LUKE 24
24
Jisu Rholeküsüra
(Mat 28.1-10; Mrk 16.1-8; Jhn 20.1-10)
1Jütisanü Jüasekhe rüne thomütho vünüh mari nüh küche küsa zanyo arheküünguri thi avüjuri vi nü rüku vü wa. 2Thinü rüku kükhietelohwa tü küprijakümü ngura. 3Jütisanü mari tü rüku lovü tu nü noh tü kümowatü müngu nüh samü. 4Jüti sataji mari tü amüshe kürüza sataji peveh ünü, nyi künyi thsümünyi rierieta küsa vü nü mari kütuovü tsie küpela ngu. 5Thi mari tü krü she kümüthuoh kenüh mari nyiavü künyia nü azhih vü tetsuo, thinü masü nüh marivü, “Mokenüh aküsüri azavü akürhowa phah tse lo? 6#Mat 16.21; 17.22,23; 20.18,19; Mrk 8.31; 9.31; 10.33,34; Luk 9.22; 18.31-33.Ma nü hala münyiethuoh, rhoshele tewathuoh, ma nüh Galileevü küpevü nohri vü mowa küza nüh müsheluo. 7Nyi Tsawa tü re taji kükhiemuora ke vü thsemü nü zekemü naveh, thi rülo kücheawa vü rholesüra naveh, ta ma nüh küza,” ti küza.
8Jüti küüza vü mari tü ma zhüwa müshekera taji, 9rüku vünüh tsezhuwa nü azhü hamari aveh viwa türaluokeri vü thi küpari aveh vü nga küza. 10Thi wa povüküsari vü küüza nyimza jümari tü Maria Magdalene thi Joana thi Maria Jems za thi nyimza küpari nga wa. 11Thitü makeri’a nüh hamatü müshe kühuophie taji mari mütsotü nüh samü. 12Thitü Pitor tü süra taji zhü rüku vü wa nü kükietsuo taji rüku lovü nono ünü rükuthsüri mpa küpela ngu, thi momowa samüthuoh nüh timüshe ma ngo taji ma zhe vü shele tewa.
Emaus Lekhuji vü Tseküwa
(Mrk 16.12,13)
13Jüma rülo vü nyi künyi tü Jerusalem vünüh mile türü kükiatuo anyu Emaus ti küsavü wa nti wa. 14Jütiküsavü masü tü zanyo momowa samüthuoh nüh haluotse. 15Masü tü jüti haluo taji jüle tse ünü Jisu nüh tsemasü vü shenyi ru nü masü vü nyitewa. 16Thitü ma müküüthsü nti küsa kenüh masü notha tü saküpa mütü. 17Jütisanü ma nüh masü vü, “Nohsü tü tsemüngu nü momowa jüle tse lo?” ti küna.
Thinü masü tü lorü taji tsietewa. 18Jütiküsavü masü nyi küsü Kleopa ti küsawa nüh mavü, “Küze tse Jerusalem vü küruri azhie nüh noh mpa nüh sütathuohtü momowa samüthuoh nüh müküthsüwiesanathuoh,” ti rületsü.
19Thinü ma nüh masü vü, “Mo zhükuwa lo?” ti küna. Thinü masü nüh ma vü, Jisu Nazareth, setsaküthsüri, Saküüwuowa thi nyiri aveh atüvü küüro vü nga thi azhü vü nga kükhrasheri küsü zhüku lie. 20Levü küjiri thi sierhüri nüh re taji kümüshemüsüvü thsemü nü zothemü üta sanü zekemü. 21Thitü ma tü Israelri kürhesawawie tü nti hiri tü tsotüveh. Thi jü mpa mükünyu hakümjie sakümü nga nosü rülo küchethuoh. 22Jümpa mükünyu hiri refü nyimzari wuori nga nüh shierüne kümüto rüku vü wa taji ru hiri vü küzaküüngo she. 23Mari wa ma kümo müngu nüh samü, thi mari tü rügizhüleri ngu thi ma nüh küüza, “Ma nü rholetewathuoh ti küza ta ru küza.” 24Hiri kürü peküveh wuori nga rüku vü wa nü nyimzari nüh küzaküveh kümüjie ngu ta, thitü ma kümo nü müngu ta, ti küza.
25Thinü ma nüh masü vü, “Amüshe müküjuri thi setsaküthsüri nüh küüza mükütsotüri! 26Khrista tü hari vünüh münomüna nü ma kütholathovülovü kütu leh nyu ülo?” ti küza. 27Mosa vünüh ru setsaküthsüri aveh küju ma nüh ma mpa makürho zhütsazhü vünüh rüle tsü kheh.
28Mari tü mari nüh wa nti kütse anyuwa shenyi ru ünü matü anyu jüma kari aleküsuo vü wa nta küsa üta sa. 29Thitü masü tü ma khe taji, “Noh tü hisü siepetewaluo, küpakenühnyunü münüle nga tetsethuoh thi rülo nga aküsuo vünüh tewathuoh,” ti küza. Thinü ma nga masüvü nyipe nti sanü tewa. 30Jütisanü ma tü masü sie shietsaluo nti ashiekütsapevü pe ünü, ma tü alohse vi nü jüma nyia tsiatsü taji zokhuo nü masü tsü. 31Thinü masü notha tü pie taji ma thsüra. Thinü masü atü vünüh ma tü ratewa. 32Jütiküsavü masü mpa kürüchie taji, “Ma nüh lekhujivü hisü siekürüchie nü zhütsazhüri hisü vü küzakütsevü hisü luoveh tü anyih kümüjie tsomütsü ülo?” ti sa.
33Jüti sataji masü tü müküzhike wiethuoh nüh Jerusalem vü shele tewa, thinü türaluokeri thi mari refüri aveh sehzhu küpela ngu. 34Thinü masü nüh, “Vüwa tü rholetewa tsah wiethuoh, thi Simon vü nga künguthuoh,” ti küza.
35Thi lekhuji vünüh masü vü momowa sanüh küza, jümpa mükünyu alohse zokhuo kütsü vünüh ma nüh saküüthsü nga küza.
Jisu nüh Ma Sehnyiri vü Küütsa
(Mat 28.16-20; Mrk 16.14-18; Jhn 20.19-23; Krr 1.6-8)
36Mari jükümjie haluo küveh vü, Jisu mampa ru mari azhievü tsie.
37Thinü mari tü kükhrih nü saküüngo she, thi mari tü zhehzhe nguvehtünyie ti müshe. 38Thinü ma nüh mari vü, “Nohri tü mokenüh müküto nüh saveh lo? 39Hi wiethuoh, thinü nohri eh keri thi eh jihri noluo. Hi pah taji noluo; küpakenühnyunü sietse tü hi kümüjie asa thi arümüpeh,” ti küza.
40Ma tü jü küza mütajinü ma keri thi ma jiri mari vü kütsa. 41Jütawie ketünga mari tü loküzhe thi küngo aria vünüh mütsotü nüh peküveh vü ma nüh mari vü, “Nohri tü hala kütsaküzhu wuori peveh ülo?” ti küna. 42Thinü mari nüh anga nyihküükhro sükhri küsü vi matsü. 43Thi ma nüh jüma vi taji mari atüvü nüh tsa.
44Jütisanü ma nüh mari vü, “Mosa Khonyo vü nga thi setsaküthsüri nüh kürhü vü nga thi Küriehiri lasivü nga eh zhüku rhüküsa aveh müsaju ji mümühie ta küsa hi nüh nohri siepeküveh vünüh nohri vü küüza ehzhü hamari,” ti küza.
45Thi ma nüh mari luoveh saphie tsü taji zhütsazhüwa küüthsü taji 46mari vü, “Jümatü hakümjie rhüsaveh, Messiah tü münomüna taji rülo kücheawa aküsü vünüh rholenaveh, 47thi Jerusalem vünüh sate taji akuoh aveh vü luovehkükhaphrü thi kükhiemuo noküja ma nyo vünüh küzanaveh. 48Thi nohri tü hamari povü küsari. 49#Krr 1.4. Thi halie, eh Pa nüh azhü tsü küsawa hi nüh nohri vü tsünaveh, thitü rügi vünüh kükhrawa nohri vü müjieküru küjunü nyuküjiwa vünüh huope luo,” ti küza.
Jisu Sie Rügivü Tekükuo
(Mrk 16.19-20; Krr 1.9-11)
50 #
Krr 1.9-11. Jütisanü ma nüh mari sie alievü wa taji Bethani küju siewa nü ma ke thsuo küze taji tsia mari tsü. 51Thi ma nüh tsia mari tsüküveh vü ma tü rügivü sietekuo taji mari vünüh porietewa. 52Jütisanü mari tü khieloti lozhe nü ma khurü taji loküzhewa nüh pro nü shele Jerusalem vü teru. 53Thi mari tü mükütuo thuoh nüh Kükhurüzhe vü pehuo taji Saküüwuowa siake pehuo.
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.