Lin 2
2
1Petngendrei ke indrahnan sane ndre sulo-on odo lokpoi pe lok eleng indrinum, takokopwe ile eriy.
2Pe idu rang ndrodul eri Petngendrei indre-et ile pule-en sane ndre sulo-on ndre Iy indrahnan hondrunum ti pe Iy imyau. 3Petngendrei ipatihi rang ndrodul pe itnembruwen, odosa marai ndre sulo-on ti Iy indritakokopwe indrinum, pe Iy imyau idu eriy.
Adam pe Ewah
4Sane odo lokpoi pe lok eleng eri hehir ihpa ndre kurtih.
Kalmene-en Lapan Petngendrei ihnan lokpoi pe lok eleng, 5eri Iy ihndrahnan lengin indrundrut mapwi, pe homou ndramat odo po maryan ndruhun tehe sane mapwi. Ile pe sane kei pe sane mundriu hendrerenge mapwi. 6Lengin isendrut mapwi, odoke wo inu-us lon poi isa ndritan pe isonolwi poi. 7Inum pe Lapan Petngendrei ikuni poi se, pe iyepisi ndramat kamal ile eriy. Pe Lapan Petngendrei iruhi ngohon ile lon ndrongon ndramat. Ndramat ti ihu ngohon pe ile moren.
8Inum pe Lapan Petngendrei iduhon poi hombrul ise Iden, pe iduwe ndramat ndre Iy iyepisii eri imin eriy. Iden ti ile wuron rai ea. 9Iy iduwe kei handrai pe handrai rahye’ su, pe mbrwe’ su ti huyen odo yo-on, eri hehir odo pule-en poi Iden. Idu ndrokoron lok eriy, eri kei ndre ru-iy. Kei he-ei odo hasamat pwi,#2.9 kei odo hasamat pwi: Tok Pisin, diwai bilong givim laip. pe kei he-ei yi eri intawe tawene odo sane huyen pe sane mo-on.
10Wo handrang ihtot iyin Iden pe inahnan sane henerenge ile huyen. Iy ihtot ile ndre kan ti pe iltalngan iy ile wo mandra-ane ndre haandrang. 11Wo handrang eri rangan Pison, ihtot iyin lo lok Havilah. 12Gol huyen, pe kei handrai menuhun huyen, ndrodan ndre pat handrai huyen he-en lok eti. 13Iy handrang eri Gihon, ihtot iyin lon lok Kus. 14Iy handrang eri Taigris, ihtot ile wuron rai ea odo lok Asiria, pe iy handrang yi eri kah Yufretis.
15Inum pe Lapan Petngendrei iduwe ndramat kamal imin pule-en poi ndre Iy indretohon odo Iden, kile pe iy we kina-an, kimpo marai pe madan kisso eriy. 16Lapan Petngendrei ipe ile tadan ihpa, “Ou oyo-on mbrwen kei ndre sulo-on odo poi ketih, 17odoke kei ndre intawe tawene odo sane huyen pe sane mo-on eri ou oyo-on mbrwen kolwii. Uh ou oyo-on eri we amat kidu ke ndre rang etih.”
18Eri pe Lapan Petngendrei ipe ihpa, “Ndramat kamal iy ke homou imin eri mo-on. Yu we kuhnan homou kowson odo henuwii iy.”
19Ile pe Iy ikuni poi se, pe Iy iyepisi su ka-an pe nenka-an ile eriy. Inum pe Iy ikuni su ile hun ndramat, ile pe Iy ipe kindre-et ndramat kuti kitou ranga’ su. Iy eti uu pe ka-an pe nenka-an handrai handrai ti ndre ranga’ su iyenon ea tih. 20Ile pe ndramat kuti iduwe ranga’ su ka-an pe nenka-an ndre sulo-on. Odoke homou indrahpa ndre iy ti pwi, pe indrila huyen odo we kile kowson eri pwi.
21Eri pe Lapan Petngendrei ihnan ndramat kamal imtir tuw, pe Iy irwi ndruwin kohlon he-ei, inum pe isokopti ndre kohlon yi, 22pe ihtungon ndramat pedih ihir odo ndruwin kohlon iy kamal. Inum pe Iy ikuni iy pedih ti ile hun iy kamal.
23Pe iy kamal ipe ihpa,
“Kah tapa kede! Iy kuti ihpa ke ndre yu.
Ndruwin hokuni odo ndruwi pe sengin odo sengi.
Petngendrei ihtungon iy odo ndruwi,
ile pe iy rangan ‘pedih.’”#2.23 pedih: Ile nolou Hibru ti kuruwen ihpa ndre nolou Hibru kamal.
24Iy eti uu pe kamal inna-au odo hun taman pe tinen pe inohtok ile ndrodan mbrulun, pe horu harla ke ndramat homou.
25Kamal pe pedih ndrihi’ horu kopwi, odoke horu tuno’ horu mah-ah pwi.
© 2011, Wycliffe Bible Translators, Inc. All rights reserved.