MATHIU 19
19
Jisun Kansen Ruia A ri
(Mrk. 10:1-12)
1Jisun hiva chong rakip hi a ri sua phahan a man Galili a mak a Judia ram sunga Jordan va ralla alui hong. 2Hale mitamim an lui honga, hale hava mun han a man anmani ha an lui mandam.
3Pharisingai om ama jiang an lui honga, en sin ranga ama jiang anti, “I mo khat jarra numei mak hi chong jui lui mo ani?”
4Hale a man anmani jiang a shanga a ti, “Asinpu a man a phut na tak han pasal le numei anmani ha alui sin, tihi nang nin pama che u mo?” 5Hale a ti, “Hiva jarra pasal khat in a pa le a nu mak nata; hale a numei le kan chun nati han anmani anni ha tak khatjak chang nanti.” 6Hiva jarra anmani ha anni chang lai noni u tak-ha tak khat jak chang rang an ni jui. Ajarko Pathian in a manchunsa ha mi ning khuisen ma rase u.
7Anmanin ama jiang anti, “Ha aninko iruija mo Mousi in kansenpuina chongsan pe unlang kansenpuiru a ti?”
8A man anmani jiang a ti, “Nan lung a ngar reia nan numei ha kansenpuia analeijot peke; tak-ha a phut na han ko hi ang hin lui nimak. 9Hale kein nang ni jiang kati, tu aninom a numei ha mi khat le alui om ni lui a akansenpuia, hale a dang khat aneiret inko om pui salui chuan tho mi ani, hale tu aninom an kansenpuisa aneiret inko, om pui salui tho mi ani jui.”
10A thiamruoingain ama jiang anti, pasal khat in a numei le hi anga he rui asuak rang inko; in neiluilam asat.
11Tak-ha a man anmani jiang a ti, “Hiva chong hi mirakip in lui tor ma u; tak-ha hivahi an peksa anmani jiang jak ani. 12Ajarko mi aviar in an nu vonshung tenna a tak kansinsa hong kanzir an om, a dang ko mi ning an sin, hale vanrengram ranga luhong lui om an om; hiva chong hiko a luitor rang a man lui rase” a ti.
Jisun Naipangai Phual Apek
(Mrk. 10:13-16; Luk. 18:15-17)
13Hava suale a man a kut anmani chunga atet a lampe narang, naipangtengai ha ama jiang an hong tuang, tak-ha a thiamruoingain anmani ha an luiran. 14Tak-ha Jisun a ti, naipangtengai ha kei jiang hong rase u; anmani ha khap maru, ajarko vanrengram ha anmani ranga ani.
15Hale a man anmani chunga a kut a tetpea, hale hava mun tenna a che jui.
A nei Reathar
(Mrk. 10:17-31; Luk. 18:18-30)
16Enru, mi an khat in a honga ama jiang a ti, “A sat oja kein a tor ti bui ringthengpet mu na rang imo asat chuan ka tho rang?”
17Hava han a man ama jiang a ti, “Iruija mo nang in kei hi asat tia nan nakui?” Tu khat om asat om ma u, tak-ha asat ko khat jak ke, hava ha ko Pathian ani, tak-ha nang in ring na han na mujot inko, chongpekngai ha juiro.
18A man ama jiang a ti, holam mo? Jisun a ti, “Nang in mi that jot noning, nang in mi numei om pui salui tho jot noning; nang in rukchuan tho jot noning, nang in ani lui shakhi chang jot noning.” 19Nang in na pa na nu ha chitlejak neiro, hale na inn ri mi ha na tak khat anga lungsiatro.
20Reathar ha ning ama jiang a ti, “Hiva rakip hi kein reathar ka ni lai tenna ka hong jui ani; kein ka tho rang avatna imo a la om?”
21Jisun ama jiang a ti, “Nang in lungdo tung khat na chang jot inko; che in lang na nei rakip hongjuarro hale a riangngai jiang pero, hale nang in vanram ma nei nun nei nati; hale hongro, kanuk na hongjuiro.”
22Tak-ha reathar ha ning chong ha a jet pha pongtak a kir jui; ajarko ama ha kanchonglian mi khat alui ni,
23Hava suale Jisun a thiamruoingai jiang a hong ti, “A thianga kein nang ni jiang kati; a nei min vanrengram lut rang hi a tat, 24Veikhatret kein nang ni jiang kati ani, a nei min Pathian rengrama lut nek a saringsei khat in simphuai kuarra ater ha ning abeidet.”
25A thiamruoingain hivahi an jet pha, a tam tak an ngak a anti, “Aninko tu ning mo san ring na a mu tor rang?”
26Tak-ha Jisun anmani jiang a hong en na a ti, “Hivahi mi jiang ko nitormak; tak-ha Pathian jiang ko i rakip anitor.”
27Hava han Pitar in ama jiang a hong shanga a ti, “Enro kein in i rakip kan mak verra na nuk kannajui; hiva jarra kein in imo kan nei rang.”
28Han Jisun anmani jiang a ti, “A thianga kein nang ni jiang kati; Mi Pasalnai in ama mahok na ongna han a ong pha, hava mirual sung han; kei anajui nang ni om reng ong na somleinia nan ong rang ke, hale Israel jat somleini jiang chongtan nati.” 29Hale kei ka ming jarra, a inn, alui, ulenai, a pa, a nu a numei, a nai, animakle a ram, a mak rakip in; vei khat mu khir nanti u, hale a tor ti bui ring na mu nanti. 30Tak-ha aphutnangai ha ning a torna tak ninanti, hale nukkeingai ning masat ninanti.
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.