MOTHI 5
5
Inglong Kartulpe Athak Jisu Kithan Alam
1Jisu labang ratmaryok theksi inglong kartulpe athakyok damo; aro lalong iningo apot, adun hel anang dungyok wango. 2Lalong anang, analiyok kithan kipuyok chengponsi, ladi alam thansi paklang pono,
Nengsam Abang
3“Jiuli-long kachohrek abang bor-eh chokman; piyok pu tene ethakpe-alongri ke anali phansi!
4“Aneng kadoho kido abang si bor-eh chokman; piyok pu tene Arnam anali neng pangsam me!
5“Chingduk hopne kido abangsi bor-eh chokman; piyokte pu tene anali Arnam seme-kitang longri hlonge!
6“Dhorom kangthir poyok kangchir aro kalang-ik abangsi bor-eh chokman; piyok pu tene Arnam analiyok aneng pangsam phlenne!
7“Bangyok kajinso abangsi bor-eh chokman; piyok pu tene Arnam analiyok jinsoye!
8“Aneng kachipangthir abangsi bor-eh chokman; piyok pu tene analisi Arnam yok thek hlonge!
9“Kapangsam aphan pachingbar asal katiki abangsi bor-eh chokman: piyok pu tene anali yoksi Arnam asohel puye!
10“Dhorom kangthir anat honjat kachichak hlong abangsi bor-eh chokman; piyok pu tene ethakpe-alongri ke anali phansi!
11“Konam arlenghel hane natsi naliyok patharaknge aro honjat piye, aro naliyok ado pisi asisik thansi, ahuwit ajat-jat nali puye, la-amun nali bor-eh chokman.
12“Anengrong aro lam-lun pen nengsam chipado, piyok pu tene ethakpe long nali banta ako-ong do. Piyok pu tene aporong turkihel pot badi kido, analiyokta arleng hel ladisi honjat kipi.
Ingti Aro Katha-ang
(Mrk. 9:50; Luk. 14:34-35)
13“Nalisi pirthimipe ingti; manta ingti lam plakngo, tene anangyok potbadi padok phak une? Labang la-amun parake isi asal meme, mokol yok kitidet, aro arleng hel dong sinek aphan si michangman. 14“Nalisi pirthepe akatha-ang. Inglong kartul athak kikem rongpe buti un-eh. 15Aro arleng me-lur pakarsi, pachi arlo bibesi, gosa athaksi biman; la-amun hem along kido ahuwityok patha-angman. 16Ladisi nali katha-ang arleng hel angot pachiklanot; lalong anali naliyok kime asal pomar theksi, ethakpe long kido nali Apa yok jortang piye.
Kanong Aro Turkihel
17“Ne kanong, lale turkihel alamthe kapangwe yok wangdo puke nali chironek; ne kapangwe yok ke wangwe yong, manta anali lamthe pomar pachokpleng yoksi wango. 18Piyok pu tene ne aserengsi nali thando, ethakpe aro pirthimipe prel detde lengke, aro kido kangwe chokphrot weleng ke, kanong kiwi alam itheta ingbobeye. 19Lasi, inghosi kanong hel itheta mengme, aro bang hel yokta la mat matsi pachirliman, anangyok ke ethakpe-alongri long pabekchotne, manta inghosi kanong hel mengsi tikiman, aro ladisi pachirliman, anang ethakpe-alongri long aghaichot pusi chiklane. 20Piyok pu tene ne naliyok pubang, kanong kapaklang aro Pharisi hel yokta nali dhorom kangthir ong-eh lengke, nali jatsi ethakpe-alongri long lutdun un-eh ye.
Aneng Akang Alam
(Luk. 12:57-59)
21Aporong arleng hel angot kithan alam, nali arjuhlongo, “Nang arleng marihopot; aro inghosi arleng mariman, anang bisar-kahonthe long ado chiku hlonge.” 22Manta ne nali thando, inghosi anang korteyok aneng kang, anang ke bisar-kahonthe along ado chiku hlonge; aro inghosi anang korte yok sotongapo pu, anang ason-amel along ado chiku hlonge; aro inghosi akorteyok “kamango po” pu, anangke me-aten long kiwar ado chiku hlonge. 23Lasi, athuli long nang banta kipi kapahleye amun, nang korte pen penebak kachilang set-set hel kido nangneng chipurki phlut, 24tene labang athuli long ango nang kipi-kapahle tikangne damot, nang korte pen chipangsam dammot, tangsi wang phakne nang kipi kapahle ye abantahel pajir. 25Nang kachi-ojorpo pen nang duwar along kido amunsi, anang pen chipangsam sirakngot; penebak badi ka-ojorpo nangyok bisarpo arideng champi detne, aro bisarpoke sonturi arideng champisi, la-amun nangyok akrol long nang thalbo. 26Ne naliyok khanangsi thando, kirichok atanga athengso nang pidetde lengke, lalong para jatsi nang jok un-eh ye.
Kangho Kidoner
27“Nang kangho kidoner asal tikiyek, labang kipu, nali arju hlongo.” 28Manta ne nali thando, inghosi arloso arlengyok kangho kidoner yok chironsi lang, anang la-amunsi anenglong bangpe pen kangho dotango. 29Lasi nang ancho-ari amekpo pap pawangman, tene bangpo hekpokne nang para tinot; piyok pu tene nang abangpo jomlong kachiti ayok ke, abangpo isi arorem kapanghosi nangphan akime. 30Aro nang ancho-aripo nangpap pawangman, tene bangpoyok ta thuhletne nangpara tinot; piyok pu tene nang abangpo jom along kachiti ayok ke, isi abangpo arorem kapangwesi nangphan akime.
Kachise Alam
(Mot. 19:9; Mrk. 10:11-12; Luk. 16:18)
31“Labang pota kipu, inghosi abithang apisope ayok seman, anang bangpeyok kise porman alopo pinot.” 32Manta ne nali thando, inghosi kangho kidoner aparke, prek aron anat abithang apisope yok seh ma, anangke bangpe yok bangpen kangho padonerman; aro inghosi kise arloso peyok jorme-chihap, anangta kangho donerman.
Seme-Kitang Alam
33“Nang than phak do, nang asisik ke seme-tangtesi, Hemphu yok nang kasemetang along mengne tiki ponot, labang aporong arleng hel ango kipu, labang nali arju hlongo. 34Manta ne naliyok thando, jatsi isi semetangek; ethakpe amen penta kalek, piyok pu tene labang ke Arnam kangning anghol; 35aro pirthimipe amen penta kalek, piyok pu tene labang ke anang kengpak kibi anghol; aro Jerusalem amen penta semetangek, piyok pu tene labang ke kithe recho kido arongpe. 36Aro aphu ot ke semetangek, piyok pu tene achu ikokta nang aki-ik lale akilok ote un-eh. 37Manta nali lamthe, ‘oik’ pu tene ‘oik’ pu, lale ‘kalek’ pu tene ‘kalek’ punot; layok ke ongchot pu tene, anang pap-ajiu parasi wangman.
Aneng Akhep Alam
(Luk. 6:29-30)
38Labang kipu, nali arju hlongo, “Amek aholan amek, aso aholan aso; 39manta ne nali thando, nali kapangho poyok teng dunnek; manta inghone bak nang ancho-ari aga ang-om nang ardep, tene debera-ari aga ang-omta bipiwen. 40Aro inghone bak nang phuthak ojor pisi nangcholpo enpon, tene anangyok nangbang kido ape pota pidetnot. 41Aro inghone bak nangyok mayel isi aduwar nang papon-el tene, anang pen mayel hiniyok dunnot. 42Aro inghosi nang para dhar chakman, anangyok pimoke doyek.
Huturyok Anengdok Alam
(Luk. 6:27-28,32-36)
43Labang ta kipu, labang nali arjuhlongo, “Nang adung arel abangyok nengdok ngot, aro nang huturyok ke simot;” 44Manta ne nali thando, nali huturhel yok nengdok ngot, aro naliyok honjat kilang hel aphan pingkit pinot. 45La-tangsi nali ethakpe long kido Apa asohel chiplang une; piyok pu tene akangho aro akime arleng hini aphuthak anang arni katha-ang piman, aro dhorom kangthir pen kadhoromre la hini aphu-thak arwe ta pajangman. 46Piyok pu tene ingho arleng naliyok nengdokman, analiyok detsi nengdok tene, nali pot aman pahlonge? Kalukdar helta labenthot tiki ke ma? 47Aro nali korte-musoyok detsi kardom pi man, tene bangyok ongchot pot tikiye? Kikrolkre Bang-ajat helta labenthot tiki ke ma? 48Lasi nali ethakpe long Apa jibadi kime chokphlen, nalita lateng chokphlen chiplangot.
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.