मानिमन बाचकन होले, एन्देरगे एंगन ल'अदय?” 24फिन हन्नास येसुसिन हॆंरका रांगे कोहाँ नैगस कैफस गुसन तइय्यस।
पतरस अउरिम येसुसिन बलदन ब'अदस
(मत्ता 26:71-75; मर 14:69-72; लूक 22:58-62)
25सिमॊन पतरस असन इज्जस ती अख़र'आ लगियस ख़ने, आर आसिन बाचर, “नीन हूँ गा आसी चेलर ती ओर्तोस मलदय का?” आस नटचस ती बाचस, “ऎन आसी चेलन मलदन।” 26कोहाँ नैगासी जॊंख़र ती ओर्तोस, नॆख'आ ख़ेबदन पतरस खंडका रहचस, आसी पाहीयस रहचस। आ जॊंख़स पतरसिन बाचस, “नीन गा येसुस गने जैतून बटकी नू रहचकय, अदन ऎन ईरकन।” 27ख़ने पतरस अउर हूँ अदिन नटचस। अरा आ बारिम ख़ॆर चींख़िया।
पिलातुसी मुन्द येसुस
(मत्ता 27:1,2,11-14; मर 15:1-5; लूक 23:1-5)
28फिन आर कैफस गुस्ते येसुसिन रोमी राजी ख़ापुसी गढ़िया नू होच्चर। आ बारी बिज्जना बेड़ा रहचा। आर गढ़िया भितरी इदगे मल केरर का आर सोतरा#18:28 यहूदीर ही नॆग ही लेक्खा नन-यहूदीर ही अड्डा नू आर कोर'ओर होले, आर कट्टना ही ओन्ना-मॊख़नन मॊख़ा गे जोगे मल मनोर। मल मनोर अरा कट्टना परब ही ओन्ना-मॊख़नन मॊख़ा ओंगोर। 29खने पिलातुस बहरी आर गुसन बरचस ती मेंजस, “नीम ई आलासी बिड़दो नू एन्देर दोस नन्दर?” 30ख़ने आर आनाकिर्ताचर, “ईस गुन्हा नंजका आलस मल रहचका होले, निंग्है गुसन ईसिन मल ओन्द्र'ओम दने।” 31ख़ने पिलातुस आरिन बाचस, “नीम ईसिन हो'आ अरा निम्है नॆग लेक्खा नीमिम नेंवई नना।” यहूदीर बाचर, “एमा नॆख'आ हूँ जिया पिटना ही अदिया मल्ला।” 32(येसुस तंग्है खे'अना ही पत्त नू मुन्द तिंका रहचस का ऎन एकन्ने खे'ओन, आद मना गे इबड़ा एन्ने मंजा।)#यॊ 3:14; 12:32
33ख़ने पिलातुस गढ़िया भितरी केरस अरा येसुसिन मीख़ियस ती आसिन मेंजस, “नीन यहूदीर ही बॆलय का?” 34येसुस मेंजस, “नीन ई कत्थन निंग्है ती मेन्दय का, महले नन्नर एंग्है पत्त नू निंग्है गुसन तिंगियर का?” 35पिलातुस किर्त'अर बाचस, “ऎन यहूदी मलदन। निंग्है आलर दिम अरा आर ही मुध नैगर निंगन एंग्है ख़ेक्खा नू सोंपचका र'अनर। नीन एन्देर नंजकय?” 36येसुस आनाकिर्ताचस, “एंग्है राजी ई ख़ॆख़ेल ता मल्ली। एंग्है राजी ई ख़ॆख़ेल ता रहचका होले, एंग्है जॊंख़र लड़'ओर दने, का ऎन यहूदीर ही ख़ेक्खा नू मल चीतार'ओन दने। लिकिन एंग्है राजी ई ख़ॆख़ेल ता मल्ली।” 37ख़ने पिलातुस बाचस, “होले नीन बॆलय का?” येसुस आनाकिर्ताचस, “नीन ब'अदय का ऎन बॆलन। मानिमन आलर गे तेंगा गे ऎन कुन्द्रकन अरा ख़ॆख़ेल नू बरचकन, एका ओर्तस मानिम गे र'अदस, आस एंग्है मेन्दस।” 38पिलातुस आसिन बाचस, “मानिम एन्देर हवे?” आस एन्ने बाचस ती अउर हूँ बहरी यहूदीर गुसन केरस ती आरिन बाचस, “ऎन गा आसी मइय्याँ एन्देर हूँ बदी मल ख़क्खदन। 39लिकिन ऎन निमा गे कट्टना परब नू ओर्त गुड़रकासिन अम्बना ही चाल र'ई। एन्देर नीम बेद्ददर का ‘यहूदीर ही बॆलासिन’ निमा गे अम्बोन?” 40ख़ने आर चिच्चियार'आ हेलरर अरा बाचर, “ईसिन मला, बरब्बसिन अम्बा चि'आ।” (बरब्बस गा हुलहुली नंजका आलस रहचस।)
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.