HAOKAPHOK 2
2
1Chithāda sāda kazingram eina okathui kala chiwui alungli khalei aning-anang saikora sākuphaowa. 2#Heb 4.4; 10. Kala kashinethang Varena ana sāda khalei saikora kupserhaowa, kala kashinethang chi ngasāmkhui. 3Chieina Varena kashinethang chi somida tharngasaka, kaja Varena sākahai saikora kuphaida chithang ngasāmkhui. 4Kazing eina ngalei kasā tharanwui thotbing chi hina. Proho Varena kazing eina ngalei sāthang, 5ngaleitungli akhar maleisāmana, kala luiwui thingnā-ra̱hābing makhārshokrangsai kaja Proho Varena atam chitharan okathuili zingrot marotāmisāmana, kala lui vākhavai mi khipākha maleisāmana; 6kha ngaleiwui eina leijui ngapānkālaga okathui katongali tara̱ chaimi —
7 #
1 Cor 15.45-47. Chiwui thili Proho Varena ngaleiwui chifa eina mi sākhui, kala nātangkhurli kharingwui khakkhā suisangmi; chieina mi chi kharinga ngasāhaowa.
8Kala Proho Varena zingshoshong, Edenli yāmgui akha sākhuida ana sākakhuia mi chi chili chipama. 9#Phon 2.7; 22.2,14,19. Kala ngaleiwui eina mik khangayama kala kashakazā sākapai thingrong ayur ayāyāva̱ phorngasaka. Yāmgui chiwui alungthungli kharingawui thingrong kala kashi-kaphā kathei thingrongla phorngasaka.
10Yāmgui chili tara̱ chaimi khavai Edenwui eina kong akha longshoka, kala chiwui eina ngayarkhaida kong mati ngasāhaowa. 11Khare chiwui aming Pishon hoi; sinā khaleipam Havilah ngaleili kuimareida khalonga kong china; 12chiwui sinā mathālaka; bdellium kala onyxla samphanga. 13Kakhane kong chiwui aming Gihon hoi; Cush ngalei kuimareida khalong kong china. 14Kala Assyriawui zingshoshong khalonga Tigris kong china kakathumana. Kala khamate chi Euphratesna.
15 Proho Varena mi chi Eden yāmgui sāmathā khavai kala mayon khavai chili hai. 16Kala Proho Varena mi chili kasoda hānga, “Yāmguiwui alungli khalei thingrong kachiva̱wui athei shaipaira; 17kha kashi-kaphā theithangmei khavai thingrongwui athei chi mashaipaimara, kaja chi shaithang na thira.”
18Chiwui thili Proho Varena hānga, “Mi hi amāng kapam maphāthura; awui vang kachā ngachonme akha sākhuira.” 19Chieina Proho Varena ngalei eina ngaleili khalei sāyur kala khamasaiwui vanaoyur saikora sākhui, kala saikora chi aming phokmi khavai mi chiwui ngalemli khuirāmi; kala mi china kahoho chi manglākapai kachiva̱ chiwui aming ngasāhaowa. 20Mi china sha̱kei yur saikora, kala kazingramwui vānaobing, kala khararwui sāyurbing saikorali aming phokmi, kha awui vanga ali ngachonmishapa kachā akhala masamphangmana.
21Chieina Proho Varena mi chili piphup ngasakhaowa, kala ā pivā kahai eina arāpthingra̱ akha khuilaga akhamā chi aphi eina sāphinmihaowa; 22kala Proho Varena khuikahai arāpthingra̱ chieina sha̱nao akha sākhuilaga mi chiwui mangāli khuirāmi. 23Chieina mi china hānga,
“Ara hi iwui ara̱kuiwui ara̱kuina,
kala iwui asāwui asāna;
ali Sha̱nao hora,
kaja ali Mayarnaowui eina khuishokkakhuina.”
24 #
Mat 19.5; Mk 10.7; 1 Cor 6.16; Eph 5.31. Chiwui vang eina mayarnaona ava̱ avāli horhaida apreiva̱li ngaruma, kala ani asā akha ngasāhaowa. 25Kala ala apreiva̱la, khanini asāmsai eina leisai, kha makhayakmana.
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.