Utandiko Kulondolola
Kulondolola
Izina lyakuti Genesisi ilya Cigiliki likasenula ukuti Utandiko. Lupapulo luu lukalanda pa uumbo wa vintu vyonsi, kutandika kwa mutundu wa muntu, kutandika kwi ifyo nu kucula kwa munonsi, nga nu mwayela inzila yakwe Leza ku mutundu wa muntu. Lupapulo lwa utandiko lwaya mu viputulwa ivikulu viili.
Mu capita 1-11 umuli ilandwe lya kuumbwa kwa nsi ni landwe lyakutandika kwa mutundu wa muntu. Kuu kuli kulondolola mukuzika kwa pali Adamu na Eva, Kaini na Abeli, Nowa na mulamba nga nu Lupungu lwa Babeli.
Mu capita 12-50 ilandwe lyapa vikolwe vyakutandika vya ina Izlaeli. Uwakutandika wali a Abulaamu. Wene wamanyike na Leza pa utailo nu kuyela Leza. Lyene icalondelapo ilandwe lyapali Isaki, umwana umonsi wakwe Abulaamu nga na mwizikulu Abulaamu, Yakobo akaamwa ukuti Izlaeli. Nga Yosefu uwamu ana ikumi na yaili isi wamwisileko amano ukuluta. Mu ciputulwa cii mwaya ni vyacitike pakuti Yakobo na ana yakwe yauze na aluko ikale mu mpanga ya Eguputo.
Lino ulupapulo lukulanda ilandwe lya pa antu, icankolelo lukulanda pali vino Leza wacita. Lwatandika pakuzumilizya ukusakamala kwakwe pa antu yakwe. Mu lupapulo lonsi lwa utandiko Leza akwetimo imbali ikulu. Wene akapingula nu kuvunuka yao akacita iviipe, akatungulula nu kwazwa antu yakwe. Lupapulo lwalemvilwe mpiti apakulondolola utailo nga na vino Leza akayazwa kuti yasunge utailo na maka.
Utantiko wa vili mu lupapulo luu
Uumbo wa vintu vyonsi nu mutundu wa muntu 1:1–2:25
Kutandika kwa kwifya nu kucula 3:1-24
Ukufuma pa manda yakwe Adamu kufika pa manda yakwe Nowa 4:1–5:32
Nowa na Mulamba 6:1–10:32
Lupungu lwaku Babeli 11:1-9
Ukufuma pa manda yakwe Syemu kufika pa manda yakwe Abulaamu, Isaki na Yakobo 12:1–35:29
Amu mupanda wakwe Esau 36:1-43
Yosefu na Ina yakwe 37:1–45:28
Aina Izlaeli mu Eguputo 46:1–50:26
Mambwe-Lungu Bible © The Bible Society of Zambia, 2013