Luka 11
11
Mviko wa Zumbe.
1-4.
1Mushi azaikala hantu akivika; akiheza, mhina ywakwe muṅwe azamuti: Zumbe, tihinye kuvika, sa Yohana ahinyizevyo wahina wakwe! 2Azawati: Mkivika mγambe: Tate yweshu we uko mwe lwingu! Zina jako jigimbikwe! Uzumbe wako uize! Uvyokunda vibontoke kunu shi sa uko mwe lwingu! 3Utinke mishi yoshe nkande yetu yetiagiza! 4Utiushilize masa yetu! Hambu hata ishwi tamwushiliza kila muntu atibanilevyo. Ushetiingize mwe miγezo! Miya utivunile mwe vibada! 5Azawati: kuna muntu, ana mbuyae, yuja akiiza na kilo kikulu azamuti: Mbuyangu, ninka migate mitatu! 6Kwa kuti mbuyangu ashwelweye silai azafikila mwangu, kangi sina nkande za kumunka. 7Lushe yuja mwe nyumbai atamlandula kuti: Ushenipishe! Luvi lwizuγalwe, kangi wanangu nina nawo kunu sasai, sikombaγanya kuinuka nikikunka? 8Namiti: Ati asheinuka, akimunka, kwa kuti ni mbuyae, miya kwa kuti yuja nkana shoni, atainuka, amunke vyemwagiza.
Lombezai.
9-13.
9Nami namiti: Lombezal! Nemwinkwe. Londai! Nemwone. Goṅondai! Nemzuγwilwe. 10Hambu kila mwelombeza ainkwa, mweionda aona, mwegoṅonda azuγwilwa. 11Kwenyu kuna ṅwana, akilombeza ishe nkande, ishe amunke iwe? Ao du akimlombeza kapala, aleke kumunka kapala, amunke nyoka? 12Ao akimlombeza tagi, amunke kisuse? 13Lushe ati inywi wabada mwadaha kuinka wana wenyu vintu vitana, ishe ywenyu ywa kilwingu asheinke mpeho ṅazi waja wemlombeza?
Yesu aingata mpepo ishiyolonga.
14-26.
14Azaingata mpepo, inu ne ishilonga. Miya ija mpepo ikilawa, 15yuja muntu ashilongaye azalonga, wantu wazavimaka. Miya weyae wawe kuṅwe wazalonga; 16Aingata mpepo na nguvu ya mzuka, zumbe ywa mpepo. Watuhu wazamγeza wakilonda lwitangilo lweanduka mwe lwingu. 17Miya ṅwenye azataila ntongonyezi zawe, azawati: Kila uzumbe ukipangana ṅwenye wachakuka, hata ni nyumba zitakinilana. 18Ati Satani akipanga ṅwenye, uzumbe wakwe utoγa zeze? Kwa kuti mwalonga, kuti niingata mpepo kwa nguvu ya mzuka. 19Ati imi niingata mpepo kwa nguvu ya Mzuka, wana wenyu waziingata kwa nguvu ya ndai? Kwa ivyoho waja watazamilaha. 20Miya ati niingata mpepo kwa nguvu ya chala cha Mulungu, shivyo, uzumbe wa Mulungu uzabula kwenyu. 21Muntu mnguvu akiγoja kitala chakwe aitozize mata, viya vyakwe vyaikala mpeho. 22Miya mnguvu mwemzinka akimwizila, akimvota, ataγuwa mata yakwe yoshe, ndiyo akialila, atapangila weyae mitahe yakwe. 23Ashiyeniambiza aniomanya, ashiyeunganyanya haṅwe na imi aasakanya. 24Ati mpepo ye usaba yalawa mwe muntu, yaanga mwe shi ishinayo mazi, yalonda hemelo, yashejiona. Ne ndiho ilonge kuγamba: Neniγotoke na mwe nyumba yangu, niiawilemo namo! 25Ikiiza yaibuliza, iihaγilwe, iihambiγwe. 26Ne ihohita kwa γuwa mpepo mfungate ntuhu mbada kuzinka ija ṅwenye, zitaingila, ziikale muja. Ivyoho bindilizo ja yuja muntu jitaiha kuzinka chandilo.
Mwena nyemi ni yuhi?
27Aho akilonga izi mbuli kwa waja wantu, hana mvyele, azainula kanwa, azamuti: Ifu jikuvyelejo, hata matombo, uonkileyo ṅwenye, yaona nyemi. 28Angwe ndiye: Kweli, we nyemi ni waja weiva mbulingwa ya Mulungu na kuiγolokela!
Lwitangilo lwa Yona.
29-36.
29Wantu wakimtimila wangi muno, azaandiila kulonga angwe: Mbali inu ni mbada; yalonda lwitangilo, kangi nkezewainkwe lutuhu, kushima luja lwa Yona. 30Hambu sa viyaho Yona aγalukilevyo Waniniwe lwitangilo, vivyoho ṅwanangwa ywa muntu neaγalukile inu mbali lwitangilo. 31Mushi wa mlaho zumbe ywa kivyele ywa ija shi ye lwazu lwegwila zuwa mishi ya vuli, atazainukila inu mbali, ailahe; hambu azalawa, ikohelela, ateγeleze viyuγo vya Salomo; kangi shivyo, kunu kuna mkulu kumzinka Salomo. 32Mushi wa mlaho wantu wa Niniwe watazainukila inu mbali, wailahe, kwa kuti wakibilikilwa ni Yona wazavoteka, kangi shivyo, kunu kuna mkulu kumzinka Yona. 33Nkakuna muntu mwekoleza taa, akiiika hantu hekifisha, kangi nkaifunikila ngahu, miya aiika he kiikilo chakwe, kangwe weingila nyumbai waone langaila.
Langaila.
34Langaila ja ṅwili ni zisho; ati zisho jako ni jedi, ṅwili wako woshe una langaila. Miya ati ni hada, hata ṅwili wako una lwiza. 35Olelesha, langaila, ujona najo, jisheγaluke lwiza! 36Ati ṅwili wako woshe una langaila, ukisheikala na lwiza hata kafungu kaṅwe du, lushe woshe una langaila, viya utemulikilwa ni langaila ja taa.
Yesu ashunda Mafaliseyo na watabaluwangwa.
37-52.
37Akilonga, Faliseyo muṅwe azamhembeleza, akishashule kwakwe. Akiingila na nyumbai azaikala ha jiila nkande. 38Yuja Faliseyo akiviona azamaka, kuti nkahakile mikono, ashizati aje. 39Zumbe azamuti: Inywi Mafaliseyo, vinywelo na vijiilo muvichunta se, miya uko ndai muigisize mumpa na ubada. 40Wadashi inywi! Aγosholeye viya vye se, siye aγosholeye viya vye ndai? 41Ati mwainkila kwa mbazi viya vye mumo, ne ndivyo vyoshe vimiγalukile kishiṅwiko. 42Miya we ukiwa ni nywiyo Mafaliseyo! Kwa kuti ngoγwe na mauzi na mboγa zoshe mwazilavya fungu ja kumi, miya milahile na mikundishize ya Mulungu mwaiomboka; anga inu mwaibasha yohena na kusheleka viya. 43We ukiwa ni nywiyo Mafaliseyo! Kwa kuti mwe mavikilo mwakundisha kuikala ha wazumbe, kangi mwakunda kuluγushiziγwa lwazoi. 44We ukiwa ni nywiyo watabaluwangwa na Mafaliseyo! Kwa kuti mwafanana na mbila zishizotailikana, wantu wazojatila, miya nkawataila, kuti ni mbila. 45Mtamulomongwa muṅwe azamlandula angwe: Mfuzi, ukilonga ivyoho, watikanka hata ishwi. 46Angwe: Hata inywi watamulomongwa nemwone ukiwal Kwa kuti mwainuza wantu miziγo ishiyoinulikana, kangi inywi wenye ija miziγo nkamwidowa na chala kiṅwe du. 47We ukiwa ni nywiyo! Kwa kuti mwazenga mbila za wateγanyingwa, kangi waishe zenyu wazawakoma. 48Ivyoho mu waona, kangi mwaivana na miγoshwele ya waishe zenyu, hambu waja wazawakoma, inywi mwazenga mbila zawe. 49Kwa ivyoho viyuγo vya Mulungu vyalonga: Neniwatumile wateγanyi na ntuṅwa, watawakoma kuṅwe na kuwaγulusha, 50kangwe inu mbali itiγilwe mpome ya wateγanyi woshe iitilweyo, vivyo inu shi ituzilwevyo, 51kuandiila kwe mpome ya Abeli mpaka kwe mpome ya Zakaliya akomiγweye haja he okelo ja ṅombe za mviko na he nyumbangwa gati. Kweli namiti: Inu mbali nezeivitiγilwe. 52We ukiwa ni nywiyo watamulomongwa! Kwa kuti mzausha lutailile; wenye nkamwingila, kangi waja wekunda kuingila mwawafingiza. 53Akilawa kuja, watabaluwangwa na Mafaliseyo wazaandiila kumupisha na kumlosa na mbuli nyingi na kumnyatila, 54ati wamwonela lushingile na mbuli, ayolonga.
New Testament in Kishambala © Bible Society of Tanzania, 2005.