HAOKAPHOK 13
13
Abram eina Lot Khangapak
1Chieina Abramna apreiva̱, kala awui khalalei saikora, kala Lot zangda Egyptwui eina Negebshong latshanga. 2Abram sha̱keila, lupāsāla, sinala shānglak eina leisai. 3Negebwui eina zatlaga Bethel eina Aiwui ngachaili khare kachāng shimnao sakahaipam Bethel mashangshungranglakha eina tangda zatlaga apam chili shangkashung eina, 4ana khareli hanphut sahaikasā apam chili Abramna Prohowui mingli khoruma. 5Kala Abramli ngasokazata Lotla awui yao eina sha̱kei kala kachonshim leisai, 6chieina ani pamkharum hi ngalei chiwui eina samkaphang china mashapthuwa; kaja aniwui sha̱kei, lan chungnāhaida mangasopampaithuwa, 7kala Abram eina Lotwui sei kahombing kharar ngarokhaowa. Atam chitharān ngalei chili Canaannaobing eina Periznaobing pamsai.
8Chieina Abramna Lotli hānga, “Iniwui ngachaili kala iniwui sei kahomnaowui ngachaili makharar ngarokaranu, kaja ini shimkhur akhana. 9Lam katonga hi nawui mangāli khalei maningmala? Iwui eina na ngateithuiulu. Nana uishong khuiga jiakha ina yāshong vāra; nana yāshong khuiga jiakha ina uishong vāra.”
10Chieina Lotna ngashānyanglaga Jordan tampāk chi Prohowui yāmgui thāda Zoarwuishong khalei Egypt ngalei tākam eina apam kachiva̱li tara̱ mathālak eina khalei chi thei. Hi Prohona Sodom eina Gomorrah mashimān ngasakranglakhawui atamna. 11Chieina Lotna Jordan tampāk saikora kapangkhuiya, kala Lotna zingshoshong vāhaowa; chithāda sāda ani ngapākhaowa. 12Abramna Canaanli soma, kala Lotna tampākwui keinung ngachaili pamda Sodom vāshungda awui kachonshim khaningkai. 13Chitharān Sodomwui mibing hi makaphā makhayā Prohowui mangāli morei phungmatailak kahaibing ngasāsai.
14Lotna pākthui kahaiwui thili Prohona Abramli hānga, “Nana pamda khalei chiwui eina atungshongla, azingshongla, zingsho kala zingtun kapeiyanglu; 15#Ots 7.5; Gal 3.16. kaja nana kathei ram saikora hi ina nali kala nawui naotunbingli katang mavaila mira. 16Nawui ara̱-azā okathuiwui chifayākha ngasā ngasakra; chieina mina chifa shānkhuishapakha nawui ara̱-azāla shānkhuishapra. 17Ngakarthuida ngalei chiwui asān-aret peida zatlu, ina hi nali mira.” 18Chieina Abramna awui kachonshim khuiphungda zatlaga Hebronli khalei Mamrewui shirimthing ngalemli asoma; kala chili ana Proho wui vang hanphut akha sai.
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.