HAOKAPHOK 15
15
Varena Abramli Tuingashit Kasā
(Heb 11.8-10)
1Hiwui thili Abramli Prohowui tui chi rāmahāmida hānga, “Mangacheealu Abram, I nawui chāngveina; nawui sāman chungmatailakra.” 2Kha Abramna hānga, “O Proho VARE, nana ili khi minikhala, kaja I nao maleichingrangli, iwui shimlui kakhui chi Damascuswui Eliezarrala?” 3Abramna hānga, “Yanglu, nana ili naothei mamimana; kala iwui shimli pharākasang raonaona shimlui khuihaorali.” 4#Hao 17.16,21; 18.10; 21.2. Kala yanglu, Prohowui tuina ali rāhāngluishita, “Mi hina nawui shimlui makhuimara; kha nakhalattawui naona khuira.” 5#Rom 4.18; Heb 11.12. Kala ana ali ayarshong thānshokta hānga, “Kazingramshong yangkālu; nana sirabing chi shānkhuishapakha shānkhuilu.” Chieina ana hānga, “Nawui naotunla chiyākhara.” 6#Rom 4.3,9; 2.23; Gal 3.6. Ana Proholi shitsanga; kala chiwui vang ali khamashung khangaronga da shānkhui.
7Kala Prohona ali hānga, “Ngalei hi nawui ngasā khavai Chaldeawui Ur eina thānkashoka Proho chi ilaka.” 8Kha ana hānga, “O Proho VARE, hi ina samphangra kaji ina kathāda theirakhala?”
9Ana hānga, “Kum kathumwui muklānao akha, kum kathumwui me avā akha, kum kathumwui yaovānao akha, nāsha̱ akha kala kha̱na̱ akha da ili khuirāmilu.” 10Chieina ana khuivāsera, kala kaikhanini sālaga akhawuitungli akha ngashomda hai, kha vānaobing chiya mangakaimana. 11Khalāng sāshaana sā kathipam chili yongkharā eina Abramna kashamhaowa.
12 #
Job 4.13,14. Zimik tunnanai Abram piphuphaowa, kala yanglu, khangachee tangmangting kahai akha Abramli rāshunga. 13#Sho 1.1-14; Ots 7.6. Chieina Prohona Abramli hānga, “Theikazaklu, kaja nawui ara̱-azāna kha̱mi sāda athumwui lam makhaningli zatta miwui raonao sāra, kala athumli zingkum shāmati rekharekra, 14#Sho 12.40-41; Ots 7.7. kha athumna otram ngatha̱khami yur chiwuitungli iwui khamashung bichar tāshungra, kala athumna lan kachungkha khuiphungda shokluira. 15Nava chingri eina nashāvā ngarāwui ngalemli vāra; rarlak kahai atamli mathālak eina chifara. 16Athumna mithot khamateli hili latungluira, kaja Amornaobingna morei kasā makāshungranga.”
17Zimik tunhaida tangmang kahai tharān meikhut kashoka meiham akha kala meiwon kakā zarmei akha kashuirak shokta ngakai kahai sākhumbing chiwui ngachaili kānvāhaowa. 18#Hao 17.2,7; 9.14; 21. Chithang Prohona Abramli tuingashit akha sāda hānga, “Nawui naotunbingli Egyptwui kong eina thuilaga kahaka Euphrates kong vāshungda ina khamina, 19chiya chiwui alungli khalei Ken, Keniz, Kadmon, 20Hit, Periz, Rephaim, 21Amor, Canaan, Girgash kala Jebusbingwui ngalei china.”
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.