LUKE 20
20
Jisu Kükhra Küüna
(Mat 21.23-27; Mrk 11.27-33)
1Rülo küsü ma tü Kükhurüzhe vünüh nyiri sosie thi küza peküvehvü levü küjiri thi Khonyo küsosieri thi kükhruori ti ma vü ru nü, 2“Noh mokükhra vünüh zanyo hamari saveh nüh hiri vü küzajie,” ti khuo. 3Thinü ma nüh rüle taji, “Hi nga nohri vü azhü küsüküna naveh tinü küza luo. 4Johan Baptist tü rügivünüh ru ünü nyiri vünüh lo?” ti küna.
5Jüti küüna vü mari tü küsü nüh küsü vü jüle taji, hiri nüh ma tü rügi vünüh ti küza nti ünü, “Thinü mokenüh ma mütsotü lo?” ta sanaveh. 6Thi hiri nüh ma tü nyiri vünüh ti sa nti ünü nyiri aveh nüh aloh vi hiri veh naveh, küpakenühnyunü mari nüh Johan tü setsaküthsüri küsü ta küsa müshetotekütse kenüh, ti sa. 7Jükenüh mari nüh, “Ma tü khievü nüh ru nüh hiri nü müthsü,” ti küzamü.
8Thinü Jisu nüh mari vü, “Mokükhrawa vünüh saveh nüh hi nga nohri vü küüzanyu,” ti rületsü.
Zhuküürori Khukekümüsü Kürefü Küsü viküüzhühie
(Mat 21.33-46; Mrk 12.1-12)
9 #
Isa 5.1. Jütisanü ma nüh nyiri vü küüzhühie zhü hama viküza: nyi küsü nüh rhelivizhu küsü sataji azhuküürori tsotümü taji anyu küpa vü wa nü hothake petewa. 10Jütiküsavü avi küpeleh tsotho juru ünü ma tü siepeküsü azhuküüro jümari vü küze taji rhelivi vi ma tsünatünyie ti sa, thitü azhuküüro jümari nüh ma fetaji zanyo küsü nga ma mütsü nüh zhejamü. 11Jüsevü nga ma nüh siepe küpa küzelehü, thinü ma nga fe thi saküzükrü she nü kürütso küzemü. 12Jütawie ketünga ma tü siepe kücheawa küze lehü, thinü mari nüh hama tü sakümüsamüna she tsü taji zhejamü. 13Jütiküsavü rhelivizhu vüwa nüh, “Hi tü moti sanalo? Hi nüh eh tsa küümzetsawa küze naveh, mari nga manü siakerana tünü,” ti sa. 14Thitü azhuküürori nüh ma ngu ünü mari mpa kürüchie nü, “Hama tü hiri vüwa tsathuoh, tinü hiri ma fethemü nüh rah, jütathuoüji hiri ma zhezhu vira naveh,” ti sa. 15Jütisanü mari tü ma zhewa rhelivizhu alievü jamü taji ma fethemü.
Jütathuoüji rhelivizhu vüwa tü azhuküüro jümari vü mowa sanathuoh lo? 16Ma tü ru taji azhuküüro jümari fethe khehmünathuoh, jütisanü rhelivizhu jüma vi küpari tsümünathuoh, ti küza. Mari tü azhü jüma küthsüra vü Saküüwuowa nü jüüta küüsawanyu, ti küza.
17 #
Krh 118.22. Thitü ma nüh mari no phoke taji, thinü khanavü mowa rhüsaveh lo?
Zhe küsari nüh aloh jakümüwa nüh ajüke vü alüwa samüthuoh ta küza saveh, ti küza. 18Thari nüh tsuotsa aloh jürügivü ka naveh nüh kuoriekhewie naveh, thi aloh jüma nüh küsüküsü vü nga tsuotsawa ka thuoüji nü to nya khehwie naveh, ti küza.
Akhrükükhrüh Küüna
(Mat 22.15-22; Mrk 12.13-17)
19Jütisaküveh tsothovü Khonyo küsosieri thi levü küjiri tü ma vü ake thse nti müshe, thitü mari tü nyiri krütewa, küpakenühnyunü küüzhühie jümatü marivü phrate ta küsa mari nüh küthsü kenüh. 20Jükenüh mari tü ma zi taji ma re nü kükhrari thi Romri Kajiwa vü thsemü na küsa kenüh nyi wuori ma vü küzetaji ma müküle küüpha. 21Mari tü ma vü wa taji, “Küsosiewa, noh tü khe ta nyuri küza thi sosie tsetse ti, thi kümürhümüze sa nyuri mükütsa, thitü Saküüwuowa lekhuji zhütsawa vünüh sosie tsetse ti. 22Tinü hiri tü Romri Kajiwa akhrükükhrüh ale ünü alenyu lo?” ti küna.
23Thitü ma nüh mari kümüshe thsü tajinü mari vü, 24“Hi vü raka küsü künoluo; thawa tsorhe thi thawa nyorhüke saveh nüh,” ti khuo. Thinü mari nüh, “Romri Kajiwa rhe sa veh,” ti küza.
25Jütiküsavü ma nüh mari vü, “Kaisar azhiri vi Kaisar tsümü luo, thi Saküüwuowa zhiri vi Saküüwuowa tsümü luo,” ti küza.
26Ma nüh jüüta küüza kenüh nyiri atü vünüh mari tü ma mürera nüh samü, thi mari tü ma zhü kenüh ngo nü zom ti petewa.
Aküsü vünüh Kürhole Zhüku Küüna
(Mat 22.23-33; Mrk 12.18-27)
27 #
Krr 23.8. Jüsevü kürhole münyie ta küsa Sadusi wuori ma vü ru taji 28#Kho 25.5. azhü küna nü, “Küsosiewa, Mosa nüh hiri vü rhükütsü, nyi küsü ajie nüh avüvüh vi taji atsamünyie nüh sütehu thuoüji ma nü nüh ma vüvüh vitaji ma jie kenüh atsa kümüwumüra saluo ta küza saveh,” ti küza. 29Thi khanavü jününyi türü peh, thinü apowa tü avüvüh vi, thitü atsa küsü nga müngu nüh sütewa. 30Thi akünyiawa nga jükümjie, 31thi kücheawa nga nyimzawa jüma vi, thi jükümjie mari türü aveh atsa münyie nüh nyimzawa jüma jamünü sütewa khe. 32Thi asevü thuoüji nyimzawa nga sütewa. 33Thinü thuohtüvü kürholevü nyimza jüma tü thavüvühwa sanathuoh lo? Küpakenühnyunü mari türü aveh nyimza jüma vi avüvüh küsa kenüh, ti küna.
34Thinü Jisu nüh mari vü, “Khinyi kürho tsari tü vüvühvüpa sa thi vüvühvüpa vi tsüveh,” ti küza. 35Thitü thari nüh thuohtüvü kürhovü küwa tsehri thi aküsü vünüh kürholeri thuoüji vüvühvüpa nga müsathi vüvühvüpa nga vimütsüthuoh. 36Küpakenühnyunü mari tü müsülethuoh, mari tü rügizhüleri sie zarikethuoh thi mari tü kürholeri tsa sakümüthuoh kenüh Saküüwuowa tsari samüthuoh. 37#Tse 3.6. Thi aküsüri rhosürale veh ta küsa Mosa nga nüh athsoküjepuke vünüh küüza ma nüh jüla nüh Vüwaküji Abraham Saküüwuowa, thi Isaac Saküüwuowa thi Jacob Saküüwuowa ti sa. 38Thi ma tü aküsü Saküüwuowa nyu, thitü rhoküvehwa, küpakenühnyunü aveh nga ma vünüh rhoküveh kenüh, ti küza.
39Thinü Khonyo küsosieri wuori nüh, “Küsosiewa, noh nüh küzamühie she tsüthuoh,” ti rületsü. 40Küpakenühnyunü mari tü zanyo küsü nga küünalera mükünyiethuoh kenüh.
Messiah Zhüku Küüna
(Mat 22.41-46; Mrk 12.35-37)
41Thitü ma nüh mari vü, khiela nüh mari tü Messiah David atsa ta küzara naveh lo? 42#Krh 110.1.Küpakenühnyunü David tü ma mpa wienga Kürie hiri lasi vü:
“Vüwa nüh eh Vüwa vü,
eh zhie wuo vü shupe luo.
43Noh mükünongüri hi nüh no ji kükhu lovü müjieküthse küju nü,” ti küza.
44Jükenüh David tü ma vü Vüwa ti ji, jütathuoüji ma tü khiela nüh ma tsa ta sanaveh lo? ti küza.
Khonyo Küsosieri vünüh Zhüzhü üta Jisu nüh Küüza
(Mat 23.1-36; Mrk 12.38-40)
45Thinü ma nüh nyiri aveh küünara atü vünüh ma sehnyiri vü, 46“Khonyo küsosieri vünüh azhüzhüluo, mari thuoüji küüzhuvüh aküsuo sa, thi asü küsaperi vü nyuri nüh mari küüsiake, thi kükhurüzhe vü ape kümühieri, thi kütsazhu vü ape kümüsieri lomü. 47Mari tü tünyivühra azhe vü müratsatsati thi aküthsesanü kükhuo küsuo satajinü kütse wie. Jükenüh hamari tü nyi küpari nyia vünüh kümnomna küjingu naveh,” ti küza.
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.