HAOKAPHOK 20
20
Abraham eina Abimelech
1Apam chiwui eina Abrahamna Negebwui ramshong vāda Kadesh eina Shurwui ngachaili tāpama; kala Gerarli vai. 2#Hao 12.13; 26.7. Abrahamna apreiva̱ Sarahli “Azarva̱na” da hānga. Chieina Gerarwui awunga Abimelechna Sarahli khui. 3Kha mangshong Varena Abimelechli rāhānga, “Yanglu, nana kakhuia sha̱nao chiwui vang eina na thiki jiura, kaja ava mi kateiwui preiva̱na.” 4Abimelechna mangasomirangsāthuda hānga, “Proho, nana khayon makhalei mili shaothatrala? 5Akhalattana ‘Hi izarva̱na’ kala sha̱naopava̱nala ‘A ipāna’ majimala? Chiwui vang ining katong eina kala ipāng kathar eina kasāna.” 6Chieina Varena awui mangshongli hānga, “Mha, nana ningkathar eina kasāna kaji ina thei, kala nana iwuitungli morei masā khavai khāmkhame chi ina; chieina ali masāza̱ khangasakna. 7Chiwui vang eina apreiva̱ chi hanmihaolu, ava marān akhana, ana nawui vang seihā sāmida na ringra. Kha nana mahanmiakha na thilakra, kala nawui khalei saikorala thira da theilu.”
8Chieina Abimelechna ngathorthakva̱ ngakarthuida awui raobing saikorali hokhuilaga tui saikora chi hāngchithei, kala athum saikora ngacheelakhaowa. 9Chieina Abimelechna Abrahamli hokhuida hānga, “Nana ithumli khi kasākhala? Ina nali khi morei sāhaoda nana ili kala iwui wungramli hakkhamahā morei phungrākhamikhala? Masākhangayi ot chi nana sāhaira.” 10Kala Abimelechna Abrahamli hānglui, “Nana khi phaningda hikathā ot kasākhala?” 11Abrahamna hānga, “Apam hili Vareli khangachee maleimana kala ipreiva̱wui vang athumna ili shaothathaipaishina da kaphaningwui vang hithāda kasāna. 12Chili lāngda kachangkhat hāngsa jiakha izara̱ shokpapama, kaja ishāvāwui naongalāva̱na, ishāva̱wui maningmana, chieina ipreiva̱ ngasā kahaina. 13Kala Varena ili ishāvāwui shim eina thuikhangasak chitharān ina ali kahāngna, ‘Ithumna khavāvāpam kachida ili napāna’ da hāngmilu jikahaina.” 14Chieina Abimelechna seila, yaola, awui rao sha̱nao mayarnao kachungkha Abrahamli mida apreiva̱ Sarahlila hanmihaowa. 15Kala Abimelechna hānga, “Yanglu, iwui ngalei, nawui mangāli theida lei; nana somkhangai apam chili sompaira.” 16Sarahlila hānga, “Yanglu, ina napāli lupāsā thingkha mihaira; nawui ngasokazat mi saikorawui mangāli nali khayon maleimana da mashung ngasak kahaina.” 17Chieina Abrahamna Vareli seihā sai; kala Varena Abimelechli raimihaowa; kala apreiva̱la, rao sha̱naobingla raimida athum nao pharāhaowa. 18Kaja Abraham preiva̱̱ Sarahwui vang eina Varena Abimelechwui shimkhurli sha̱nao saikorawui naopam shungkhamiserhairasai.
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.